Economie
![](http://web.archive.org./web/20161226060010im_/https://upload.wikimedia.org/wikipedia/commons/thumb/0/0a/AdamSmith.jpg/240px-AdamSmith.jpg)
La economie e je une sience sociâl che e studie l'insiemit dai fenomens economics, ven a stâi la ativitât economiche des comunitâts umanis cu la produzion, la distribuzion e il consum di bens e di servizis.
I studis di economie a doprin in lunc e in larc sei modei matematics e statistics, sei modei empirics par elaborâ lis lôr teoriis, par descrivi lis realtâts economichis e proviodi il lôr davuelziment.
Problemis centrâi de economie a son cemût rivâ a dâ un valôr just a lis robis e cemût distribuî lis risorsis che a son disponibilis fra diviers mûts alternatîfs di doprâlis.
Tabele dai contignûts
Storie dal pensîr economic[cambie | modifiche il codiç]
Il pensîr economic moderni al nâs tal periodi che al va de fin dal feudalesim a l'inizi de rivoluzion industriâl.
In prin al è il pensîr dai marcjatiliscj a lâ di mode. Par lôr la ricjece e nas dal cumierç e no de produzion. Un stât al à di difindi il cumierç e al à di meti adun plui metai preziôs che al pues.
Une evoluzion indenant si à cui fisiocratics francês e in particolâr cun Quesnay e la sô Tableau Economique. Al nas la idee di soreplui che al ven fûr de produzion e no dal cumierç. Il limit dai fisiocratics al è chel di no vê une teorie dal valôr par cui la uniche ativitât che e fâs des cuantitâts in soreplui e je la agriculture.
La economie moderne e ven tradizionalmentri fate nassi durant la rivoluzion industriâl cu la opare dal prin economist de scuele classiche ven a stâi Adam Smith e cu la sô opare “The Wealth of Nations” (La ricjece des nazions).
Fra i altris economiscj classics a si puedin ricuardâ David Ricardo, John Stuart Mill, Leon Walras e Karl Marx.
Tal secul stât, dopo la grande crisi dal 1929, e je stade fondamentâl la figure di John Maynard Keynes e des sôs teoriis su cemût che il stât al pues sburtâ la economie doprant la spese publiche.
Dai agns ’70 si son davuelzudis lis teoriis monedaristis di Milton Friedman e de scuele di Chicago, che a àn vût tal president american Reagan un sostenidôr.
Dopo la fin de vuere frede e dal comunisim rus si son difondudis lis teoriis neoliberistis che a vegnin dopradis une vore te etât de globalizazion dal dì di vuê.
Dissiplinis economichis[cambie | modifiche il codiç]
- Microeconomie
- Macroeconomie
- Economie politiche
- Politiche economiche
- Economie aziendâl
- Economie bancjarie
- Economie agrarie
- Economie finanziarie
- Economie dal lavôr
- Economie industriâl
- Economie monetarie
- Finance
- Sience des financis
- Econometrie
- Statistiche economiche