އެމްޑީޕީން ފެށި އިންސާފުގެ ދަތުރުގެ އޮޑި ގިރިއަކަށް އަރާފައިވާ ކަމަށް އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.
ރޭ ދ. ކުޑަހުވަދޫގައި ޕީޕީއެމުން ބޭއްވި ޖަލްސާގައި ވާހަކަދައްކަމުން އަދުރޭ ވިދާޅުވީ މިއަދު ފެންނަނީ އެންމެ ބޮޑު މުންކަރާތްތަކަށް އަރައިގަތުމުން ވެސް ބޮޑު މީހާ އަށް ބޮޑު ގޮތް ހަދަމުންދާ މަންޒަރު ކަމަށެވެ. އެގޮތުން ބޮޑެތި މުންކަރާތްތަކަށް އެރުމުން ދެ މަސް ދުވަހަށް ގޭ ބަންދު ކުރާއިރު ގެއެއްގެ ފާރުގައި ކުރަހާލި މީހާ ތިން މަހަށް ލަނީ ޖަލަށް ކަމަށެވެ.
އަދުރޭ އެ އިޝާރާތް ކުރެއްވީ ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ ކޮއްކޯފުޅު ނާޒިމް ސައްތާރު އެއް ޖިންސުން ގުޅުން ހިންގުމުން އައި ހުކުމަށާއި ކެނެރީގޭ ފާރުގައި އިންޑިއާ އައުޓް ޖެހި މީހާ އަށް ކޯޓުން އިއްވި ހުކުމަށެވެ.
"މި މީހުން ނޫންތޯ އިންސާފުގެ ދަތުރެއްގައި އައީ. އިންސާފުގެ ދަތުރުގައި އައި އޮޑި ހަމަ އެދިޔަގޮތަށް ގޮސް މިއޮތީ ފަރަށް އަރާ، ގިރިއަކަށް އަރާ ބީހި ނިމިފައި." އަދުރޭ ވިދާޅުވި އެވެ.
އަދުރޭ ވިދާޅުވީ މި ގިރިން އޮޑި ސަލާމަތްކުރަންޖެހޭ ކަމަށާއި ގައުމީ އޮޑި ފުންކުރަންޖެހޭ ކަމަށެވެ. އަދި ދިވެހިންގެ މާލިމީއަކާ އެކު މި އޮޑި އަމާން އައްސޭރިއަކަށް ގެންދަންޖެހޭ ކަމަށާއި އެކަން ކުރެވޭނީ ދިވެހިންނާއެކު ދަތުރުކުރަން ދަންނަ ދިވެހި ފަރުގިރިތައް ދަންނަ މާލިމީއަކަށް ކަމަށްވެސް އޭނާ ވިދާޅުވި އެވެ. އެގޮތުން އެ މާލިމީއަކީ ޔާމީންކަން ފާހަގަކުރައްވަމުން އަދުރޭ ވަނީ ދިވެހިންގެ ވެރިކަން ދިވެހިންނަށް ހޯދަން ތެދުވުމަށް ވެސް ރައްޔިތުންނަށް ގޮވާލާފަ އެވެ.
ޕީޕީއެމްގެ ރިޔާސީ ޓިކެޓް ޔާމީނަށް އަރުވާފައިވާއިރު އެމަނިކުފާނާއި ދެކޮޅަށް މިހާރުވެސް ކޯޓުތަކުގައި ދަނީ މައްސަލަތައް ހިނގަމުންނެވެ. އެގޮތުން އެ މައްސަލަތައް ސާބިތުވެއްޖެނަމަ ޔާމީނަށް އިންތިހާބުގައި ވާދަކުރުމުގެ ފުރުސަތު ގެއްލޭނެ އެވެ.