Vükiped Volapükik äprimon tü 2004, yanula d. 27id; atimo pabevobons is yegeds 35,030. (Yegeds mödik pejafons medü nünömaprogram itjäfidik)
Yeged adelo pevälöl
Polab (Wenske, Slüvensťĕ, Vensťĕ, Pülabsťĕ) binon pük vesüdaslavik edadeadöl, kel päspikon in nolüdalofüd Deutäna atimik vü flumeds: ,Elbe’ ed ,Oder’. Kobü Polänapük e kasub pük at duton lü grup lehitik pükas slavik. Lofüdü ziläka spikanas polaba, za ve lien de ,Wittenberg’ jü ,Berlin, ätopon pükaziläk särbyovanas, kels äspikons votiki püki vesüdaslavik.
Motapükispikan lätik polaba, jiel ,Emerentz Schultze’ < se vilag: ,Dolgen’, ädeadof bäldotü 88 ün yel: 1756. Sekü lofüdikolunam Deutänik pük topäda ävedon Dona⸗Saxänapük. Jü prim tumyela XVIIIid polab pädemon töbo, ab ün yel: 1717 äpubon ,Collectanea Etymologica’ hiela ,Gottfried Wilhelm Leibniz’, kel äninädon vödaliseda e vöďemi in polab. Ye vödemakonlet stäänikün binon el ,Vocabularium Venedicum’ (1705) fa pädana: ,Christian Hennig von Jessen’. Valodo vöds mö 2800 eloveökons. Peloveükons i pleks ömik, gamakanit bal e pöpakonads ömik. (Yeged lölik...)
Magod avigo pevälöl
El Weltspracheblatt ü Volapükabled, üd i Volapükabled zenodik, äbinon Volapükagased veütikün gloratima Volapükajenava. Gased at päpübon fa datuval it: Johann Martin Schleyer. Su pads ona pänunons Volapükadinitans nulik (tidans, tidals, profäsorans, cifs) äsi Volapükaklubs pifünöl e jenots veütikün zi vol Volapükik lölik. Pabespikons i säkäds Volapükagramata, tikets e mobs Volapükanas, e buks Volapükik nulik. (Ad logön magod at in fomät gretikum, välolös oni me mugaparat.)
...das Volapükamuf äninädon vomis jäfedik, soäsä jiel Henriette Wolter, kel päcälof fa Schleyer as cif balid pro Nolüda-Deutän, jiel Marie Johanna Verbrugh, kel älautof tidodemi gretik Volapüka pro Nedänans äsi penädis votik mödik, jiel Maria Tommasi, kel ädunof otosi pro Litaliyänans, u jiel Anna Petersen, kel ävedof presidan balid Volapükakluba di Thoreby (Danän) timü fün onik? (Ekö! lised jivolapükanas famik.)
Bal lesonas dünasta Linglänik ämuton ün yun okik, leigoäsä kadets votik, dünädön su julanaf. Tü del seimik lebüdan äkomitom ome ad kalkulön kuratiko stanedi nafa. Ven äblümom ko atos, lebüdan äluxamom kalkuli omik.
„Mutob begön ore, o löpätal! ad deükön leigedahäti orik,“ lebüdan äsagom fino.
„Dalob-li säkön sekü kod kinik?“ leson stunik ägespikom.
„Bi ma kalkul orik, o löpätal! tü timül at nünafobs ini leglüg di ‚Westminster‛.“