Vükiped Volapükik äprimon tü 2004 yanul 27id; atimo pabevobons is yegeds 127,093. (Yegeds mödik pejäfons fa nünömaprogram itjäfidik)
Yeged adelo pevälöl
Süryenapük ü Komiy⸗Süryenapük (Коми кыв, Komi kyv), suvo naedilo Komiy panemöl, binon bal pükas Luralänik, fagoröletik ko Suomiyänapük e Lestiyänapük. Paspikon as natapük in Repüblik Komiyanas vesüdü Lural in Fed Rusänik fa mens za 156 000 ün 2010. In repüblik at Süryenapük binon pük calöfik kobü Rusänapük. Grups smalikum spikanas lödons in dils votik Rusäna, as sam in ziläk ela ,Kirov’, in ziläk itreigik elas ,Nentsü’ ed in ziläk ela ,Hantü-Mansiysk’, asä in Lukrayän e Kasakistän. Süryenapük binon bal fomas kil püka mödazänodik Komiy, kel plä on ninädon Komiy⸗Pärmyakapüki (paspiköl in ziläk Komiy⸗Pärmyakik) e Komiy⸗Yazvinapüki (paspiköl in dil nolüdalofüdik läna Pärmänik). Kobü Votyakapük Komiy fomon grup pükas Pärmik. Soäs valiks püks Luralänik Süryenapük binon pük vemo kobioklebik. Dabinon dialegs deg.
Komiy labon jenavi nitedik. Pos Macaränapük äbinon balid pük Luralänik papenöl. Ün tumyel 13id kleudan: hiel ,Stepan Hrap’ ädatikom Komiye penäti lönik, nutimo äs lafab Vöna⸗Pärmik, ,Anbur ’ ü ,Abur’ pasevöli. Lafab at, libiko su lafab kirilik e lafab Grikänik pestaböl, pägebon ad penön Süryenapüki jü tumyel 17id, kü lekredanasedäbs Rusänik änüdugoms lafabi kirilik, ab latikumo ye pägebon lunomiko, b.v. fa poedan: hiel ,Ivan Kuratov’. (Yeged lölik)
...das Volapükamuf äninädon vomis jäfedik, soäsä jiel Henriette Wolter, kel päcälof fa Schleyer as cif balid pro Nolüda-Deutän, jiel Marie Johanna Verbrugh, kel älautof tidodemi gretik Volapüka pro Nedänans äsi penädis votik mödik, jiel Maria Tommasi, kel ädunof otosi pro Litaliyänans, u jiel Anna Petersen, kel ävedof presidan balid Volapükakluba di Thoreby (Danän) timü fün onik? (Ekö! lised jivolapükanas famik.)
Kötetavan famik: ‚Joseph Lister‛ (1827-1921) pävokom seimna ün neit fa man vemo liegik. Atan ägetedom ko seifs e plons mödiks sanani ün slip balid omik petupöli:
„Ag! o ‚doctor‛! senob obi so lejekiko badiko, kredob, das deadob.“
Sanan ävestigom malädani, e pos vestig äsagom nenmiseriko: „Elautol-li ya tästumi olik?“
„No!“ malädan ägespikom äpaelikölo. „Cedol-li üfo, das ...“
„Lio notaran olik panemom-li?“
„Söl X binon notaran obik, ab, o ‚professor‛ gudikün obik!...“
„Büedolöd vokön omi!“
„Lebegolöd ole, o ‚professor‛! binob nog so yunik.“
„Büedolöd kömön omi, ed i fati olik e sonis bofik olik!“
„Mutob-li täno deadön jenöfiko?“
„Nö! ab no vilob binön viktim balik, kel peramenom fa ol aneito se bed okik demü nos.“