en historio
dum junio: 50, 100 e 300 yari ante nun …
9 di junio 1972. En Sudal Dakota esis grava inundo, un de la maxim severa en la historio di Usa. Pos satureso di la sulo pro antea pluvo, 380mm de plusa pluvo falis dum 9 e 10 di junio en la Nigra Kolini en la westo di la stato. Riveri exterfluis, e la plusa aquo portis fragmenti a la digo di Canyon Lake, kreante barilo avan la voyo por ekfluajo; la nivelo di aquo dop la digo tale augmentesis ed efektigis plusa inundado. En Rapid City 238 homi mortis, 2820 domi domajesis e plu kam 200 komercerii destruktesis. Konseque di la evento, la digo ri-desegnesis e hemi konstruktesis sur plu alta tero; parki kreesis sur la inundema basa tero.
26 di junio 1922. En Paris, Albert la 1ma di Monako mortis. Il esis Princo di Monako depos la morto ye 10 di septembro 1889 di sua patro Charles la 3ma, fondinto di la kazino ye Monako. En 1910 esis protesti kontre la regno di Albert, ed en 1911 il grantis konstituceso a Monako. Il esis multe interesata pri oceanografio, kun partikulara intereso pri la polala regioni; de 1898 til 1907 il facis quar ciencala expedicioni a Svalbard en sua yakto. En 1906 il fondis la Institut océanographique, qua havas du muzei, en Paris e Monako, ed agas pri la ekologio dil oceani.
30 di junio 1722. La kompozisto e violinisto Jiří Antonín Benda naskis en Benátky nad Jizerou en Bohemia. Il esis de familio di muzikisti. En 1742 il iris a Potsdam por aranjar e kompozar muziko por sua plu olda fratulo František, qua esis violinisto ye la korto di Friedrich la 2ma di Prusia. En 1749 il divenis duktanto di la orkestro di la Duko di Gotha. De 1766 il devotesis a kompozado, produktante operi, instrumentala verki ed altraji; notende, il kompozis plura melodrami. Ariadne auf Naxos, melodramo unesmafoye pleata en Gotha en 1775, esis partikulare bone recevata, e prizesis da Mozart.
|
|
|
Kunlaborez! +/-
München, e la parko ube eventas Oktoberfest.
München esas chef-urbo di Germana stato Bavaria. Segun statistiki de 2015, ol havis 1 450 381 habitanti. Lua tota surfaco esas 310,43 km². Ol esas la 3ma maxim populoza urbo di Germania, dop Berlin e Hamburg. Lua metropolala regiono habitesas da 6 milion personi.
Talpo esas familio di mamiferi mikra (longeso de 15 til 20 cm, pezo de 100 til 125 grami, qui manjas precipue insekti e lombriki, en regioni di temperema klimato. Li exkavas tuneli en humida sulo, videbla kom sulo-monteti.
Tale nomizita Equatorala e tropikala foresti existas en 4 kontinenti: Amerika (la maxim vasta surfaco), Afrika, Azia ed Oceania, jacanta aproxime inter la Tropiko di Kankro e la Tropiko di Kaprikorno. Foresti Equatorala, tropikala ed anke subtropikala okupas entote cirkume 17 milioni km², o 20% de la tota emersita surfaco de la planeto.
|
|