In this article
உங்கள் குழந்தை அசைவதை உங்களால் உணரமுடிகிறதா?
உங்கள் கர்பப்பையில் உள்ள உங்கள் குழந்தை ஒரு சின்ன பச்சிளம் குழந்தையைப் போல இருக்கிறது. அவளுடைய கண்களும், புருவங்களும், இமைகளும் உருவாகிவிட்டன. அவளுடைய ஈறுகளின் கீழே பற்கள் உருவாகிக்கொண்டு இருக்கின்றன. அவளுடைய நாக்கிலே சுவைஅரும்புகள்உருவாகிக்கொண்டிருக்கின்றன. முதல் முறை பால்குடிக்கும்போதே அவளால் உங்கள் பாலை சுவைக்க முடியும்.அவளுடைய சருமத்தை ஒரு பாலாடை போன்ற வெள்ளையான பொருள் மூடி இருக்கும். இது உங்கள் குழந்தையின் சருமத்தை பாதுகாத்து, குழந்தைப் பிறப்பில் உதவியாக இருக்கும்.
ஏறத்தாழ, இச்சமயத்திலே உங்கள் குழந்தையின் அசைவுகளை நீங்கள் உணரக் கூடும். உங்களுக்குள் சின்னஞ்சிறு நீர்குமிழிகள் இருப்பதைப் போன்று அதை உணர்வீர்கள். முதலில், அது என்ன என்பதை குறித்து நீங்கள் நிச்சயமற்று இருக்கலாம். படிப்படியாக அசைவுகள் பலம் அடையும்போது உங்கள் குழந்தை உதைக்கிறது என்பதை நீங்கள் உறுதியாக நம்ப முடியும். இது ஒரு பரவசமூட்டும் தருணம் !
நீங்கள் சுவாசமின்றி தவிப்பதையும், உங்கள் உடல் அமைப்பு சீரற்று இருப்பதையும் உணரலாம். நீங்கள் அதிக எடையை சுமந்துகொண்டு இருப்பதும், உங்கள் வயிறு உப்பிக்கொண்டு இருப்பதால் உங்கள் சமநிலையை பாதிப்பதே இதற்கு காரணம்.
உங்களிடம் இருந்து அதிக அளவு திரவம் வெளியேறலாம், அதோடு அதிக முறை சிறுநீர் கழிக்க வேண்டும் என்றும் எண்ணம் ஏற்படலாம்.
நீங்கள் பல் தேய்க்கும்போது இரத்தக்கசிவு ஏற்படுவதை நீங்கள் கவனித்தால், அதற்கு காரணம் உங்கள் கர்ப்பத்திற்கான ஹார்மோன்கள் உங்கள் ஈறுகளை வீங்கச் செய்து, புண் ஏற்படச் செய்வது தான். இது இரத்தக்கசிவுக்கு வழிவகுக்கும். தினந்தோறும் பல் தேய்க்கவும், ஆனால் மென்மையாக தேய்க்கவும்
சிறுநீர் கழிக்கும்போது எனக்கு வலி ஏற்படுகிறது
உங்கள் உடலுக்குள், உங்கள் சிறுநீர்ப் பைக்கு (கழிக்கப்படுவதற்குமுன் உங்கள் சிறுநீர் சேருமிடம்) சற்று மேலாக உங்கள் குழந்தை வளர்ந்து கொண்டிருக்கிறது. குழந்தையின் எடையானது சிறுநீர்ப்பையை அழுத்தி, நீங்கள் அடிக்கடி சிறுநீர் கழிக்க வேண்டிய அவசியத்தை ஏற்படுத்துகிறது. இது கர்ப்ப காலத்தில் பொதுவானது. நீங்கள் குடிக்கின்ற சுத்தமான, பாதுகாப்பான நீரை இதற்காகக் குறைத்துவிட வேண்டாம். நீங்கள் தொடர்ந்து ஆரோக்கியமாக இருக்க வேண்டும்.சிறுநீர் கழிக்கும்போது உங்களுக்கு வலி ஏற்படுமானால், உங்களுக்கு தொற்று இருக்கலாம். இது உங்களுக்கு அதிகக் காய்ச்சலை ஏற்படுத்தக்கூடும் அல்லது திடீரென்று வெப்பமாக மற்றும் குளிராக உணரச் செய்யக்கூடும். தொற்றின் மற்ற அறிகுறிகள், உங்கள் சிறுநீரில் இரத்தம் கலந்திருத்தல், நோயுற்ற உணர்வு மற்றும் நடுக்கம் ஏற்படுதல் பாலுறவிலும் வலி இருக்கலாம்.
