രാമായണം പാന

ആമുഖം

ഈയടുത്ത് ബാംഗ്ലൂരിലെ ഒരു വീട്ടിൽ നിന്നു തപ്പിയെടുത്ത ഒരു പുസ്തകത്തിന്റെ സ്കാനാണ് പങ്കു വെക്കുന്നത്.

പുസ്തകത്തിന്റെ വിവരം

  • പേര്:രാമായണം പാന 
  • താളുകൾ: 57
  • രചയിതാവ്: കൃത്യമായ രചയിതാവെന്ന് ആരെന്ന് അറിയാത്ത പാരമ്പര്യ കൃതിയാണെന്ന് കരുതുന്നു.
  • പ്രസ്സ്: അജ്ഞാതം
  • പ്രസിദ്ധീകരണ വർഷം: അജ്ഞാതം
രാമായണം പാന

രാമായണം പാന

പുസ്തകത്തിന്റെ പ്രത്യേകതകൾ, ഉള്ളടക്കം

ഹൈന്ദവ വിശ്വാസങ്ങളുമായി ബന്ധപ്പെട്ട പുരുഷന്മാരുടെ അനുഷ്ഠാനകലയാണ് പാന എന്നു മലയാളം വിക്കിപീഡിയയിലെ ലേഖനത്തിൽ പറയുന്നു. രാമായണം പാന തന്നെ കുറച്ചധികം വേർഷനുകൾ ഉണ്ടെന്ന് ഒന്ന് ഓടിച്ചു തിരഞ്ഞപ്പോൾ കണ്ടു. കേരള സാഹിത്യ അക്കാദമി കുറച്ച് നാളുകൾക്ക് മുൻപ് പുറത്തു വിട്ട സ്കാനുകളുടെ കൂട്ടത്തിലും ഒരു രാമായണം പാന (1906) കണ്ടു. അത് ഇവിടെ കാണം. പക്ഷെ അതിന്റെ ഉള്ളടക്കത്തിൽ നിന്നു വ്യത്യസ്തമാണ് ഈ പുസ്തകത്തിലെ ഉള്ളടക്കം.

പക്ഷെ ഉള്ളടക്കത്തിന്റെ ലേ ഔട്ട് രണ്ട് പുസ്തകത്തിലും ഏകദേശം ഒരേ പോലെ തന്നെ. കാവ്യം ആണെങ്കിലും വരികളായി തിരിക്കുകയോ ഇടയ്ക്ക് സ്പേസ് ഇടുകയോ ഒന്നും ചെയ്തിട്ടില്ല. പുസ്തകം മൊത്തം ഒരു ഖണ്ഡികയായാണ് വിന്യസിച്ചിരിക്കുന്നത്.  അതിനാൽ ഇന്നത്തെ വായനാ രീതി വെച്ച് ഇതിന്റെ വായന അല്പം കഷ്ടമാകും.

ഡിജിറ്റൈസ് ചെയ്യാനായി കൈയ്യിൽ കിട്ടിയ പുസ്തകത്തിന്റെ നില വളരെ മോശമായിരുന്നു. കാലം അവശേഷിപ്പിച്ചത് പുസ്തകത്തിന്റെ പ്രധാന ഉള്ളടക്കം മാത്രമാണ്. ടൈറ്റിൽ താൾ അടക്കം ആദ്യത്തെ മിക്ക താളുകളും അപ്രത്യക്ഷമായിരുന്നു. ബാക്കി ഉള്ള താളുകൾ മറിക്കുമ്പോൾ പൊടിയുന്ന അവസ്ഥയിലും ആയിരുന്നു. എന്തായാലും പ്രധാന ഉള്ളടക്കം മൊത്തമായി കേടുപാടില്ലാതെ കിട്ടി എന്നത് നല്ല കാര്യമാണ്.

താളുകൾ പൊടിയുന്ന അവസ്ഥയിൽ ആയിരുന്നതിനാൽ വളരെ  ബുദ്ധിമുട്ടിയാണ് ഫോട്ടോ എടുത്തതും അത് പോസ്റ്റ് പ്രോസസ് ചെയ്തതതും. ടൈറ്റിൽ താൾ അടക്കമുള്ള താാളുകൾ നഷ്ടമായതിനാൽ ഈ പുസ്തകം ഏത് വർഷം അച്ചടിച്ചെന്നോ, ഏത് പ്രസ്സിൽ അച്ചടിച്ചെന്നോ, ആരാണ് സമാഹരിച്ചത് എന്നോ ഒന്നും വ്യക്തമല്ല.

