Xiografia

Mapa fixega de la tera co i confini puliteghi del 2016.

Ła xiografia (dal latin xiographia, che deriva a so 'olta dal greco vecio γη/γεια ("tera") e γραφειν ("scrivare"), che saria ałora "scritura de ła tera") la xé la siensa che la ga el conpito de studiar, descrivare e raprexentare la Tera n'te la so superficie e n'te la grandesa e la distribusion dei fenomani fixeghi, bioloxeghi, antropoloxeghi che i la intaresa, che n'te la so union, i ghe modifega continuamente l'aspeto.

La xiografia la xé tanto altro in pì che solo la cartografia (o sia el studio de le carte xiografeghe) o la topografia, parché la xiografia la xonta l'indajine de la dinamega e de le cauxe de la poxision de la tera n'tel spasio, dei fenomani che njien fora so de ela (l'atmosfera, la idrosfera, la biosfera e la xiosfera) e de le so carateristeghe.

Storego

Mapa del mondo de Eratostene.

Tra tuti i popoli de l'area mediteranea, i promi xiograi i xé stai i antichi ejisi e al de fora de le xone del mediteraneo ghe xé sta anca le xiografie Babilonesi e dell'India.

Dai Greçi deriva el nome come lo doparemo ni'altri oçidentali. Eratostene (l'omo chel ghea anca dato el nome a sta siensa) el ga butà drento in xiografia la doparasion de le coordinate sfereghe (latitudene e lonxitudene) par esar in grado de catar na località xiografega. Inportanti progresi i xé stai fati da Ipparco di Nicea, chel ghea butà drento la doparasion de metodi astronomeghi pal calcolo de le lonxitudeni.

El primo xiografo roman che al dì de oncò se conose, el xé Pomponio Mela chel ghea scrito on curto tratà ciamà Chorogràphia; dopo el greco Strabone (chel ga vivuo intrà el I secolo a.C. e el I secolo d.C.) chel ghea scrivuo na granda storia (in male condision, desfada dal tenpo), e na conpleta xiografia, che la xé rivada ai dì nostri in bone condision. L'opara di Strabon la xé de cualità e no la dopara tecneghe de xiografia matemadega che le jera sta tacà doparare da Eratostene e Ipparco.

El studio de la xiografia matemadega el xé sta riciapà n'tel II secolo d.C. da Marino di Tiro e, pì de tuti, da Claudio Tolomeo, andove la so Xiografia no la ga solo le coordinate sfereghe de 8000 località difarenti, ma el ga anca i metodi de proiesion doparai n'te la cartografia.

N'tel Medioevo i Arabi i ghea fato opare de granda cualità, come par exenpio el "Libro del Re Ruggero" de Idrisi e altri (n'tel XII secolo).

Mapa del mondo fiorentin de metà del XV secolo, baxada so la tradusion latina del 1406 del manscrito xiografia de Tolomeo.

Co le grande esplorasion terestri verso l'Asia (Il Milione de Marco Polo, n'tel XIII secolo, che l'è on exenpio encantevole) e chele maritime, o oncora verso l'Asia o verso le Americhe, l'omo "el ghea riscoprio" la pasion par la xiografia, e el bixogno de on studio mejo fato. N'te la segonda metà del XV secolo la riscuèrta in Eoropa de l'opara xiografica de Tolomeo la xé sta fondamental par la rinasita de la cartografia. Sta cuà, infati, la xé l'epoca dei primi atlanti eoropei otegnui co la doparasion de la cartografia matemadega. N'tel XVII secolo ghe xé sta difarenti tentadivi de Varenio de sistemar on fià la sienza xiografega.

N'tel Setexento se ghea scumisià a intendare la xeografia come fin prinçipal la racolta de dati so le carateristeghe fixeghe, soçali, economeghe e storeghe de ogni paexe.

N'tel XIX secolo grasie ai xiografi todeschi Alexander von Humboldt (chel ghea fondà el indiriso naduralistego) e Carl Ritter (chel ghea fondà l'indiriso antropego-storego): Col pasar dei ani sti do indirisi i se ga unìo, par divegnerghine fora uno solo. Ben presto sta disiplina la xé divegnua na disiplina universitaria, scuminsiando da Parixi e Berlin.

N'tei ultimi do secoli, la cuantità de le conosense e el numaro de strumenti da doparar i xé vegnesti tanti e de conseguensa le ga portà a na granda cresita de l'acuratesa de la xeografia e la descuerta de senpre pì novi posti novi n'tel nostro pianeta.

N'tel XX secolo, in oçidente, la disiplina xiografega, la ga traersà cuatro faxi prinçipali: determinismo xiografego, xiografia rejonale, rivolusion cuantitativa e xiografia critega.

I forti ligami Interdisiplinari intrà la xeografia e giołogía e botànica, ma anca co ła economia, ła sociołogia, ła politica e ancor de pì co ła demografía i xé cresui tanto, soratuto grasie a la siensa del sistema terestre, chel çerca de capire el mondo so na vixion ołistega.

Branche de la xiografia

Xiografia fixega

La xiografia fixega la se divide in:

• bioxiografia, che la studia la distribusion de le speçe viventi;
• climatołoxia, che la rivarda al clima e i fenomani atmosferici;
• xiodexia, che la raprexenta la tera mixurandola
• xiografia anbientałe, che la studia la relasion tra popoli e naura
• xiografia astronomega, che studia el movimento de la tera in relasion a cheli altri pianeti del Sistema solare;
• xiografia litorałe, che studia e coste
• xiomorfoloxia, che studia la forma de la tera e come mai la xé cusì
• jiasołoxia, che studia i jasari
• idrołoxia e idrografia, che studia l'acua e la so distribusion
• oçeanografia, che studia i mari;
• orografia, che studia le montagne
• pałeoxiografia, che ricostruise la xiografia n'te le ere pasae
• pedołoxia, che studia la tera

Xiografia matematega

• Cartografia,
• Xiografia astronomega,
• Topografia
• Xiomatega
• Xiodexìa

Xiografia omana

• Xiografía de la popolasion
• Xiografía economega
• Xiografía culturale
• Xiografía sociale
• Xiografía storega
• Xiografía rural
• Xiografía orbàna
• Xiografía mèdega
• Xiografía pulítega

Parole pì doparae n'te la xiografia

• Oceano - Mar - Lago - Fiume - Calto o Torente - Giasaro - Nevajo - Cascada - Monte de giaso o Iceberg - Pack
• Cadena de monti - Montagna - Vulcan - Cołina - Val o Vałe - Piana basa - Piana alta
• Continente - Ixula - Penixula - Arcipelago - Baja - Gulfo - Laguna - Fiurdo
• Giungla - Foresta - Bosco - Savana - Stepa - Tundra - Dexerto - Palù

I continenti

Africa - Mèriche - Antartide - Axia - Eoropa - Oseania

Voxi coreƚade

• Paixi del mondo
• Łe Nasion par continente