Eventi +/-
en historio
dum februaro
50, 100 e 200 yari ante nun …
1 di februaro 1970. En Arjentinia eventis grava treno-dizastro, la maxim mala en sud-Amerika. Proxim la fervoyala staciono di Benavidez, 29 km norde de Buenos Aires, espreso-treno, tirita da du Diesel-lokomotivi, kolizionis kun sen-mova lokala treno, qua haltabis 40 minuti antee pro defekto di la motoro. La lokomotivi di la espreso-treno tote destruktis la dopa vagono di la lokala treno, ed aplastis la sequanta vagono. 236 homi mortis, omna en la lokala treno, e plu kam 500 homi vundesis.
7 di februaro 1920. En Irkutsk, Alexandr Kolchak esis exekutata da Bolshevik-revolucioneri. Naskinta en Santa Peterburg en 1874, Kolchak esis admiralo, membro di la Rusa polala expediciono di 1900 til 1902, e militala duktisto. Dum la interna milito di Rusia il esis duktisto di la Blanka Armeo ed establisis, en Omsk, Siberia, guvernerio kontre la Komunisti. De 1918 til 1920 il havis la titulo "supra regnanto di Rusia", ma altra guvernerii hezitis agnoskar ke il esas Rusa statestro.
17 di februaro 1820. En Verviers, en nuntempa Belgia, la violinisto Henri Vieuxtemps naskis. Ilua patro esis amatora violinisto e fabrikanto di violini. Il unesmafoye koncertis evante sis yari, ed il studiis kun la violinisto Charles Auguste de Bériot. Ankore yuna, il koncertis en Paris en 1829 ed en London en 1834. Dum kelka yari il rezidis en Santa Peterburg en Rusia, kom korto-muzikisto; il pose esis profesoro ye la Konservatorio di Bruxelles. Il kompozis plura violino-koncerto-peci ed altra verki por la violino. Pos cerebrala stroko en 1873 il mustis cesar pleado.