Gemini
- Para ver referencias ó signo zodiacal ir a: Xémini
- Para ver referencias ó programa espacial tripulado ir a: programa Gemini
Gemini | |
---|---|
![]() |
|
Nome latino | Gemini |
Abreviatura | Gem |
Xenitivo | Geminorum |
Simboloxía | Os Xemelgos |
Ascensión recta | 7 h |
Declinación | 20° |
Área | 514 graos cadrados
Rango 30º |
Número de estrelas
(magnitude < 3) |
4 |
Estrela máis brillante | Pólux (β Gem)
(magnitude ap. 1.1) |
Choiva de meteoros | |
Constelacións
lindeiras |
|
Visible en latitudes entre +90° e −60°
Mellor visibilidade ás 21:00 (9 p.m.) durante o mes de febreiro |
|
Gemini ou Xemelgos[1] (símbolo , Unicode ♊) é a terceira constelación do zodíaco, e atópase a uns trinta graos ó noroeste de Orión. William Herschel descobreu Urano preto de η Geminorum no 1781, e Clyde Tombaugh fixo o propio con Plutón preto de δ Geminorum.
Índice
Estrelas principais[editar | editar a fonte]
- α Geminorum (Cástor) é a segunda estrela máis brillante da constelación (magnitude visual 1,58). Dase a circunstancia de que Cástor é en realidade un sistema de seis estrelas (sistema estelar múltiple), só visibles con telescopios potentes.
- β Geminorum (Pólux), a estrela máis luminosa da constelación (magnitude 1,16), xigante de cor laranxa a 36 anos luz de nós.
- γ Geminorum (Alhena), a terceira máis brillante con magnitude 1.93, unha binaria espectroscópica formada por unha subxigante branca acompañada dunha anana amarela.
- δ Geminorum (Wasat), sistema binario cunha estrela amarela e outra laranxa, pódese ver este sistema binario cun pequeno telescopio.
- ε Geminorum (Mebsuta), que se atopa na perna dereita de Cástor.
- ζ Geminorum (Mekbuda), estrela variable cunha magnitude que oscila entre 3,7 e 4,2 nun período de dez días.
- η Geminorum (Tejat Prior), sistema estelar onde a estrela principal é unha variable semirregular cunha magnitude oscila entre 3,2 e 3,9.
- μ Geminorum (Tejat Posterior), a cuarta máis brillante con magnitude 2,87, xigante vermella e variable irregular. Interesante para observación visual ou con prismáticos.
- ξ Geminorum (Alzir), de magnitude 3,35, unha subxigante amarela a 57 anos luz.
- σ Geminorum, estrela variable RS Canum Venaticorum.
- 1 Geminorum, sistema estelar múltiple de magnitude 4,15 que marca a posición do solsticio de verán.
- 37 Geminorum, anana amarela idéntica ó Sol que está sendo obxecto de gran interese por si existe vida no seu redor.
- U Geminorum, arquetipo dun tipo de estrela variable, as novas ananas.
- TU Geminorum, estrela de carbono dunha cor vermella intensa.
- HD 59686, xigante laranxa cun planeta ó redor.
- Geminga, pulsar que emite raios gamma e raios X; pensase que poden se-los restos dunha supernova que estourou fai uns 300.000 anos.
Obxectos notables do espazo profundo[editar | editar a fonte]
- Cúmulo aberto M35 ou NGC 2168, facilmente visible con prismáticos: a través de calquera telescopio aparece formado por unha gran cantidade de estrelas de brillo medio.
- Moi preto de M35 e en claro contraste co mesmo, o cúmulo NGC 2158, moito máis antigo e distante.
- Cúmulo aberto NGC 2420, 4º ó leste de Wasat (δ Geminorum).
Ademais en Xémini hai varias nebulosas interesantes, entre as que destacan:
- NGC 2392, Cara de Pallaso ou Nebulosa Esquimó, de magnitude 10 cunha brillante estrela central.
- A pequea nebulosa planetaria NGC 2371.
- Abell 21 ou Nebulosa Medusa, nebulosa planetaria grande e antiga, de 5 arcmin de diámetro.
- IC 443, nebulosa difusa remanente dunha supernova, preto de Tejat Prior (η Geminorum).
