Siria

اجمهوريّة العربيّة السّوريّة Al-umhūriyya al-Arabiyya as-Sūriyya República Árabe Siria
Bandera de Siria Escudu de Siria
Lema nacional: nun tien
Himnu nacional: Homat el Diyar
Capital  • Población  • Coordenaes	Damascu 2 035 000 hab. [1]
Ciudá más poblada	Damascu
Llingües oficiales	árabe, araméu
Llingües reconocíes	{{{idiomes_reconocíos}}}
Forma de gobiernu Presidente	República autoritaria Baxar al-Asad
Independencia • Fecha	de la Sociedá de Naciones 17 d'abril de 1946
Superficie  • Total  • % agua Llendes Costes	Puestu 86º 185 180 km² km² 0.06 % 2 253 km 193 km
Población  • Total  • Densidá	Puestu 55º 18 448 752 99.6 hab/km²
PIB (PPA)  • Total ([[{{{PIB_añu}}}]])  • PIB per capita	Puestu {{{PIB_puestu}}}º {{{PIB}}} {{{PIB_per_cápita}}}
Moneda	llibra siria
Xentiliciu	siriu, -a, -o
Zona horaria	UTC + 2
Dominiu d'Internet	.sy
Códigu telefónicu	+963
Prefixu radiófonicu	YKA-YKZ
Códigu ISO	760 SYR SY
Miembru de: ONX, Lliga árabe
Sitiu web del Gobiernu: www.egov.sy

Siria ye un país d'Asia, allugáu na oriella oriental del mar Mediterraneu, na fastera conocida como Mediu Oriente. Tien llendes con Israel, El Líbanu, Xordania, Iraq y Turquía.

L'actual estáu siriu ye solo una parte de la Siria histórica, tamién conocida como Gran Siria o Bilad ax-Xam (بلاد الشام n'árabe) y de la que formaben parte territorios qu'anguaño pertenecen a Xordania, El Líbanu y Israel.

Xeografía

Hidrografía

Los principales ríos de Siria son l'Orontes, l'Eufrates col so afluente Khabur y el Tigris, que marca en parte la llende con Turquía. Hai anguaño un contenciosu ente ésti últimu país, Siria y Iraq pola mor del so proyeutu de construcción d'una serie de preses nel Tigris y l'Eufrates que tendríen por consecuencia la mengua del caudal de los dos ríos.

Historia

La Siria antigua

Siria foi'l centru d'una civilización semita de gran importancia, alredor de les ciudaes d'Ebla y Ugarit, onde tuvo llugar el descubrimientu del bronce.

Tierra de pasu, el país conoció na antigûedá les dominaciones socesives de cananeos, hitites, hebreos, asirios, perses, griegos, romanos y bizantinos.

La Siria árabe

A partir del sieglu IV, empezaron a instalase na Siria actual tribus vinientes del sur d'Arabia. La victoria de Yarmuk sobre los bizantinos nel añu 636 permitió a los árabes dominar tol país.

Na dómina de la dinastía Omeya (661-750), de la que foi capital Damascu, Siria conoció una dómina d'esplendor, cola construcción de palacios y mezquites, el desarrollu de les ciencies y les artes y la espansión territorial.

La llegada de la dinastía abasí (750-1258) desplazó'l centru del poder a la nueva capital, Baghdad, y Siria convirtióse nuna más de les provincies del imperiu.

A partir de los sieglos X y XI, les rivalidaes ente árabes y turcos permitieron la instalación de los cruzaos qu'ocuparon la mariña y la fastera norte de Siria.

La constante llucha contra los cristianos, debilitó'l país y facilitó la invasión de los mongoles nel sieglu XIII. La dinastía de los mamelucos exipcianos frenó l'avance de los mongoles y derrotó a los cruzaos en 1291, dominando Siria hasta 1516

La Siria otomana

L'Imperiu otomanu anexonó Siria en 1516 y dividióla en cuatro provincies, (Damascu, Trípoli, Alep y Saida).