ഈ പുസ്തകത്തിന്റെ ഉള്ളടക്കത്തിന്റെ വിശദാംശങ്ങളിലേക്കു പോവാൻ എനിക്കു അറിവില്ല. അതു ഈ മേഖലയിൽ അറിവുള്ളവർ ചെയ്യുമല്ലോ.

കൂടുതൽ ഉപയോഗത്തിനും വിശകലനത്തിനുമായി പുസ്തകത്തിന്റെ ഡിജിറ്റൽ പതിപ്പ് പങ്കു വെക്കുന്നു.

ഡൗൺലോഡ് വിവരങ്ങൾ

ഡിജിറ്റൈസ് ചെയ്ത പതിപ്പിന്റെ വിവിധ രൂപങ്ങൾ:

Google+ Comments

Posted in ഹൈന്ദവം | Leave a comment

1872- യാക്കൊബ ശ്ലീഹായുടെ കുറുബാന ക്രമം

ആമുഖം

പൂജ-ദസറ അവധിക്കു നാട്ടിൽ പൊയപ്പോൾ കരസ്ഥമാക്കിയ മറ്റൊരു പൊതുസഞ്ചയ പുസ്തകത്തിന്റെ സ്കാനാണ് ഇന്നു പങ്കു വെക്കുന്നത്. ഈ പുസ്തകം കേരളക്രൈസ്തവ സഭകളുടെ ആരാധനാഭാഷയുടെ മലയാളവൽക്കരണവുമായി ബന്ധപ്പെട്ട് പ്രാധാന്യമുള്ള പുസ്തകമാണ്.

പുസ്തകത്തിന്റെ വിവരം

  • പേര്: യാക്കൊബ ശ്ലീഹായുടെ കുറുബാന ക്രമം (ഇന്നത്തെ മലയാള രീതി വെച്ച് ഇത് യാക്കോബ് ശ്ലീഹായുടെ കുറുബാന ക്രമം എന്നു വായിക്കണം.)
  • താളുകൾ: 83
  • രചയിതാവ്: ഒരാൾ ആവണം എന്നില്ല. അക്കാലത്തെ മലങ്കര മെത്രാപ്പൊലീത്ത ആയിരുന്ന മാർ അത്തനോസ്യസ് മെത്രാപോലിത്തയുടെ നേതൃത്തിൽ ആവണം ഇത് ചെയ്തത്.
  • പ്രസ്സ്: സി.എം.എസ്. പ്രസ്സ്, കോട്ടയം
  • പ്രസിദ്ധീകരണ വർഷം: 1872
1872 യാക്കൊബ ശ്ലീഹായുടെ കുറുബാന ക്രമം

1872 യാക്കൊബ ശ്ലീഹായുടെ കുറുബാന ക്രമം

പുസ്തകത്തിന്റെ പ്രത്യേകതകൾ, ഉള്ളടക്കം

CMS മിഷനറിമാരുടെ ഇടപെടലുകൾ ഉണ്ടാകുന്നതിനു മുൻപ് കേരളക്രൈസ്തവ സഭകൾ സുറിയാനിയിൽ മുങ്ങി കിടക്കുകയായിരുന്നു. സുറിയാനി ആകട്ടെ പുരോഹിതവർഗ്ഗത്തിന്റെ കുത്തകയും. കെൾക്കുന്നവർക്ക് എന്തെങ്കിലും മനസ്സിലാകുമോ, ഇല്ല. എന്നാൽ ആർക്കെങ്കിലും ഇതു മാറ്റി ജനത്തിനു മനസ്സിലാകുന്ന ഭാഷ ഉപയോഗിക്കാൻ താല്പര്യമുണ്ടോ, അതിനു മുൻകൈ എടുക്കാൻ ആർക്കും വയ്യ. കേരള ക്രൈസ്തവ സഭകളുടെ ലിറ്റിററി ഭാഷ മാറ്റാൻ CMS മിഷനറിമാർ വരേണ്ടി വന്നു. അവരുടെ പ്രവർത്തനങ്ങളുടെ സ്വാധീനം മൂലമാണ് (ഇന്നു ഇത് നിഷേധിച്ച് ഞ്ങ്ങൾ ഒറ്റയ്ക്ക് ചെയ്തതാണ് എന്ന അവകാശവാദങ്ങൾ വരുന്നുണ്ട്) ഏകദേശം 1830കളിൽ മാരാമൺ പള്ളിയിൽ എബ്രഹാം മല്പാൻ മലയാളത്തിൽ കുർബ്ബാന ചൊല്ലുന്നത്. അന്ന് അത് ഒരു വിപ്ലവമായിരുന്നു. അതിന്റെ ഒക്കെ ഒരു തുടർച്ചയാണ് മലയാളഭാഷയിലുള്ള ഈ പുസ്തകം.

