Як мы ўжо раней пісалі, на конкурс дызайнаў было даслана вельмі шмат працаў. З іх журы абрала 10 найлепшых работ. І, як ні дзіўна, у шорт-ліст трапіла багата звяроў! Шэсць з дзесяці прынтоў былі на жывёльную тэматыку: буслы, зубр, бабёр і нават рыбы. А перамог у "народнай" галасаванцы архаічны лось!
Мы вырашылі пагаварыць з яго стваральніцай Аленай Макаравай, калі яна завітала да нас на офіс, пра тое, чаму вырашыла ўзяць удзел у нашым конкурсе і што яе натхняе на стварэнне такіх малюнкаў.
Алена Макарава
Алена вельмі любіць сваю краіну і яе гісторыю і прафесійна займаецца стварэннем керамічных вырабаў. У яе нават ёсць цэлая серыя талерак з быкамі, ласямі, аленямі ды іншымі жывёламі. Ствараць гэтую серыю яна пачала яшчэ ўзімку. Цікава, што натхненне мастачкі залежыць ад надвор’я. “Ваш конкурс стаў тым стымулам, які падштурхнуў мяне да стварэння прынта!” – кажа яна пра матывацыю.
Чаму менавіта Лось? Бо Алене вельмі падабаецца некранутая прырода і архаіка. “Неяк былі ў паходзе пад Крупкамі, зайшлі на старажытныя могілкі і былі ўражаныя камянямі і валунамі, якія там пабачылі. А найбольш распаўсюджаныя пертрогліфы (першабытныя выявы на камянях) – гэта алені, ласі і казулі. Так і з’явілася ідэя”, – распавядае мастачка.
Алена адзначыла, што ёй вельмі прыемна, што людзі ўпадабалі яе прынт, які неўзабаве з’явіцца на нашых цішотках і пойдзе ў продаж.