Nos cuatro sieglos de presencia otomana, Siria convirtiosé nun centru importante del comerciu mediterraneu. la instalación de comerciantes venecianos, ingleses y franceses, principalmente n'Alep, permitió un averamientu progresivu a la Europa occidental.

El debilitamientu del imperiu otomanu llevó a les intervenciones franceses (en 1799 y 1860) y exipcia (1831).

Na Primer Guerra Mundial, tres la promesa británica de concede-yos la independencia, los sirios enfrentáronse colos turcos y los alemanes.

Pesie a esta promesa, en 1916, británicos y franceses roblaron un tratáu secretu, los alcuerdos Sykes-Picot, pa repartir ente ellos los territorios árabes del imperiu otomanu. Iraq y Palestina correspondieron-yos al Reinu Xuníu, mientres que Francia quedóse cola Siria y el Líbanu actuales.

El mandatu francés

En 1918 les tropes britániques ocuparon Damascu, pero retiráronse al añu siguiente dexando la zona baxo control francés.

En 1920, la Sociedá de Naciones confió a Francia'l mandatu sobre Siria y Líbanu. Sicasí, los nacionalistes árabes nun reconocieron esti mandatu y proclamaron unillateralmente como rei a Fayçal ibn Hussein. Ente 1925 y 1926, Francia hubo de facer frente a la insurreición y bombardió Damascu en dos ocasiones.

Na Segunda Guerra Mundial, les fuercies britániques y de la Francia llibre al mandu del xeneral Catroux espulsaron al representante del gobiernu de Vichy y reconocieron oficialmente la independencia de Siria,que nun se fizo efectiva hasta la fin de la guerra, en 1946.

La república independiente

Tres algamar la independencia Siria participó na primer guerra contra l'estáu d'Israel en 1948.

La derrota del país llevó a una inestabilidá política y una serie de golpes d'estáu militares. La oposición ente les facciones pro-iraquines y pro-exipcies, saldóse en favor de los últimos cola creación de la República Árabe Unificada. Esti estáu, qu'axuntaba Siria al Exiptu de Naser tuvo malapenes cinco años d'esitencia, ente 1958 y 1963.

Dende 1963 el gobiernu ta en manes del Partíu Baas, que, depués d'un primer periodu de moderación, averóse a la XRSS y llevó a cabu política agresiva que desembocó na Guerra de los seis díes contra Israel, de consecuencies catastrófiques pal país.

En 1971 tomó'l poder el xeneral Hafez al-Asad, que trató de romper l'aisllamientu políticu del país con una política esterior más moderada. Sicasí, nel planu interior, instauró un réxime autoritariu y represivu.

En 1973, Siria participó n'otru conflictu bélicu contra Israel, la Guerra de Yom Kippur, na que perdió'l control de los altos del Golán.

Nos últimos trenta años, la política siria tuvo marcada pola pola intervención na guerra civil libanesa a partir de 1975, que llevó a la ocupación de bona parte del país. Tamién rescampla la hostilidá pa con Iraq, contra'l que combatió na Guerra del Golfu en 1991.

En 2000 Baxar al-Asad asocedió a so padre como xefe del Estáu.

L'asesinatu del primer ministru libanés Rafik Hariri en febreru de 2005, del que s'acusó a Siria, provocó una fola de protestes nel país y presiones internacionales, que llevaron a la retirada de les tropes siries n'abril del mesmu añu.

Organización alministrativa

Siria ta dividida en 14 provincies o muhafazat (محافظة , singular muhafazah) que lleven el nome de la capital.

• Al-Hasaka
• Ar Raqqah
• As Suwayda
• Dara
• Dayr az Zawr
• Dimaxq
• Halab
• Hamah
• Hims
• Idlib
• Ladhiqiyah
• Qunaitira
• Rif Dimaxq
• Tartus

Siria reclama como parte del so territoriu nacional la provincia de Hatay, anexonada por Turquía en 1938 y los altos del Golán, ocupaos por Israel tres la Guerra de los seis díes en 1967 y anexonaos definitivamente en 1981.