ഈ പുസ്തകം അക്കാലത്തെ മലങ്കരസഭയുടെ കുർബ്ബാന ക്രമമാണ്. ഇക്കാലത്തു തന്നെ ഈ സഭയിൽ ഇതുമായി ബന്ധപ്പെട്ടു തന്നെ ധാരാളം ചേരിതിരുവുകൾ ഉണ്ടായിയിരുന്നു. ഇന്നിപ്പോൾ അന്നത്തെ മലങ്കര സഭ എന്നു പറയുന്ന പ്രസ്ഥാനം യാക്കോബ, ഓർത്തഡോക്സ്, മാർത്തോമ്മ, ഇവാഞ്ചലിക്കൽ തുടങ്ങി വിവിധ സഭകളായി വിഘടിച്ചു പോയി താനും. ഈ പ്രത്യേക കുർബ്ബാനക്രമത്തിന്റെ വിശദാംശങ്ങളിലേക്കു പോവാൻ എനിക്കു അറിവില്ല. അതു ഈ മേഖലയിൽ അറിവുള്ളവർ ചെയ്യുമല്ലോ. എന്റെ അറിവിൽ ഇന്നു കുറഞ്ഞ പക്ഷം തൊഴിയൂർ സഭ-ഓർത്തഡോക്സ്-യാക്കോബ-മാർത്തോമ്മ സഭകൾ എങ്കിലും ഈ കുർബ്ബാന ക്രമത്തെ (St. James Liturgy) ആധാരമാക്കിയ കുർബ്ബാനക്രമമാണ് ഉപയോഗിക്കുന്നത്.  കൂടുതൽ കാര്യങ്ങൾ പറവാൻ അറിവില്ല.

മുകളിൽ സൂചിപ്പിച്ച പോലെ 1830കളിൽ മാരാമൺ പള്ളിയിൽ എബ്രഹാം മല്പാൻ മലയാളത്തിൽ കുർബ്ബാന ചൊല്ലി എന്നു പറയുന്നു എങ്കിലും ആ കാലഘട്ടങ്ങളിലെ മലയാളം കുർബ്ബാനയുമായി ബന്ധപ്പെട്ട പൊതുസഞ്ചയരേഖകൾ ഒന്നും തന്നെ നമുക്ക് കിട്ടിയിട്ടില്ല. അതാണ് ഈ രേഖയുടെ പ്രത്യെകത. ഈ പുസ്തകം നമുക്ക് ഇതുവരെ കിട്ടിയതിൽ ഏറ്റവും പഴക്കമുള്ള മലയാളം കുർബ്ബാനക്രമമാണ്.

പുസ്തകത്തിലെ വിഷയത്തിന്റെ വിശകലനം ഈ മേഖലയിൽ അറിവുള്ളവർ ചെയ്യുമല്ലോ. കൂടുതൽ ഉപയോഗത്തിനും വിശകലനത്തിനുമായി പുസ്തകത്തിന്റെ ഡിജിറ്റൽ പതിപ്പ് പങ്കു വെക്കുന്നു.

ഡൗൺലോഡ് വിവരങ്ങൾ

ഡിജിറ്റൈസ് ചെയ്ത പതിപ്പിന്റെ വിവിധ രൂപങ്ങൾ:

Google+ Comments

Posted in സി.എം.എസ്. പ്രസ്സ് | Leave a comment

1862 – ഗ്രമത്തി എന്ന പുസ്തകം

ആമുഖം

1860കളിൽ തന്നെ കേരളത്തിൽ മലയാളത്തിനു പുറമേയുള്ള അച്ചുകളും നിർമ്മിച്ച് പുസ്തകമച്ചടി നടന്നിരുന്നു എന്ന് തെളിയിക്കുന്ന ഒരു പുസ്തകം ആണ് ഇന്നു പങ്കു വെക്കുന്നത്.

