Syrie

	الجمهورية العربية السورية; al-Dschumhūriyya al-ʿarabiyya as-sūriyya; Arabische Republik Syrien
Fahne	Wappe
Amtsspraach	Arabisch
Hauptstadt	Damaskus
Staatsform	Präsidialrepublik
Staatsoberhaupt	Baschar al-Assad
Regierigschef	Imad Mohammad Deeb Khamis
Flächi	185.180 km²
Iiwohnerzahl	20.102.361 (Juli 2006)
Bevölkerigsdichti	108,6 Iiwohner pro km²
Bruttoinlandbrodukt	1.380 US-$ (2004)
Währig	Syrische Lira
Unabhängigkeit	vo Frankriich am 17. April 1946
Nationalhimne	Humat ad-Diyar
Zitzone	UTC+2
Kfz-Kennzeiche	SYR
Internet-TLD	.sy
Vorwahl	+963

Syrie (amtlig Arabische Republik Syrien, arabisch الجمهورية العربية السورية / al-Dschumhūriyya al-ʿArabiyya as-Sūriyya) isch ä Schdaat in Vorderasie und Deil vom Maschrek. Syrie gränzt im Süde an Israel und Jordanie, im Weschte an Libanon und s Mittelmeer, im Norde an d Türkei und im Oschte an Irak. Mit rund 185.000 Quadratkilometer isch Syrie ungefähr halb so gross wie Dütschland.

Der Name Syrie chunnt us em Griechische, wo dr alt Name Assur übernoh het (Lueg drzue au die antike Provinze Syria Coele, Syria und Syria Palaestina). Die traditionelli arabischi Bezeichnig vom Gebiet isch bis in d Neuziit Bilad asch-Scham und nit Syrie gsi.

Gschicht[ändere | Quälltäxt bearbeite]

Syrie isch bis 1918, wo s Osmanische Riich ufglöst worden isch, vo de Osmane regiert worde. Es isch denn aber nid unabhängig worde, sondern Frankriich het s as Völkerbundsmandat verwaltet. 1946 isch die Arabischi Republik Syrie usgrüeft worde. 1958 het es mit Ägypte die Vereinigti Arabischi Republik bildet, wo 1961 noch eme Putsch vo syrische Offizier usenanderbrochen isch. 1963 isch d Baath-Bardei an d Macht cho. 1967 het Syrie am Chrieg gege Israel mitgmacht und d Golanhöchene verlore, wo sithär vo Israel bsetzt si. Sit 1970 het dr Hafiz al Assad d Baath-Bardei beherrscht. Im Jom Kippurchrieg 1973 het Syrie am Aafang militärischi Erfolg gha, isch aber schnäll wider vo dr israelische Armee zruggdrängt worde. 1979 het dr Assad aagfange, die muslimischi Brüederschaft, e radikali islamistischi Organisation, afo bekämpfe. 1982 het die im Norde vom Land en Ufstand aazettlet, wo bluetig underdruckt worden isch.

Am 10. Juni 2000 isch dr Hafiz al Assad gstorbe und si Sohn, dr Baschir al Assad, het d Macht übernoh. Am Aafang vo siiner Regierigszit het er Reforme iigfüehrt, aber s Regime het scho churz druf wider aagfange, Oppositionelli festzneh. Ussepolitisch isch s syrische Regime Iran noogstande und het sich im Libanon iigmischt, dört die islamistischi Hisbulla understützt und isch au beschuldigt worde, am Mord vom libanesische Füehrer Rafiq Hariri schuld z sii. Wägen em internationale Druck, wo s denn gee het, het Syrie schliesslig alli siini Druppe us em Libanon abzooge. Am 6. September 2007 het die israelischi Luftwaffe e Bombenaagriff gege gheimi Aalage im Oste vo Syrie undernoh, wo von ere vermuetet wird, ass es en Atomaalag gsi sig, wo d Syrer mit nordkoreanischer Hilf ufbaut hai. Syrie striitet das alles ab. Im Mai 2008 hai Israel und Syrie under dr Egide vo dr Türkei mit Friidensverhandlige aagfange. Die si aber abbroche worde, wo am Ändi vom Johr Israel im Gazastreife interveniert het.

Im Rahme vo dr Protestwälle in dr arabische Wält isch s im Früehlig 2011 au z Syrie zu Protest cho. Us dene het sich spötistens vom 8. April 2011 aa ä Revolte afo entwickle, wo d Regierig mit herter Hand druf greagiert het. Sit denn isch us dr Revolte e Bürgerchrieg worde, mit hundertduusige vo Opfer.