1. Antaŭ 115 jaroj mortis Marie Léonce Vallienne (1854-1902-1908), franca kuracisto, poeto kaj esperantisto, en Esperanto ofte misnomata Henri Vallienne; aŭtoro de la pioniraj Esperanto-romanoj Kastelo de Prelongo (1907) kaj Ĉu li? (1908), tradukinto de Eneido kaj de aliaj verkoj, kunfondinto (kun Ch. Verax) de Internacia Revuo Medicina (1906), kunfondinto kaj la unua vicprezidanto de Tutmonda Esperantista Kuracista Asocio (1908).
• Legu pli en la enciklopedio Nia Diligenta Kolegaro (p. 290-291).
La 25an de novembro la Estraro de UEA kaj la Ĝenerala Direktoro havis la ĝojon virtuale renkontiĝi kun partoprenantoj de la VK, prezenti sin, mallonge rakontis pri siaj taskoj kaj zorgoj. Kaj certe, respondi la demandojn.
La trian jaron sinsekve la Akademio de Esperanto organizos konferencon okaze de la Zamenhof-festo. Ĝi okazos la 14-15an de decembro 2023. Dum la virtuala konferenco (per Zoom) estos prezentitaj naŭ 20-minutaj prelegoj de akademianoj pri la agado de la Akademio de Esperanto kaj la agado de akademianoj.
La Premio Grabowski estis iniciatita en 1982 pere de estigo de Fondaĵo Antoni Grabowski (FAG). Tio okazis danke al kontrakto de UEA kun la mecenato Adam Goralski (1912–2005), kiu dumvive helpis la administradon de FAG. La unua premiado okazis en 1984. La premio kaj la fondaĵo, portantaj la nomon de “la patro de la Esperanta poezio”, Antoni Grabowski, celas subteni la Esperantan kulturon. La regularo por disdono de la premioj kaj subvencioj pere de FAG estis novformulita en 2017. La ĵurio de FAG, kiu aljuĝas premiojn averaĝe ĉiun duan aŭ trian jaron, nuntempe konsistas el Jesper Lykke Jacobsen, István Ertl kaj Mariana Evlogieva.
«Post la malkovro de ĝiaj stimulaj ecoj en Abisenio (nun Etiopio), kafo fariĝis universala trinkaĵo, kaj ĝia preparado estis la temo de du enskribiĝoj en la Listo de Nemateriaj Kulturaj Heredaĵoj de UNESKO. “Kafdomoj” plimultiĝis unue en la Proksima Oriento, poste en la Otomana Imperio, antaŭ atingo de Eŭropo, Ameriko kaj nun Azio, formante kulturon kaj vivmanieron. Ekzistas certa nedifinebla plezuro, kiu venas kun la etoso de la loko, la libereco de momento for de ĉiutagaj devoj, kaj la renkontoj kiuj okazas tie. Fenestroj al la mondo, kafejoj estas invito al vojaĝo», – skribis Agnès Bardon, la ĉefredaktoro de Unesko-Kuriero, en la ĉefartikolo de la dua ĉi-jara kajero (aprilo-junio 2023).
En 2023 en la KER-ekzamenoj de UEA sukcesis 104 ekzameniĝintoj el 31 landoj, inklude Aŭstralion kaj Afrikon. La ekzamenoj okazis parte ĉeeste, parte rete, en ĉiuj niveloj de nia KER-sistemo de B1 ĝis C2. Fine de la jaro ni povas fieri pri 2754 KER-atestiloj en 82 landoj.
Ĉiun duan jaron, Unesko kunvokas dusemajnan Ĝeneralan Konferencon en novembro (ĉi-jare: la 7-22an de novembro), kaj dum la unua semajno dudeko da horoj estas dediĉitaj al la “debato pri ĝenerala politiko”: antaŭ la pleno rajtas paroli po ses minutojn ĉiuj membroŝtatoj kaj po tri minutojn la NeRegistaraj Organizoj, kiuj petas tion kaj estas akceptitaj. Praktike 84% el la ŝtatoj alparolis, kaj ĉirkaŭ 8% el la organizoj, sed UEA ĉiam profitas la okazon. Nur lastminute ni estas avertitaj pri la limdato por proponi tekston kaj la dato de la alparolo, ĉar la decidoj okazas dum la Ĝenerala Konferenco mem, sed tiuj ĉi datoj estas antaŭvideblaj. Ĉi-jare, la alparolo okazis sabaton la 11an de novembro matene kaj la franclingvan tekston legis François Lo Jacomo, ĉefreprezentanto ĉe Unesko kaj estrarano de UEA. Kiel ĉiuj aliaj alparoloj, ĝi estas spektebla per la retejo de Unesko: 
Se vi ne partoprenis en la Novjara Renkontiĝo en Wiesbaden, kaj ne aŭdis kiel Eduard Werner prezentis Esperanto-fonajn rakontojn La ralofalo (en 2019) kaj Drako en Esperantujo (en 2022), legu la tekstojn en ĉi tiu BA, prefere voĉe kaj eĉ antaŭ viaj samklubanoj por rekrei la etoson.