പുസ്തകത്തിന്റെ വിവരം

  • പേര്: ഗ്രമത്തി എന്ന പുസ്തകം
  • താളുകൾ: 165
  • രചയിതാവ്: ആരെന്നു ഉറപ്പില്ല, 1862ലൊക്കെ മലങ്കര മെത്രാപ്പൊലീത്ത ആയിരുന്ന മാർ അത്തനോസ്യസ് മെത്രാപോലിത്ത ആവാം
  • പ്രസ്സ്: കോട്ടയം സെമിനാരി (ഇന്നു കോട്ടയം പഴയ സെമിനാരി എന്നു അറിയപ്പെടുന്നു)
  • പ്രസിദ്ധീകരണ വർഷം: 1862
1862 – ഗ്രമത്തി എന്ന പുസ്തകം

1862 – ഗ്രമത്തി എന്ന പുസ്തകം

പുസ്തകത്തിന്റെ പ്രത്യേകതകൾ, ഉള്ളടക്കം

സുറിയാനി വ്യാകരണം ആണ് പുസ്തകത്തിന്റെ ഉള്ളടക്കം എന്നു പുസ്തകത്തിൽ കണ്ട മലയാള ഉള്ളടക്കം വായിച്ചതിൽ നിന്നു മനസ്സിലാക്കാം. ഈ പുസ്തകത്തിന്റെ ഹാർഡ് കോപ്പി മറ്റു Right to Left സ്ക്രിപ്റ്റുകൾ പോലെ (ഉദാഹരണം ഹീബ്രൂ, അറബി തുടങ്ങിയ) പിറകിൽ നിന്നാണ് വായന തുടങ്ങുന്നത്.

1860കളിൽ തന്നെ കേരളത്തിൽ മലയാളത്തിനു പുറമേയുള്ള അച്ചുകളും നിർമ്മിച്ച് പുസ്തകമച്ചടി നടന്നിരുന്നു എന്ന് തെളിയിക്കുന്ന ഒരു പുസ്തകം ആണിത്. അതേ പോലെ കേരളത്തിൽ നിന്നു മലയാള വ്യാകരണത്തിനു ശേഷം വന്ന മറ്റൊരു ഭാഷാ വ്യാകരണം ഇതാണെന്നു പറയാമെന്നു തോന്നുന്നു.

സുറിയാനി വായിക്കാൻ അറിയാത്തതുമൂലം പുസ്തകത്തിന്റെ ഉള്ളടക്കവും പ്രത്യേകതകളും കൂടുതൽ ചികഞ്ഞെടുക്കാൻ പറ്റിയില്ല. എങ്കിലും 1860കളിൽ കോട്ടയത്തു സുറിയാനി ലിപിയുടെ അച്ചു നിർമ്മിച്ചു എന്നത് പ്രധാനപ്പെട്ട ഒരു സംഗതി ആണെന്ന് ഞാൻ കരുതുന്നു.

ഡൗൺലോഡ് വിവരങ്ങൾ

നോയിസ് കുടുതൽ ആയതിനാൽ പുസ്തകം ബ്ലാക്ക് ആന്റ് വൈറ്റിൽ ചെയ്യാൻ പറ്റിയില്ല. അതിനാൽ സൈസ് കൂടുതൽ (40 MB യ്ക്കു മുകളിൽ) ആണ്.

ഡിജിറ്റൈസ് ചെയ്ത പതിപ്പിന്റെ വിവിധ രൂപങ്ങൾ:

Google+ Comments

Posted in മാർ അത്തനോസ്യസ് മെത്രാപോലിത്ത | Leave a comment

1879 – യാക്കൊബായ സുറിയാനി സഭയുടെ സ്വരൂപം

ആമുഖം

കഴിഞ്ഞ വട്ടം നാട്ടിൽ പോയപ്പോൾ ലഭ്യമായ കുറച്ച് പുസ്തകങ്ങളുടെ സ്കാനുകൾ ആണ് ഇനി കുറച്ച് പോസ്റ്റുകളിലൂടെ പങ്കു വെക്കുന്നത്. ഇതിൽ ആദ്യമായി പങ്കു വെക്കുന്നത് യാക്കൊബായ സുറിയാനി സഭയുടെ സ്വരൂപം എന്ന പുസ്തകമാണ്.