சிகிச்சை பெறுவது மிகவும் முக்கியமானது, எனவே ஒரு மருத்துவரைப் போய்ப் பாருங்கள். உங்கள் சிறுநீரிலுள்ள கிருமிகள் உங்களுடைய சிறுநீரகத்தில் தொற்றை உண்டாக்கலாம், அது உங்களுடைய மற்றும் உங்கள் குழந்தையுடைய ஆரோக்கியத்திற்கு மிகவும் தீங்கிழைக்கக்கூடியதாக இருக்கலாம்.
சிறுநீர் தொற்றுக்களை தடுப்பதற்கான வழிகள் வருமாறு:
- கழிவறைக்குச் சென்றபின், உங்கள் பெண்ணுறுப்பைவிட்டுத் தள்ளி முன்புறமிருந்து பின்புறமாக உங்களை நன்றாகக் கழுவிக் கொள்ளுங்கள். இது, உங்கள் பாக்டீரியா உங்கள் பெண்ணுறுப்பில் தொற்றினை ஏற்படுத்தாமல் தடுக்கும்.
- சுத்தமான, பாதுகாப்பான நீரை நிறையக் குடியுங்கள். இது தொற்றுக்களை கழிப்பதற்கு உதவும்.
- நீங்கள் சிறுநீர் கழிக்க வேண்டியிருந்தால், உடனே செல்லுங்கள்! அதை அடக்கி வைக்க வேண்டாம்.
என் குழந்தை அசைவதை என்னால் உணர முடிகிறது!
உங்கள் குழந்தை அசைவதை நீங்கள் முதல் முதலாக உணரும்போது ஏற்படும் ஆனந்தத்திற்கு அளவே இல்லை! இது உங்கள் முதல் கர்ப்பமாக இருந்தால், முதலில் நீங்கள் என்ன உணர்கிறீர்களா என்பதைப் பற்றி உங்களுக்கு உறுதியாகத் தெரியாமலிருக்கலாம். குழந்தை அசைவது, மென்மையான பட்டாம்பூச்சிகள் உங்கள் வயிற்றில் சிறகு விரித்துப் பறப்பதைப் போன்ற உணர்வைத் தரும்.உங்கள் குழந்தை வளர வளர, அதன் அசைவுகள் மேலும் பலமாகவும், தொடர்ச்சியாகவும் இருக்கும். கர்ப்ப காலத்தின் மத்தியில், அவை உண்மையான உதைகளைப் போலவே தோன்றும். கர்ப்ப காலத்தின் இறுதியில், குழந்தை உங்களுக்குள் அசையும்போது, உங்கள் வயிறு முழுவதுமே அசைவதை நீங்கள் காணலாம்.
உங்கள் குழந்தை எப்போதுமே அசைந்து கொண்டிருக்காது. உங்களைப் போலவே, சில நேரங்களில் அது ஒய்வெடுக்கவும், உறங்கவும் விரும்பும்.
ஒவ்வொரு நாளும், அமர்ந்து கொண்டு, உங்களுக்குள்ளே உங்கள் குழந்தை அசைவதை உணர்வதற்கு சில நொடிகள் எடுத்துக் கொள்ளுங்கள்.
அசைவுகளை அடையாளம் காண்பதை நீங்கள் பழகிக் கொள்ளலாம். குழந்தை எப்போது விழித்திருக்கும் மற்றும் எப்போது உறங்கும் என்ற அதனுடைய அன்றாட வழக்கங்களை நினைவில் வைத்திருங்கள். குழந்தை உதைப்பதால், நீங்கள் முன்னதாகவே எழுந்துவிடுவதை நீங்கள் தெரிந்து கொள்ளலாம். அல்லது நீங்கள் பாடும்போது, சாப்பிட்டு முடித்தவுடன் அல்லது நீங்கள் கழுவிக்கொள்ளும்போது அல்லது குளிக்கும்போது குழந்தை உதைக்கத் தொடங்கலாம்.
