Windows Phone
Windows Phone est istada una famìlia de sistemas operativos pro telefoneddu de Microsoft, presentada sa prima borta a su Mòbile World Congress su 15 freàrgiu 2010.
Fiat indiritzadu a su mercadu consumer a su contràriu de su sistema betzu, Windows Mòbile (indiritzadu a su mercadu enterprise); in prus, est incumpatìbile cun custu ùrtimu e, mancai poderende·nde carchi piessìnniu, fiat unu sistema nou in s'istrutura e in s'interfàtzia: custa ùrtima, derivada dae sa de Zune HD e denominada in su comintzu Metro UI, posca Modern UI o limbàgiu de design Microsoft, at debutadu subra Windows Phone pro s'estèndere a pustis a totu is sitemas Microsoft, inclùdidu Windows 8 e sas dashboard de Xbox 360 e One.
Sa prima versione, Windows Phone 7, est arribbada in su mercadu su 21 de ledàmene de su 2010 (su 8 de onniasantu in is Istados Unidos), sighida su 29 ledàmene 2012 dae sa segunda generatzione, Windows Phone 8. Cun s'essida de Windows 10, Microsoft at cambiadu su nùmene de su sistema operativu pro telefoneddos e tauleddas in Windows 10 Mòbile.
Unu de is problemas prus mannos pro is impitadores de Windows Phone fiat sa disponibilidade de prus pagas aplicatziones in sa butega sua chi no in is pro is àteros sistemas prus de importu, dèpidu siat a s'arribu tardu de su sistema in su mercadu siat a su pagu interessu de carchi azienda manna de su web che Facebook, chi at favorèssidu s'isvilupu de aplicatziones a banda de àteros programmadores, chi però no teniant sa calidade de is aplicatziones ufitziales pro àteros sistemas. A pustis de unu megioramentu de custa situatzione in su 2013 e de su 2014, custa diferèntzia s'est ammanniada, batende Windows Phone a su fallimentu in totu su mundu.
|