പുസ്തകത്തിന്റെ വിവരം

  • പേര്: യാക്കൊബായ സുറിയാനി സഭയുടെ സ്വരൂപം
  • താളുകൾ: 78
  • രചയിതാവ്: എടവഴിക്കൽ ഗീവറുഗീസു കത്തനാർ
  • പ്രസ്സ്: സെന്റ് തോമസ് പ്രസ്, കൊച്ചി
  • പ്രസിദ്ധീകരണ വർഷം: 1879
1879 - യക്കൊബായ സുറിയാനി സഭയുടെ സ്വരൂപം

1879 – യക്കൊബായ സുറിയാനി സഭയുടെ സ്വരൂപം

കടപ്പാട്

ഈ പുസ്തകം ലഭ്യമായത് ഓർത്തഡോക്സ് സഭയിലെ പുരോഹിതനായ റവ: ഇയ്യോബ് കുന്നകുളത്തിന്റെ  ശേഖരത്തിൽ നിന്നാണ്. ഈ വിധത്തിൽ പുസ്തകം പൊതുമണ്ഡലത്തിലേക്ക് കൊണ്ടു വരാൻ സഹായിച്ച ഇയ്യോബച്ചനു നന്ദി.

പുസ്തകത്തിന്റെ പ്രത്യേകതകൾ, ഉള്ളടക്കം

ഈ പുസ്തകം എടവഴിക്കൽ ഗീവറുഗീസു കത്തനാർ എഴുതി Rev. G.B Howard എഡിറ്റ് ചെയ്തു പ്രസിദ്ധീകരിച്ച The Nature of the Syrian Church എന്ന ഇംഗ്ലീഷ് പുസ്തകത്തിന്റെ മലയാളം പരിഭാഷ ആണെന്നു ടൈറ്റിൽ പേജിൽ നിന്നു മനസ്സിലാക്കാം. The Nature of the Syrian Church എന്ന ഇംഗ്ലീഷ് പുസ്തകവും 1869ൽ തന്നെ ആണു പ്രസിദ്ധീകരിച്ചത് എന്നു വിവിധ ഇടങ്ങളിൽ പരിശോധിച്ചതിൽ നിന്നു വ്യക്തമാകുന്നു.

പുസ്തകത്തിന്റെ ഉള്ളടക്കം ഏകദേശം മൊത്തമായി 1870 വരെയുള്ള യാക്കോബായ സുറിയാനി സഭയുടെ ചരിത്രം ഒരു പ്രത്യേക വീക്ഷണകോണിൽ നിന്നു പറയാണ് ശ്രമിച്ചിട്ടുള്ളത്. 1870കളിൽ നവീകരണവിഭാഗകാരും പാരമ്പര്യവാദികളും തമ്മിൽ സഭാവഴക്കു കൊടുമ്പിരി കൊണ്ടിരിക്കുന്ന സമയമായിരുന്നു. ഈ പുസ്തകത്തിൽ പാരമ്പര്യവാദികളുടെ ഭാഗത്തു നിന്നു കാര്യങ്ങൾ അവതരിപ്പിക്കാനാണു ശ്രമിച്ചിരിക്കുന്നത്. പലയിടത്തും നവീകരണവിഭാഗക്കാരേയും അവരുടെ നേതാവായ മാർ അത്തനേഷ്യസ് മെത്രാപ്പോലീത്തയേയും രൂക്ഷമായി വിമർശിക്കുകയേയും ചെയ്യുന്നതും കാണാം. കൂടുതൽ വിശദാംശങ്ങൾക്കായി പുസ്തകം വായിക്കുക.

കൊച്ചിയിലെ സെന്റ് തോമസ് പ്രസ്സിൽ അച്ചടിച്ച ഒരു പുസ്തകം ആദ്യമായാണ് നമുക്ക് കിട്ടുന്നത്. ആ വിധത്തിൽ ഈ പുസ്തകം പ്രത്യേകത ഉള്ളതാണ്. Kochiയുടെ സ്പെല്ലിങ് CCOHIN എന്ന് ടൈറ്റിൽ പേജിൽ തന്നെ കാണുന്നു.

