en historio
dum marto: 50, 100 e 150 yari ante nun …
2 di marto 1972. Pioneer 10, kosmosondilo di Usa, lansesis. De julio 1972 til februaro 1973 ol studiis la asteroido-zono, la unesma sondilo qua facis lo. Ol studiis Jupitero, quan ol pasis en decembro 1973; pose ol flugis ek la sunala sistemo sen renkontrar plusa planeti. Ye 13 di junio 1993 ol pasis la orbito di Neptuno (qua lore esis plu fore de la suno kam Plutono). Tale ol divenis la unesma homala konstrukturo qua livis la sunala sistemo. La lasta signalifi di Pioneer 10 recevis ye 23 di januaro 2003. Ol esis 12 miliard km, 80 astronomiala unaji, de Tero, e depos 27 di aprilo 2002 ol ne sendabis utila informeso.
12 di marto 1922. En Lowell, Massachusetts Usa, la skriptisto Jack Kerouac naskis. Ilua genitori esis Franca-parolanti de Kebekia, ed il komencis lernar la Angla linguo evante sis yari. De 1939 il rezidis en New York; il renkontris personi di la Generaciono Beat, inkluzante Allen Ginsberg e William S. Burroughs, qui influis ilua posa skribaji. Dum ke il esis komerco-navano en 1942 il skribis unesma romano (qua unesmafoye aparis en 2011). La romani The Town and the City aparis en 1950, ed On the Road en 1957; plusa romani sequis. Ilua skriburi precipue esis autobiografiala. Il deskriptis sua stilo kom "spontana prozo".
7 di marto 1872. En Amersfoort, Nederlando, la piktisto Piet Mondrian naskis. Il esis parto di la movado De Stijl, fondita dal piktisto Theo van Doesburg en 1917. Projetanti di De Stijl deziris reduktar piktado ad esenci di formo e koloro, favorante horizontala e vertikala linei, e primara kolori. La movado esis influo di arkitekturo ed interna desegnado dum sequanta yari. De 1918 Mondrian rezidis en Paris, ube ilua verki divenis tipala di ilua matura stilo. Il translojis a London en 1938 ed a New York en 1940, ube il havis studieyo en Manhattan.
|
|
|
Kunlaborez! +/-
München, e la parko ube eventas Oktoberfest.
München esas chef-urbo di Germana stato Bavaria. Segun statistiki de 2015, ol havis 1 450 381 habitanti. Lua tota surfaco esas 310,43 km². Ol esas la 3ma maxim populoza urbo di Germania, dop Berlin e Hamburg. Lua metropolala regiono habitesas da 6 milion personi.
Talpo esas familio di mamiferi mikra (longeso de 15 til 20 cm, pezo de 100 til 125 grami, qui manjas precipue insekti e lombriki, en regioni di temperema klimato. Li exkavas tuneli en humida sulo, videbla kom sulo-monteti.
Tale nomizita Equatorala e tropikala foresti existas en 4 kontinenti: Amerika (la maxim vasta surfaco), Afrika, Azia ed Oceania, jacanta aproxime inter la Tropiko di Kankro e la Tropiko di Kaprikorno. Foresti Equatorala, tropikala ed anke subtropikala okupas entote cirkume 17 milioni km², o 20% de la tota emersita surfaco de la planeto.
|
|