Cuba
| República de Cuba | |||||
| |||||
| Lema nacional: Patria u Muerte | |||||
| Himno nacional: La Bayamesa | |||||
 | |||||
| Capital | L'Habana | ||||
| Mayor ciudat | L'Habana | ||||
| Idiomas oficials | Castellán | ||||
| Forma de gubierno President d'o
Consello d'Estato |
Republica socialista Miguel Díaz-Canel | ||||
| Independencia Declarata Reconoixita |
d'Espanya 10 d'octubre de 1868 20 de mayo de 1902 | ||||
| Superficie • Total Mugas |
Posición 105º 110.860 km² 29 | ||||
| Población • Total (2016) • Densidat |
Posición 71º 11.239.224 101.38 hab/km² | ||||
| PIB (PPA) • Total (2016) • PIB per capita |
Posición 86º US$ Plantilla:Increase 102.574 millons US$ 9,126.43 | ||||
| Moneda | Peso cubano (CUP) Peso cubano convertible (CUC) | ||||
| Chentilicio | cubano/a | ||||
| Zona horaria • en Verano |
UTC -5 UTC -4 | ||||
| Dominio d'Internet | .cu | ||||
| Codigo telefonico | +53
| ||||
| Prefixo radiofonico | CLA-CMZ / T4A-T4Z / COA-COZ
| ||||
| Codigo ISO | 192 / CUB / CU | ||||
| Miembro de: ONU, ALBA, ALEC y ALADI | |||||
A Republica de Cuba ye un país d'America asentato en un archipielago d'o mar d'as Antillas, tamién conoixiu como mar Caribe, en a confluencia entre o golfo de Mexico y l'Ocián Atlantico. A lo norte se troban Estatos Unitos y Bahamas, a l'ueste Mexico, a lo sud as Islas Caimán y Chamaica y a lo sudeste Haití, en l'occident d'a isla La Española, que comparte con a Republica Dominicana.
A población d'o país ye de 11.308.764 habitants (2004) en una superficie de 110.860 km², con una densidat de población de 101 hab/km². Ye asinas a segunda isla más poblata d'as Antillas, dezaga de La Española.
Politicament, Cuba ye una Republica dende a suya independencia d'Espanya, reconoixita o 20 de mayo de 1902 (encara que a luita por a suya independencia prencipió en 1868), con capital en a ciudat de La Habana, estando l'actual President d'o Consello d'Estato Miguel Díaz-Canel. En a vichent Constitución de Cuba, o suyo articlo 1 define a o país como un Estato socialista de treballadors, dende a victoria de Fidel Castro Ruz en a Revolución Cubana en 1960. L'idioma oficial de Cuba ye o castellán, y a suya moneda o peso cubano (encara que tamién bi ha o peso cubano convertible).
As prencipals ciudatz d'o país son a suya capital, La Habana, con más de 2 millons d'habitants, Santiago de Cuba, con más de meyo millón, y Camagüey y Holguín, ciudatz con una población de más de 300.000 habitants. Sindembargo, en o país bi ha 11 ciudatz más con una población superior a los 100.000 habitants.
Encara que en plegar os colonizadors espanyols a Cuba en 1492 a población yera formata por amerindios, as malautías y a propia colonización facioron desapareixer a mayor parte d'a suya población nativa, que fue sustituita por esclavos de raza negra portiatos dende Africa, estando asinas a población actual d'o país una suma de descendients d'istas razas, amás d'una chicota immigración d'orichen asiatico vinclata a la presencia colonizadora espanyola en as islas Filipinas.
Historia[editar | editar código]
Antiga colonia espanyola dende o sieglo XVI, a luita por a independencia prencipió en 1868 y continó mientres tot o sieglo XIX dica la Guerra de Cuba de 1898 entre Espanya y os Estatos Unitos. O desencadenant d'a guerra estió lo esclatito d'o vaixiello USS Maine d'os Estatos Unitos, atracato en o puerto de la Habana, o 15 de febrero de 1898. A prensa nordamericana fació una fuerte presión ta culpar a Espanya d'o esclatito en a nau, declarando Estatos Unitos a guerra a Espanya con ixa enchaquia. O president William McKinley desichió a immediata retirata espanyola de Cuba, ninviando tropas americanas a la isla.
Dimpués d'a ocupación nordamericana, a isla obtenió a independencia en 1902, encara que os Estatos Unitos continoron tenendo bells privilechios en Cuba. A revuelta guerrillera (Revolución Cubana) contra la dictadura de Fulgencio Batista levó a lo establimiento d'o rechimen revolucionario castrista a partir de 1959.
Diversos grupos de terratenients exiliatos en Miami, armatos y entrenatos por o gubierno d'os Estatos Unitos y con o refirme d'a CIA, prencipioron una invasión melitar sobre a isla o 17 d'abril de 1961 en a zona de Playa Girón, estando rapedament redotatos en poquetas horas. Iste feito fació que o gubierno, a lo prencipio nacionalista, de Fidel Castro declarase o caracter socialista d'a Revolución Cubana, y que s'intensificasen as relacions de Cuba con a URSS, que podió veyer-se en a dita Crisi d'os misils de Cuba, en 1962.
