Eventi +/-
en historio
dum februaro
50, 100 e 150 yari ante nun …
8 di februaro 1969. Granda meteoro falis vers Tero. Ye 01:05, proxim la vilajo Pueblito de Allende en norda Mexikia, granda fairo-bulo advenis de la sud-westo; pro la rezisto di l'atmosfero, ol explozis en l'aero aden plura mil peci, qui falis adsur granda areo, proxime 8 km per 50 km. Plura cent fragmenti trovesis kurte pose, e pos 25 yari cirkume 2 tuni esis kolektita. Ciencisti, ja pronta por studiar petri de la venonta Apollo-expedicioni a la Luno, balde studiis specimeni. La meteoro, nomizita "Allende", esis plu olda kam Tero, formacita de polvo e gaso frue dum la kreo di la sunala sistemo.
5 di februaro 1919. En Usa, la filmo-kompanio "United Artists" esis fondata, da Douglas Fairbanks, Mary Pickford, Charlie Chaplin e D. W. Griffith. La skopo esis ke aktori povus plu bone direktar sua interesi, vice dependar de komercala studieyi, qui regulizis salarii di aktori e facis kreiva decidi. Dum ke l'industrio pri filmi evolucionis en sequanta yari, "United Artists" adaptis su.
18 di februaro 1869. En Leipzig, la finala versiono, en sep movimenti, di Ein deutsches Requiem, da Johannes Brahms esis unesmafoye pleata. Brahms komencis skribar la verko en 1865, pos la morto di ilua matro. La texto esis asemblita da Brahms, de la Germana tradukuro di la Biblo da Martin Luther. Versiono di la Requiem, en sis movimenti, esis kompleta en 1866, ed en Aprilo 1868 ol esis pleata en la katedralo di Bremen, kun granda suceso. Brahms kompozis plusa movimento en mayo 1868.
-blank.svg){kind=spacer}
