Si Cleopatra Filopator Nea Thea, Cleopatra VII (sa Griniyego, Κλεοπάτρα Φιλοπάτωρ; Enero 69 BK – 30 BK) usa ka Helenistikong rayna sa Ehipto, nakigsalo siya'g pamunoan sa iyang amahan nga si Ptolomeo XII ug kadayonan uban sa iyang kaigsoonan/kabanahan nga silang Ptolomeo XIII ug Ptolomeo XIV; nahimong nag-inusarang harang sa Ehipto. Isip paraon (pharaoh), siya nakig-uban kang Gaius Julius Caesar nga mipalig-on sa iyang paggunit sa trono, ug pagkahuman sa pagpatay ni Caesar nakigkauban siya kang Marco Antonio, nga nakaanak kaniya og kaloha. Sa kinatibuk-an, usa ka anak gikan kang Caesar (si Caesarin) ug tulo gikan kang Antonio (silang Cleopatra Selene II, Alexander Helios, ug Ptolemy Philadelphus). Ang iyang paglingkod sa trono nagpahuman sa Panahong Helenistiko ug ang sinugdanan sa Panahong Romano sa sidlakang Mediteranyo. Siya ang kataposan sa mga paraon sa Karaang Ehipto. Human nalupig si Antonio ug Cleopatra sa Actium sa karibal ug legal nga eredero ni Caesar, si Gaius Julius Caesar Octavian (ang nahimong unang emperador sa Roma, Augustus), nagpakamatay si Cleopatra, ang tradisyonal nga petsa mao ang Agosto 12 30 BK, pinaagi sa paak sa usa ka matang sa bitin. Hangtod karon, popular si Cleopatra sa kulturang Kasadpanon. Ang iyang legasiya milungtad sa lainlaing obra sa arte ug dramatisasyon sa iyang kaagi sa literatura (ang kang Shakespeare nga Antony and Cleopatra ug ang kang George Bernard Shaw nga Caesar and Cleopatra), pelikula, ug telebisyon. (sama sa depiksyon ni Elizabeth Taylor kang Cleopatra). Kasagaran, gihulagway si Cleopatra isip usa ka bantogan sa katahom ug kaanyag...