Tuisblad

Welkom by Wikipedia, die vrye ensiklopedie wat deur enigeen verbeter en uitgebrei kan word.	Dinsdag, 10 Desember 2019 Hier is tans 86 926 artikels in Afrikaans.
Help ons om ’n Afrikaanse wêreldklas-ensiklopedie te skep.

Inleiding • Hulp • Kontak

Gebruikersportaal • Voorbladartikels • Kategorieë • Stel ’n vraag

Voorbladartikel

Die Rugbywêreldbeker 2015 het vanaf 18 September tot en met 31 Oktober 2015 in Engeland en Wallis plaasgevind. Dit was die agtste rugbywêreldbeker van die vierjaarlikse rugbywêreldkampioenskap wat deur Wêreldrugby aangebied word en die vierde in die Noordelike Halfrond. Engeland het voorheen tydens die Rugbywêreldbeker 1991 en Rugbywêreldbeker 1999 as medegasheer opgetree; albei toernooie is saam met die destydse Vyfnasies Frankryk, Ierland, Skotland en Wallis aangebied.

20 nasionale rugbyspanne het aan die Rugbywêreldbeker 2015 deelgeneem, waartydens 48 wedstryde beslis is. Die spanne is in vier poele van vyf spanne elk verdeel, waarvan elke span een keer teen al die ander spanne van die poel gespeel het. Die boonste twee spanne van elke poel het hierna vir die kwarteindrondte gekwalifiseer. Die drie beste spanne van elke poel het outomaties vir die volgende Rugbywêreldbeker 2019 in Japan gekwalifiseer.

In die eindstryd op Twickenham in Londen het die verdedigende kampioen Nieu-Seeland Australië met 34–17 geklop om die derde keer in die geskiedenis die Webb Ellis-beker ophoog te hou. Nieu-Seeland het sodoende die eerste nasionale rugbyspan geword wat die beker kon verdedig. Daarbenewens was dit die tweede eindwedstryd in dié toernooi se geskiedenis wat twee spanne van die Suidelike Halfrond gesien het, ná die Rugbywêreldbeker 1995 in Suid-Afrika, en die eerste halfeindrondte sonder spanne van die Noordelike Halfrond. Suid-Afrika eindig in die derde en Argentinië in die vierde plek. Namibië is ná vier nederlae reeds in die poelfase uitgeskakel. Vir die eerste keer in dié toernooi se geskiedenis was daar geen debutante nie.

Die wedstryd tussen Japan en Suid-Afrika tydens die openingsnaweek, waarin Japan die beslissende drie in ekstra tyd teen die gunsteling Suid-Afrika kon druk, word algemeen as die "grootste ontsteltenis" in die rugbygeskiedenis beskou. Vervolgens het dié toernooi van die begin af baie media-aandag geniet. Die gasheer Engeland is ná nederlae teen Wallis en Australië reeds in die poelfase uitgeskakel; dit was die eerste keer in die toernooi se geskiedenis wat ’n enkelgasheer nie tot die uitklopfase kon voerder nie. Daarbenewens was Japan, as gevolg van minder bonuspunte, die eerste span met drie oorwinnings wat nie tot die kwarteindrondte kon vorder nie.

...lees verder

In die nuus

Die ergste vloed in meer as vyftig jaar eis twee menselewens in Venesië en berokken onherstelbare skade aan historiese monumente, insluitende die Basiliek van San Marco en dele van die operahuis La Fenice.
Lewis Hamilton palm sy sesde wêreldkampioenskapstitel in die 19de rondte van die Formule Een-seisoen in en oortref Juan Manuel Fangio se vorige rekord van vyf titels. Net Michael Schumacher het met sewe titels een meer.
Die Amerikaanse tegnologiereus Apple Inc. stel $2,5 miljard beskikbaar om Kalifornië se behuisingskrisis te verlig.
Die Amerikaanse graderingsagentskap Moody's verander Suid-Afrika se uitsig van "stabiel" na "negatief", maar gradeer dié land nie af nie.
Met Sophie Wilmès het België vir die eerste keer 'n vrou as eerste minister.

Het u geweet...

...dat daar een vlag is wat nooit gesalueer of gestryk word nie? Op 20 Julie 1969 het Neil Armstrong en Buzz Aldrin 'n Amerikaanse vlag op die maan geplant wat tot vandag toe nog daar staan.

...dat varke uiters intelligente diere is? Hulle is ook skoner as die meeste troeteldiere en lê slegs in modder omdat hulle nie sweetkliere het nie en modder of water nodig het om af te koel.

Vandag in die geskiedenis

10 Desember: Grondwetdag in Thailand (1932)

1817 – Mississippi word die 20ste deelstaat van die Verenigde State.
1901 – Die eerste Nobelpryse word toegeken op die herdenking van die 1896-sterfte van Sweedse chemikus en nyweraar Alfred Nobel.
1936 – Edward VIII, die enigste Britse monarg om vrywillig die troon op te gee, teken sy abdikasie.
1948 – Die Verenigde Nasies se Algemene Vergadering neem die Universele menseregteverklaring aan.
1984 – Suid-Afrika se biskop Desmond Tutu ontvang die Nobelprys vir vrede vir sy aandeel in die stryd teen Apartheid.

Voorbladbeeld

Die 15de-eeuse Vinlandkaart is die oudste bekende kaart wat ’n Noord-Amerikaanse kuslyn toon. Sy egtheid word egter in twyfel getrek, hoewel die teendeel tot dusver ook nie bewys kon word nie.