Inuit Ataqatigiit nunarput aningaasarsiornikkut naalakkersuinikkullu namminersortoq anguniagaraat. Nunarput inuiaqatigiillu ineriartortinneqassapput sutigut tamatigut kingunissalimmik ingerlatseriaaseqarluni. Inuiaqatigiit ataatsimut naleqalersitaat innuttaaqataasunut ataatsimoortunik iluaqutissanngortinneqartassapput. Naalakkersuinikkut sulinermi naligiinneq, akaareqatigiinneq kaammattueqatigiinnerlu aallaviussapput.
Nunatta oqaluttuarisaanerani ukiut aqqusaakkavut alloriarfiussapput inuiaqatigiittut nutarteqqinnissatsinnut, pingaartumik aningaasarsiornikkut inuiaqatigiit nappatigisaat ineriartortinneqarlutillu nutaaliorfigineqassapput immitsinnut napatinnerulernissarput siunertaralugu. Aningaasarsiornikkut ineriartortitsineq ingerlanneqassaaq pinngortitaq mianeralugu, nunatsinni pissarsiassagut qulakkeerlugit, sulisut pisinnaatitaaffeqarnerat ataqqillugu siunissamullu ungasissumut isigaluta.
Ineriartorneq piumasaqarpoq naalakkersuinikkut patajaatsumik ingerlatsinissamik, aalajangiisinnaassuseqarnermik minnerunngitsumillu aalajangiiniarnermi tutsuiginartunik tunngaveqarnissamik.
Ukiuni kingullerni Inuit Ataqatigiit nunatsinni naalakkersuinikkut siuuttuuneranni nunarsuarput tamakkerlugu pissutsit allanngoriartupiloorput. Taamatut sukkatigisumik annertutigisumillu allangoriartornerup nalaani naalakkersuinikkut ingerlatsionermi tatiginassuseqarneq, siunertanik attassisinnaaneq suleqateqarsinnaanerlu pingaaruteqarluinnarput piginnaaneqarfigissallugit pisariaqarluinnarpoq. Inuit Ataqatigiit tamatuminnga qulakkeerisuupput.
Sara Olsvig, Siulittaasoq