Mitoloxía[editar | editar a fonte]
Na mitoloxía grega, os xemelgos son Cástor e Polideuco (Pólux para os romanos). Naceron dun ovo que puso Leda, a raíña de Esparta, despois de copular con Zeus convertido en cisne. Cástor, o mortal, era fillo do rei Tíndaro; o inmortal Polideuco era fillo de Zeus.
Ambos participaron en varias fazañas colectivas: na cacería do xabarín de Calidón e na viaxe dos Argonautas, entre outras.
Os xemelgos tiveron unha disputa cós seus primos Idas e Linceo. Idas asasinou a Cástor cunha lanza, ós que Polideuco, malia as súas feridas, respondeu matando a Linceo. Zeus interveu e matou a Idas. Polideuco rexeitou a súa condición de inmortal se non podía compartila con Cástor. Por isto Zeus colocounos entre as constelacións.
Visualización gráfica[editar | editar a fonte]
As estrelas da constelación de Gemini poden ser conectadas dun xeito alternativo, tal como amosa o gráfico, amosando a dous xemelgos collidos da man.
O xemelgo da dereita é Castor, onde a súa estrela máis brillante é alpha Geminorum (máis comunmente coñecida coma Castor), é de segunda magnitude, e representa a cabeza de Castor. O xemelgo da esquerda é Pollux, a súa estrela máis brillante é beta Geminorum (máis coñecida coma Pollux), é de primeira magnitude, e representa a cabeza de Pollux.
O torso de Pollux é representado pola estrela upsilon Geminorum, a man dereita de Pollux é representada por iota Geminorum, e a man esquerda por kappa Geminorum: as tres estrelas de cuarta magnitude.
A pelve de Pollux é a estrela delta Geminorum, o xeonllo dereito de Pollux é zeta Geminorum, e o pé dereito é gamma Geminorum, o xeonllo esquerdo de Pollux está representado pola estrela lambda Geminorum, e o pé por xi Geminorum. Gamma Geminorum é de segunda magnitude, delta e xi Geminorum son de terceira.
O torso de Castor está representado pola estrela tau Geminorum, a man esquerda por iota Geminorum (que é compartida con Pollux), e a man dereita é theta Geminorum: as tres estrelas son de cuarta magnitude.
A pelve de Castor está representada pola estrela epsilon Geminorum, o pé esquerdo por nu Geminorum, e o pé dereito por mu Geminorum e eta Geminorum: epsilon, mu, e eta Geminorum son de cuarta magnitude.
Notas[editar | editar a fonte]
- ↑ Cambados Márquez, Xoaquín Evaristo. "Algunhas notas referentes ó nome galego estándar das constelacións" (PDF). Consultado o 12 de outubro de 2016.
Véxase tamén[editar | editar a fonte]
Outros artigos[editar | editar a fonte]
Ligazóns externas[editar | editar a fonte]
- The Deep Photographic Guide to the Constellations: Gemini (en inglés)
- The clickable Gemini (en inglés)
- WIKISKY.ORG: Gemini constellation (en inglés)
- Star Tales – Gemini (en inglés)
As 88 constelacións modernas |
Andrómeda · Antlia · Apus · Aquarius · Aquila · Ara · Aries · Auriga · Boötes · Caelum · Camelopardalis · Cáncer · Canes Venatici · Canis Major · Canis Minor · Capricornus · Carina · Cassiopeia · Centaurus · Cepheus · Cetus · Chamaeleon · Circinus · Columba · Coma Berenices · Corona Australis · Corona Borealis · Corvus · Crater · Crux · Cygnus · Delphinus · Dorado · Draco · Equuleus · Eridanus · Fornax · Gemini · Grus · Hércules · Horologium · Hydra · Hydrus · Indus · Lacerta · Leo Minor · Leo · Lepus · Libra · Lupus · Lynx · Lyra · Mensa · Microscopium · Monoceros · Musca · Norma · Octans · Ophiuchus · Orión · Pavo · Pegasus · Perseus · Phoenix · Pictor · Pisces · Piscis Austrinus · Puppis · Pyxis · Reticulum · Sagitta · Sagittarius · Scorpius · Sculptor · Scutum · Serpens · Sextans · Taurus · Telescopium · Triangulum Australe · Triangulum · Tucana · Ursa Major · Ursa Minor · Vela · Virgo · Volans · Vulpecula |
|