Eventi +/-
en historio
dum aprilo
50, 100 e 200 yari ante nun …
22 di aprilo 1969. La Angla maristo Robin Knox-Johnston, en batelo Suhaili, arivis en Falmouth, Anglia, e tale kompletigis cirkumnavigado di la Tero, sole e sen pauzo; il esis la unesma qua facis lo. Il komencis la voyajo ye 4 di junio 1968, kom partoprenanto di konkurso organizita da Britana jurnalo The Sunday Times. Il esis la unika, de non konkursanti, qua kompletigis la voyajo.
6 di aprilo 1919. En München, la Soviet-Republiko di Bavaria esis deklarata. To sequis periodo di anarkio en la stato depos la asasino en februaro 1919 di Kurt Eisner, ministro-prezidanto di Bavaria de novembro 1918. La prezidanto di la Soviet-Republiko esis dramatisto Ernst Toller, qua selektis des-apta personi kom membri di la guvernerio; ye 12 di aprilo la Komunista partiso, duktita da Eugen Leviné, prenis povo. La republiko esis vinkata ye 3 di mayo, da armeo di Johannes Hoffmann, chefo en Bamberg di rivala guvernerio en Bavaria.
18 di aprilo 1819. En Spalato (nuntempa Split) en Dalmatia, la kompozisto Franz von Suppé naskis. Ilua patro esis stat-oficisto di la Austriana Imperio. Dum yuneso il recevis muzikala edukeso en Zara (nuntempa Zadar), e pose en Cremona. Il iris a Wien ube il direktis orkestri di opero-teatri; il anke kompozis por la teatri. Dum la vivo il produktis cirkume 30 lejera operi, ed anke multa plusa teatraji. Il nuntempe esas konocata nur pro uverturi di kelka operi, inkluzante Dichter und Bauer (Poeto e Rurano) e Leichte Kavallerie (Lejera Kavalrio).
-blank.svg){kind=spacer}
