Eventi +/-
en historio
dum mayo
50, 100 e 250 yari ante nun …
31 di mayo 1970. Severa ter-tremo, 35 km for la marbordo di regiono Ancash en norda Peru, esis kauzo di granda domajo e cirkume 70.000 morti. Plura urbi esis grave domajata o destruktesis. L'urbo Yungay e la vilajo Ranrahirca kovresis da grandega avalancho de roki, glacio e nivo falinta de la norda latero di des-stabiligita Monto Huascarán. Yungay pose esis ri-konstruktata 2 km norde de la enterigita urbo.
26 di mayo 1920. En Jamestown, Nordal Dakota Usa, la kantistino Peggy Lee naskis, kun nomo Norma Deloris Egstrom. Kom skolano el kantis, po mikra pekunio, ye lokala radio-stacioni. Benny Goodman plu tarde vidis el kantanta en nokto-klubo, ed el divenis kantistino kun ilua orkestro en 1941, ibe restante dum du yari. El facis unesma sucesoza sono-registro en 1942, e plusa sequis. El anke kompozis kansoni. El duris plear til la 1990-yardeko.
16 di mayo 1770. Marie-Antoinette, filiino di Francis la 1ma, Santa Romana Imperiestro, e spozino Maria Theresa la regnanto di la dinastio Habsburg, mariajis kun Louis-Auguste la delfinulo di Francia. En 1774 Louis la 15ma di Francia mortis, e Louis-Auguste divenis rejulo Louis la 16ma, e Marie Antoinette divenis rejino. Komence dum la regno, la Franca populo prizis el, ma plu tarde el divenis despopulara; el semblante simpatiis la enemiki di Francia, note elua nasko-lando Austria.