அசைவுகள் மெதுவாகிவிட்டதைப்போல் உங்களுக்குத் தோன்றினால், ஒரு குளிர் பானத்தை அருந்திவிட்டு அல்லது ஓர் இனிப்புச் சிற்றுண்டியை சாப்பிட்டுவிட்டு, சிறிது நேரம் அமைதியாக உட்காருங்கள். நீங்கள் அதிக அசைவுகளை கவனிக்கக்கூடும். குழந்தையின் வழக்கத்தில் ஏதேனும் மாற்றத்தை நீங்கள் கவனித்தால், உங்கள் அல்லது மருத்துவரிடம் கூறுங்கள்.
உங்கள் குழந்தையின் அசைவை நீங்கள் இன்னும் உணராவிட்டால், உங்கள் மருத்துவரிடம் பேசுங்கள். எல்லாம் சரியாக இருக்கிறதா என்பதை அவரால் சோதிக்க முடியும்.
காசநோய் அறிகுறிகள் உள்ளனவா என்று கவனியுங்கள்
உங்கள் குடும்பத்தில் யாருக்காவது காசநோய் (டிபி) இருந்தால், எல்லோருமே பரிசோதித்துக் கொள்ள வேண்டும். காசநோய் சுலபமாகப் பரவும் என்றாலும், அதை சரியான சிகிச்சையால் குணப்படுத்த முடியும். சிகிச்சையானது, உங்களையும் உங்கள் குழந்தையையும் பாதுகாப்பதுடன், சில அரசு மருத்துவமனைகளில் அது இலவசமாகவும் கிடைக்கிறது.உங்களுடைய உடலிலும், உங்களைச் சுற்றியுள்ளவர்களிடமும் காசநோயின் அறிகுறிகள் தோன்றுகின்றனவா என்று விழிப்புடன் இருங்கள், காசநோய் ஓர் அபாயகரமான நோயாகும். அது இருமல் மற்றும் தும்மல் வாயிலாகக் காற்றின் மூலம் பரவுகிறது. காற்றில் வெகு நேரம் அதனால் தங்கியிருக்க முடியும்.
உங்களுக்கு 2 வாரங்களுக்கும் மேலாக இருமல் இருந்தாலோ அல்லது எதிர்பாராத விதமாக உங்கள் உடல் எடை குறைந்தாலோ, ஓர் மருத்துவரைப் பாருங்கள். உங்களுக்கு காசநோய் உள்ளதா என்று அவர்களால் சோதிக்க முடியும், மேலும் உங்களுக்கு சரியான மருந்துகளையும் அவர்களால் கொடுக்க முடியும்.
மருந்துகள் எல்லாவற்றையும் நீங்கள் முடித்தபின், உங்களால் டிபியை முற்றிலுமாக ஒழிக்க முடியும். உங்களுக்குக் கொடுக்கப்பட்டுள்ள மருந்துகள் எல்லாம் தீர்வதற்கு முன்னதாகவே அவற்றை எடுத்துக் கொள்வதை நீங்கள் நிறுத்திவிடுவது, காசநோயை மீண்டும் தோன்றச் செய்துவிடலாம்.
நீங்கள் கர்ப்பமாக இருக்கும்போது, காசநோயால் நீங்கள் சுலபமாகப் பாதிக்கப்படலாம். நன்றாகச் சாப்பிட்டு, நெரிசல் மிக்க இடங்கள் மற்றும் இருமுகின்ற மற்றும் தும்முகின்ற நபர்களிடமிருந்து தள்ளியிருப்பதன் மூலம், கூடுதல் கவனத்துடன் இருக்க முயற்சி செய்யுங்கள்.
உங்கள் குடும்பத்தில் யாருக்காவது டிபி இருந்தால், 2 வாரங்கள் மருந்து எடுத்துக் கொண்டபின், அவர்கள் நோயைப் பரப்புவதில்லை. இருமும்போது, அல்லது தும்மும்போது, தங்கள் வாயையும், மூக்கையும் மூடிக் கொள்ளும்படியும், தங்கள் கைகளைத் தொடர்ந்து கழுவும்படியும் அவர்களிடம் கேட்டுக் கொள்ளுங்கள்.
விரைவாக சிகிச்சையளிக்கும் பட்சத்தில், டிபியை குணப்படுத்திவிடலாம் என்பதை நினைவில் கொள்ளுங்கள்.
