Antaŭ unu semajno je la jarŝanĝo aperis la decembra (vintra laŭ la nordhemisfera vidpunkto) eldono de la ĉiusezona bitgazeto La Ondo de Esperanto (2023, №318). Ĝi estas preskaŭ rekorde ampleksa – 144-paĝa. Entute, dum 2023 aperis kvar Ondoj kun sume 572 paĝoj (139 + 148 + 141 + 144 paĝoj), je 48 paĝoj pli multe ol en la “rekorde dika” jarkolekto por 2022 (524 paĝoj). Kvankam la redakcio ĉiujare promesas 100-120 paĝojn ĉiusezone, do 400-480 paĝojn jare, sed ĉiam aperas multe pli. Sur la decembraj paĝoj (legeblaj laŭ la normoj “pdf” kaj “ePub”) estas pli ol sepdek tekst(et)oj kaj multaj ilustraĵoj.
Kiel kutime ĉe la jarŝanĝo, en La Ondo de Esperanto informoj pri la Esperantisto de la Jaro. Ĉi tiun honoran titolon en 2023 ricevis Sun Mingxiao, konata en Esperantujo kiel Semio. En la sekcio “Temo” oni povas konatiĝi kun la detaloj de ĉi-jara elekto kaj legi la intervjuon kun Semio, kiun aranĝis Paweł Fischer-Kotowski.
Rekorde ampleksa estas la primovada sekcio “Eventoj”. Sur ĝiaj 48 paĝoj estas publikigitaj 39 artikol(et)oj pri esperantista aktivado en la mondo. Nature, en la decembra eldono plej multas artikoloj pri Zamenhof-festaj kunvenoj kaj renkontiĝoj, entute 11 tekstoj, interalie el Berlino, Budapeŝto, Kaŭno, Londono, Montrealo, Taiyuan, Tjumeno kaj el aliaj urboj. Abundas ankaŭ raportoj pri aliaj kongresoj, rekontiĝoj kaj aliaj kunvenoj, inkluzive de la plej ampleksa evento de la jaro, organizita de esperantistoj, kaj temas ne pri UK aŭ IJK, sed pri la 17a Moskva Lingva Festivalo kun ĉirkaŭ 1700 registritaj vizitintoj.
La Pollanda Poŝto emisiis novan poŝtmarkon kun valoro de 3,90 zlotoj (PLN). Ĝi estas la unua Pollanda poŝtmarko rilata al la lingvo Esperanto, aperinta post 1987. La poŝtmarko estis eldonita okaze de la datrevena renkontiĝo de Esperantistoj GRUPE 2023, okazinta en Gliwice.
Libere elŝuteblas la n-ro 1/2024 de la revuo Esperanto: 
Hodiaŭ, la 5an de januaro 2024 ĉe Vinilkosmo aperis nova albumo de Jonny M. Ĝia titolo estas Jonny M – Petolas. Dek du kantoj atendas la aŭskultantojn en ĉi tiu freŝnova verko en konata rege-repa maniero, sed ĉi-foje aldoniĝas sudamerikaj sonoj.
Honore al la eksa prezidanto de UEA Grégoire Maertens, kiu iĝis 100-jara la 1an de januaro 2024 kaj kiu rolis kiel prezidanto dum la jaroj 1980-1986, estas starigita la premio Grégoire Maertens, aljuĝota ĉiujare al organizaĵo aŭ esperantisto, kiu aparte kontribuis aŭ kontribuas al la progreso de la movado por Esperanto kaj rilataj demandoj. La ĵurio de la premio konsistas el la eksaj prezidantoj de UEA, kiuj pretas servi por tio. Jam konsentis partopreni ĉiuj vivantaj eksprezidantoj: Renato Corsetti, Probal Dasgupta, Mark Fettes, Humphrey Tonkin kaj John Wells. La ĵurio aperigos gvidliniojn pri la proceduro por prezenti proponojn kaj pri la maniero anonci la gajninton ĉiujare.
“UEA estas nia, UEA estas ni”. Tiel diras la kanto de Joel Muhire pri Universala Esperanto-Asocio (UEA), speciale kreita por la fermo de la 4a Virtuala Kongreso de Esperanto (VK) kaj spektebla de ĉiuj ekde la 1a de januaro 2024 en UEAviva: 
Ĥristo Gorov (Ĥrima) estis unu el la plej elstaraj bulgaraj esperantistoj, talenta Esperanta verkisto, poeto, tradukisto kaj publicisto. Bulgara Esperanto-Asocio anoncas omaĝe al li Internacian Esperantan Literaturan Konkurson. En la konkurso povas partopreni geesperantistoj el ĉiuj landoj.
