Eventi +/-
en historio
dum decembro
50, 100 e 150 yari ante nun …
2 di decembro 1969. La Boeing 747, la originala "Jumbo Jet", facis unesma flugo kun pasajeri. Ol portis 191 personi, de qui 110 esis jurnalisti e fotografisti. Quar hori e du minuti pos departo de la probo-loko di Boeing ye Seattle, l'aeroplano arivis ye New York, ibe salutate da Charles Lindbergh, qua en 1927 unesmafoye flugabis sole trans la Atlantiko.
3 di decembro 1919. En Kanada, la Ponto di Québec apertesis. Olua longeso esas 987 m, la centrala extendo esante 549 m; ol transiras la Fluvio St. Lawrence, de Urbo Québec a Lévis. Tala projeto konsideresis en 1852, e plurafoye pose; kompanio por konstruktar la ponto esis establisata en 1887 ma konstruktado komencis plura yari pose. La ponto, preske kompleta, krulis en 1907; 75 laboranti mortis. Ol esis ri-desegnata, ma en 1916 la centrala segmento falis aden la fluvio dum pozado, e 13 laboranti mortis. La ponto esis fine kompletigata en agosto 1919.
1869. La romano Война и мир ("Milito e Paco") da Lev Tolstoy, aparis unesmafoye en toteso. Ol plu frue aparabis seriale inter 1865 e 1867, kun titulo La yaro 1805. La unesma skisuro di la verko esis kompleta en 1863. Pozata en la periodo 1805 til 1820, la rakonto traktas la invado di Napoléon aden Rusia, ed olua influo sur kin aristokrata familii. Parti de la verko esas filozofiala diskutado; Tolstoy konsideris ke ol ne esas romano, opinionante ke Anna Karenina (1878) esis ilua unesma vera romano.
-blank.svg){kind=spacer}
