Si Fernando de Magallanes, o Ferdinand Magellan, (1480 – Abril 27, 1521, Isla sa Mactan, Sugbo) usa ka Portuges nga manlalayag. Siya maoy usa sa mga manlalayag nga nangita, ug nakalayag, sa ruta pa-kasadpan gikan sa Uropa padulong sa mga "Spice Islands" sa Indonesia. Ang maong paglayag maoy unang higayon nga na-sirkumnabigar ang Kalibotan.
Wala niya makumpleto ang paglayag kay napatay man siya sa pundok sa mga lumad nga Sugbuanon ni Lapu-Lapu didto sa Mactan. Hinuon, nakapadayon sa paglayag ang iyang mga kauban nga wala mapatay sa maong sangka.
Tungod kay naadto na ni Magallanes kaniadto ang Spice Islands sa laing ekspedisyon bag-o pa ang iyang pakasadpan nga paglayag, siya maoy unang tawo nga nakaa-agi na sa tanang meridyan sa kalibotan.
Si Magallanes usab maoy unang Uropeyong manlalayag nga nakaagi sa Kadagatang Pasipiko, ug unang Uropeyo nga nakaduaw sa Sugbo, nga wala pa kaniadto mailhi sa mga taga-Kasadpan.
Sa 270 ka tawo nga ubos sa iyang mando niadtong ekspedisyon, 18 ra ang nakabalik sa Espanya diin sila naggikan. Sila gipangulohan ni Juan Sebastián Elcano, ang mipuli ni Magallanes human kini mapatay....