Eventi +/-
en historio
dum oktobro
50, 100 e 150 yari ante nun …
11 di oktobro 1969. Soyuz 6, spaconavo di USSR, esis lancata; ol portis du homi. Soyuz 7, kun tri homi, lancesis ye 12 di oktobro, e Soyuz 8, portanta du homi, ye 13 di oktobro. La intenco esis ke la membri di Soyuz 6 fotografez la kon-junto di la altra du spaconavi; quankam oli povis kunvenar en orbito, la manovro, malgre plura esforci, ne esis sucesoza.
7 di oktobro 1919. La Nederlandana komercala kompanio Koninklijke Luchtvaart Maatschappij ("Rejala Aviaco-kompanio"), o KLM, fondesis. Ol esas la maxim olda aviacala kompanio, ankore aganta sub la originala nomo, en la mondo. La fondo sequis aviaco-expozo en Amsterdam en 1919, qua esis sucesoza ed iniciis komercala intereso pri establisar Nederlandana aviaco-kompanio. La unesma flugo di KLM eventis ye 17 di mayo 1920, de la aeroportuo di Croydon en London, ad Amsterdam.
11 di oktobro 1869. En nuntempa Manitoba en Nord-Amerika, la Rebeleso di la Reda Fluvio komencis. La Kolonio di la Reda Fluvio esis en granda regiono posedata da kompanio Hudson's Bay; la populo esis indijeni e le Métis, di qui la ancestri esis mixuro de indijena, Franca, Skota ed Angla. La negociadi esis procedanta por transferar posedeso a Kanada, e la kolonio esis inspektata da Kanadana ministro. Louis Riel esis chefo di grupo de le Métis, qua disruptis ca ago ye 11 di oktobro, e ye 8 di decembro il deklaris la provizora guvernado di la kolonio.