Mwaisse pådje

Vos estoz sol Wiccionaire walon

on spepieus motî do lingaedje walon del grande waibe "Wiktionary"

Il a stî adjinçné tot fjhant rcopyî, pa des binamés robots, li "pordjet motî" k' esteut dedja so l' Eciclopedeye Wikipedia e walon. Tos les djivions (mots-intrêyes) ont stî rmetous drocial, mins totes les pådjes n' ont nén stî rcopeyes, veyanmint ki ci n' est nén l' minme etcherpetaedje. Did la, les årtikes ki revoyèt co al pådje do Wikipedia.

Li "pordjet motî" do Wikipedia walon aveut stî enondé å cmincî di l' "Esplicant motî do walon" del waibe "l' Aberteke", askepieye pa Lucyin Mahin et manaedjeye tecnicmint pa Pablo Sarachaga.

Mins, a fwait ki l' Wiccionaire vaici tchereye, gn a des intrêyes ki n' estént nén co dins ces deus sourdants la.

Dispu fén 2017, gn a yeu on cråne rassonraedje des modeles, gråce a l' ovraedje da Julien Casters, on fén cnoxheu des waibes Wikipedia. Gn a eto des årtikes ki vnèt direk do DTW u ki sont-st ahivés eshonne so les deus sourdants.

Nos estans li vénrdi 13 di decimbe 2019 eyet, pol moumint, li Wiccionaire walon est crås di 22 266 årtikes .

Mins, si vos vloz, vos ploz recråxhî vos-minme nosse Wiccionaire avou des noveas mots. Alez s' vey sol pådje d' aidance, droci. Po les modeles, gn a ene pådje d' aidance tote seule. Come gn a toplin des rcandjmints d' modeles pol moumint, li pus simpe, c' est d' prinde on mot ki rshonne å ci ki vos vloz radjouter, et k' a stî rapontyî lanawaire (vos veyoz ça dins l' sorpådje «istwere»), eyet l' ricopyî so vosse novele pådje, tot rcandjant çou k' i fåt.

Come di djusse, les mwaissès intrêyes, les esplikêyes et les fråzes d' egzimpe seront scrîtes e rfondou walon.

Sacwants sourdants (motîs diyalectolodjikes do walon)

Po les mots raspepyîs pår, vos cmincîz pa l' etimolodjeye, å pus sovint bén astokêye so les ovraedjes des grands linwincieus.

Adonpwis, li prononçaedje e l' Alfabet Fonetike Eternåcionå. On dene aprume les prononçaedjes divins sacwants coines del Walonreye. Pu on «prononçaedje zero-cnoxheu» po des cis (cenes) ki cminçrént l' walon sins atnance aviè on metou viyaedje ou ene metowe veye do cotoû. Ci sereut clapant si vos pôrît î mete on prononçaedje do mot, soeyti li «standård» (loukîz, metans a «rôzî», soeye-t i on coinrece (n a-st èn egzimpe a «ouxh»).

Shuvèt les mwaissès esplikêyes sol croejhete et l' sinsyince. On î mete foirt voltî des fråzes d' egzimpe, vinant des motîs sourdants, ou di scrijhaedjes e walon, eplaidîs u nén. Loukîz èn årtike rapontyî enawaire po vir kimint k' on prezinte ces fråzes la del meyeuse manire.

Après çoula, n a co l' parintaedje, les mots d' aplacaedje, les piron-pareys, les omofones possibes, li rlomêye do mot, li spårdaedje do mot e 20inme sieke.

Divant d' cwiter, vos åroz eto, dins on hagnon «Ortografeye», les scrijhas k' on pout ddja trover dins les motîs walons, soeye-t i e rfondou (di 1992 a asteure), e «sistinme Feller» (dispu li cmince do 20inme sieke), ezès sistinmes di dvant Feller (do 16inme sieke a mitan do 20inme) eyet minme, e li scrîta (divant 1600).

Po shuve, li tåvlea des ratournaedje do mot dins sacwants ôtes lingaedjes.

Mins, pus lon k' on simpe motî, li Wiccionaire prezinte eto, so ene pådje tote seule, des spots et des dijhêyes. Loukîz so les categoreyes «spots do walon» et «dijhêyes do walon».

N a-st ossu des pådjes di sinonimeye (asteure, ele atakèt pa «Motyince:».

Sacwants mots sont-st ossu prezintés e scrijha Feller, copurade les ptits mots ki li rfondowe est pår diferinne. Loukîz al categoreye fwaite esprès por zels.

Co åk d' ewaerant, wai : n a ossu des intrêye avou des mots nén walons, esplikés e walon. Des "grandès langues" come li

francès, li neyerlandès, l' inglès, l' almand, l' espagnol. Åy, mins eto des mancîs lingaedjes come li picård, li gåmès, l' arabe marokin, li berbere et hay vos nd åroz.