Eventi +/-
en historio
dum julio
50, 100 e 200 yari ante nun …
16 di julio 1969. Apollo 11, la unesma expediciono en qua homi pozis pedi sur la luno, komencis kande la spaco-navo lansesis, portanta Neil Armstrong, Buzz Aldrin e Michael Collins. Dum ke Collins esis en orbito cirkum la luno, Armstrong ed Aldrin atingis la surfaco di la satelito ye 20 di julio. Sis e duima hori pos arivo, Armstrong facis pazo adsur la surfaco, dicante, "To esas un mikra pazo por homo, un giganta salto por homaro."
22 di julio 1919. En London, la baleto El sombrero de tres picos (La tri-angula chapelo) esis unesmafoye pleata. La Hispana kompozisto Manuel de Falla skribis la muziko; ol esis ri-skribita versiono di lua pantomimala baleto El corregidor y la molinera (La judiciisto e la spozino di la muelisto), pleata en 1917. Sergei Diagilev, la Rusa impresario di baleto, vidis ta baleto e komisis de Falla kompozar ca versiono, por plu granda orkestro. La ceni e kostumi esis kreata da Pablo Picasso. La fonto di la rakonto esis la romano El sombrero de tres picos da Pedro Antonio de Alarcón, lokizata en vilajo en Andaluzia.
1 di julio 1819. La kometo nomizita la Granda Kometo di 1819 esis unesmafoye vidata, da fizikisto Johann Georg Tralles, e ye la sequanta nokto da astronomo Johann Elert Bode (ambe en Berlin). Ol esis videbla sen teleskopo til la fino di agosto 1819; la lasta observado eventis ye 25 di oktobro. Ol esis la unesma kometo analizata per polarimetro: astronomo François Arago trovis ke lumo de la kaudo esis polarigata, quo indikis ke kelka lumo de la kaudo esis reflektata de la suno.
-blank.svg){kind=spacer}
