3-0 އިން ނޭޕާލް ބަލިކުރުމަށްފަހު އުރީދޫ ސާފް ޗެމްޕިއަންޝިޕްގެ ޗެމްޕިއަންކަން އިންޑިއާ އިން ހޯދައިފިއެވެ.
މިއީ އިންޑިއާ އިން ސާފް ޗެމްޕިއަންޝިޕް ކާމިޔާބުކުރި 8 ވަނަ ތަށްޓެވެ. އިންޑިއާ އަކީ މި މުބާރާތުގެ އެންމެ ކާމިޔާބު ޓީމެވެ. އަނެއްކޮޅުން މިއީ ނޭޕާލުން މުބާރާތުގެ ފައިނަލްގައި ކުޅުނު ފަހަރެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު މި މެޗުގެ ފުރަތަމަ ހާފް ބޯ ވާރޭގައި ކުޅުނުއިރު، މި ހާފުގައި ރަނގަޅަށް ކުޅެ އިންޑިއާ އިން ވަނީ ގޯލްޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން އިންޑިއާގެ ފޯވާޑް ސުނިލް ޗެތުރީގެ ހަމަލާއެއްގެ އިތުރުން ޔާސިރު އަދި ސުރޭޝްގެ ހަމަލާތައް މަތަކުރީ ނޭޕާލްގެ ކީޕަރު ކިރަން އެވެ.
މި ހާފުގައި ނޭޕާލް އިން އެންމެ ނުރައްކާތެރި ހަމަލާއެއް ފޮނުވާލީ އެޓީމުގެ ނަވަޔުގުގެ އެވެ. އެގޮތުން އޭނާ ފޮނުވާލި ހަމަލާ އަމާޒުވީ އިންޑިއާގެ ގޯލުގެ ދަނޑި އަށެވެ.
ފުރަތަމަ ހާފްގައި ގޯލެއް ފެނިގެން ގޮސްފައި ނުވި ނަމަވެސް މެޗުގެ 49 ވަނަ މިނެޓްގައި ޗެތްރީ ވަނީ އިންޑިއާ އަށް ލީޑު ނަގާދީފައެވެ. ޗެތްރީ މި ގޯލު ކާމިޔާބުކުރީ ޕްރިތަމް ކޮޓާލް ނަގައިދިން ހުރަހަކުން ޕެނަލްޓީ އޭރިއާ ތެރޭ ހުރެ ބޮލުން ފޮނުވާލި ހަމަލާއަކުންނެވެ. މިއީ އިންޑިއާގެ ގައުމީ ޓީމަށް ޗެތުރީ ކާމިޔާބުކޮށްދިން 80 ވަނަ ގޯލެވެ.
މި ގޯލު ކާމިޔާބުކުރިތާ މިނެޓެއް ފަހުން އިންޑިއާ އިން ވަނީ އެޓީމުގެ ދެވަނަ ގޯލު ކާމިޔާބުކޮށްފައެވެ. އެގޮތުން ޔާސިރު މުހައްމަދު ދިން ބޯޅައަކުން ނޭޕާލުގެ ޕެނަލްޓީ އޭރިއާ ތެރެއިން ފޮނުވާލި ހަމަލާއަކުން އިންޑިއާ އަށް އެ ގޯލު ކާމިޔާބުކޮށްދިނީ ސުރޭޝް ސިންހް އެވެ.
މި ދެ ގޯލަށްފަހު ވެސް އިންޑިއާ އިން ދިޔައީ ނޭޕާލްގެ ގޯލަށް ނުރައްކާ ކުރަމުންނެވެ. ނަތީޖާއެއްގެ ގޮތުން މެޗުގެ 90 ވަނަ މިނެޓްގައި އިންޑިއާގެ ތިންވަނަ ގޯލު ކާމިޔާބުކޮށްދިނީ ދެވަނަ ހާފްގައި ކުޅެން އެރި ސަހަލް އަބްދުލް ސަމަދު އެވެ.
މިފަހަރުގެ މުބާރާތުގައި ވާދަކުރީ ފަސް ޓީމު ކަމަށްވާއިރު، މުބާރާތް ކުރިއަށް ގެންގޮސްފައިވަނީ ލީގު އުސޫލުންނެވެ. ފައިނަލަށް ގޮސްފައިވަނީ އެންމެ ގިނަ ޕޮއިންޓު ހޯދި ދެ ޓީމެވެ.