Istos feitos creyoron una situación prebelica entre os gubiernos de Cuba y os Estatos Unitos, que s'ha mantenito dica l'actualidat, un bloqueyo economico, d'alimentos y medicamentos sobre a isla; bloqueyo que ha estato reiteradament denunciato por a Organización d'as Nacions Unitas y que, manimenos, s'ha visto intensificato dende 1996 con l'aprobación d'a Lai Helms-Burton por parti d'os Estatos Unitos.
Iste bloqueyo, acompanyato d'a cayita d'a Unión Sovietica a prencipios d'os anyos 1990, ha creyato una important crisi economica en a isla, fendo que se desarrollase a metat d'ista decada un movimiento migratorio enta las costas de Florida protagonizato por os balseros.
Recientment, o incremento d'os ingresos toristicos y os convenios de colaboración con o gubierno de Venezuela (desplazamiento de medicos cubans voluntarios a Venezuela a cambeyo de pres preferencials en o petrolio venezolán ta Cuba) han contribuito a una cierta recuperación d'a economía cubana.
Subdivisions administrativas[editar | editar código]
Cuba se divide, politicament y administrativa, en 14 provincias y un municipio especial. Amás, totas as provincias se trestallan en municipios; en total en son 169.
Cheografía[editar | editar código]
Cuba ye un archipielago constituito por a mayor isla d'as Antillas dita isla de Cuba, a isla de la Juventud (en aragonés "isla d'a Choventut", d'antis más dita Isla de Pinos) y atras 4.195 islas. Ye situata en o mar d'as Antillas, a man d'as costas d'os Estatos Unitos y Mexico.
A isla prencipal de Cuba ye a más gran en superficie, con 105.006 km², y a setena más gran d'o mundo. A segunda isla más gran de Cuba ye a isla de la Juventud, a lo suduest, con un aria de nomás 3.056 km². A superficie total de Cuba ye de 110.860 km².
A lo sudeste bi ha la Sierra Maestra, una cordelera de montanyas a on o punto más alto se troba en o Pico Real de Turquino, con 2.005 m. A l'ueste bi ha la Sierra de los Órganos, con una altaria maxima de 800 m. A lo sud se troba la Sierra de la Trinidad, u as montanyas d'Escambray; o punto más alto en ye de 1.1.50 m.[1] Arredol d'o 75% d'o territorio ye fértil; ya que a mayoría d'a tierra ye arable y accesible dende a mar, Cuba tien una posición unica en o Caribe.[1]
Clima[editar | editar código]
O clima de Cuba ye tropical, más que más en a rechión occidental, pero l'aire fredo d'o norte produce una oscilación termica anyal, más evident en a rechión oriental.[2] L'amplaria cheografica de Cuba y a variedat d'as montanyas, sabanas, paúls, plachas y selvas tropicals que producen microclimas y diferencias en temperatura, precipitación, fauna y flora.[3] A temperatura meyana ye de 25 °C.[2] A precipitación anyal meyana ye de 1.320 mm; a temporada de plevias ye de mayo a octubre.[3]
Hidrografía[editar | editar código]
Cuba tien más de 200 rius, pero nomás dos en son navegables.[4] O Cauto, a lo sudeste d'o país tien una longaria de 343 km; o Tao ye más curto, pero más cabaloso.[5] O Sagua la Grande, en o centro de Cuba, s'emplega ta producir enerchía hidroelectrica, asinas como diversos saltos d'augua situatos en diversas rechions d'o territorio.
Fauna y flora[editar | editar código]
Belunas d'as especies d'a fauna que destacan en Cuba son os mamifers como os uties, diversos quiropteros, reptils (Cuba poseye una población important de cocodrilos), anfibios (como por eixemplo, belunas d'as especies más chicotas de ranas d'o mundo), peixes y animals marins. A flora cuenta con más de 6.500 especies de plantas de simient, de selvas, de plantas tropicals, de río y árbols fruitals.[6]
En os suelo abundan os insectos que fan proliferar en bellas zonas os mamífers insectivoros como l'almiquí. Amás, bi ha presencia de diversas aus endemicas como lo tocororo, o Chlorostilbon ricordii y l'Aratinga euops. En as paúls i habitan especies caracteristicas d'o país como los cocodrilos , Agelaius assimilis, Ferminia cerverai, Cyanolimnas cerverai y o Bubulcus ibis.
Referencias[editar | editar código]
- ↑ 1,0 1,1 Cuba. II. Land and Resources. Encyclopedia Encarta.
- ↑ 2,0 2,1 Cuba. A cheografía fisica. O clima. L'Enciclopèdia Catalana. Data d'accés: 20 d'octubre, 2008
- ↑ 3,0 3,1 Cuba. Climate. Encyclopedia Encarta
- ↑ Cuba. Rivers and Lakes. Encyclopedia Encarta.
- ↑ Cuba. A hidrografía y a vechetación. L'Enciclopèdia Catalana.
- ↑ Mi País Cuba.
Vinclos externos[editar | editar código]
Se veigan as imáchens de Commons sobre Cuba.- (es)(en) Pachina web oficial d'o Gubierno de Cuba.
