Eventi +/-
en historio
dum mayo
50, 100 e 150 yari ante nun …
16 di mayo 1969. Venera 5, kosmosondilo di USSR lansita ye 5 di januaro, atingis la surfaco di Venuso. Ol similesis Venera 4, qua arivis en Venuso en oktobro 1967; tamen, la parafalo esis plu mikra, por ke la sondilo falus plu rapide tra la atmosfero, ed atingus basa nivelo ante ke la sondilo esus aplastita da la atmosfero. Ol prenis mezuri dum 53 minuti ante ceso di transmiso ye alteso cirkume 26 km: informeso recevesis pri temperaturo, preso e kompozuro di la atmosfero. Identa sondilo Venera 6 arivis ye Venuso ye la sequanta dio, ed anke mezuris lua atmosfero.
29 di mayo 1919. Sur la insulo Principe, proxim la westa marbordo di Afrika, la Angla fizikisto Arthur Eddington observis sunala eklipso, e fotografis steli en la regiono cirkum la suno. La pozicioni di la steli esis mikrete alterata de lia kustumala pozicioni, quale predicata da Albert Einstein en la Generala Teorio di Relativeso, di 1915: la lumo-radii esis kurvigata pro la graviteso di la suno. Ca konfirmado, montranta ke la teorio di Isaac Newton pri graviteso, publikigita en 1687, esis remplasigata, augmentis la famo di Einstein.
10 di mayo 1869. En Usa, la Unesma Transkontinentala Fervoyo esis apertata: ye Promontory Summit en Utah, Leland Stanford, prezidanto di un de la tri kompanii qui konstruktis la fervoyo, ceremoniale pulsis orea klovo per arjenta martelo. La longeso di la fervoyo esis 3077 km, de Omaha, Nebraska, ube ol esis konektata kun la existanta estala fervoyala reto, a San Francisco. Ol faciligis la movado di personi e komercaji inter la marbordi di Usa, e revolucionis la ekonomiala stando di la frontierala stati.
-blank.svg){kind=spacer}