പഴക്കം മൂലം പുസ്തകത്തിന്റെ നില അതീവ ഗുരുതരമായതിനാൽ ഡിജിറ്റൈസേഷൻ പ്രശ്നമായിരുന്നു. നോയിസ് മൂലം പുസ്തകം ഗ്രേ സ്കെയിലിൽ ചെയ്യാൻ പറ്റില്ല എന്ന നിലയിൽ ആയിരുന്നു. അതിനാൽ ബ്ലാക്ക് ആന്റ് വൈറ്റിൽ ചെയ്യേണ്ടി വന്നു. അതിലും നോയിസ് ഒഴിവാക്കൽ അതീവ ദുഷകരമായിരിന്നു. എങ്കിലും ഒരു വിധത്തിൽ ഉപയോഗക്ഷമമായ ഒരു ബ്ലാക്ക് ആന്റ് വൈറ്റ് കോപ്പി ഒരു വിധത്തിൽ ഉണ്ടാക്കാൻ പറ്റി. അതു പങ്കു വെക്കുന്നു.

പുസ്തകത്തിലെ വിഷയത്തിന്റെ വിശകലനം ഈ മേഖലയിൽ അറിവുള്ളവർ ചെയ്യുമല്ലോ. കൂടുതൽ ഉപയോഗത്തിനും വിശകലനത്തിനുമായി പുസ്തകത്തിന്റെ ഡിജിറ്റൽ പതിപ്പ് പങ്കു വെക്കുന്നു.

ഡൗൺലോഡ് വിവരങ്ങൾ

ഡിജിറ്റൈസ് ചെയ്ത പതിപ്പിന്റെ വിവിധ രൂപങ്ങൾ:

Google+ Comments

Posted in Kochi, St. Thomas Press | Tagged | Leave a comment

1860 – പവിത്രചരിത്രം

ആമുഖം

കുറച്ചു നാളത്തെ ഇടവേളയ്ക്കു ശേഷം ഇന്നു ഒരു പ്രത്യേക പുസ്തകത്തിന്റെ ഡിജിറ്റൽ സ്കാൻ കൂടെ പങ്കു വെക്കുകയാണ്. പല വിധ കാരണങ്ങൾ കൊണ്ട് ഈ പുസ്തകവും അതിന്റെ ഡിജിറ്റൈസേഷനും എനിക്ക് വ്യക്തിപരമായി സന്തോഷവും സങ്കടവും സമ്മാനിച്ചു.

പുസ്തകത്തിന്റെ വിവരം

  • പേര്: പവിത്രചരിത്രം
  • താളുകൾ: 466
  • രചയിതാവ്: (ഹെർമ്മൻ ഗുണ്ടർട്ട്? ആയിരിക്കാം എന്നു കരുതുന്നു.) 1874ലെ ഒരു ബാസൽ മിഷൻ മാസികയിൽ രചയിതാവ് Kurz ആണെന്ന സൂചന തരുന്നു. Kurz ആര് ആണെന്നതിന്റെ വിവരങ്ങൾ മനസ്സിലാക്കേണ്ടതുണ്ട്.  Kurz പവിത്രചരിത്രത്തിന്റെ ഒറിജിനൽ ജർമ്മൻ പതിപ്പ് എഴുതിയ ആളാണോ അതോ മലയാളം പതിപ്പിന്റെ ആളാണോ എന്നൊന്നും പിടിയില്ല. അതൊക്കെ ഗവെഷണത്തിലൂടെ കണ്ടെത്തണം. .)
  • പ്രസ്സ്:ബാസൽ മിഷൻ, തലശ്ശേരി
  • പ്രസിദ്ധീകരണ വർഷം: 1860

 

1860 - പവിത്രചരിത്രം

1860 – പവിത്രചരിത്രം

ഇനി ഡിജിറ്റൈസേഷന്റെ വിശദാംശങ്ങളിലേക്ക്.

കടപ്പാടുകൾ, ഡിജിറ്റൈസേഷൻ വിശെഷങ്ങൾ

ഈ പുസ്തകം ഡിജിറ്റൈശേഷനായി ലഭിച്ചത് കേരളത്തിൽ നിന്ന് തന്നെ. വളരെ അപൂർവ്വമായേ ഇങ്ങനെ നടക്കാറുള്ളൂ.

യുയോമയ സഭയിലെ ബോധകരായിരുന്ന (പുരോഹിതൻ) ചെന്നിത്തല കവറുകാട് ശ്രീ. യേശുദാസൻ ബോധകരുടെ (1909- 1978) പുസ്തക ശേഖരത്തിൽ നിന്നും അദ്ദേഹത്തിന്റെ ചെറുമകനായ മാത്യു ജേക്കബ്ബിനു ലഭിച്ചതാണ് ഈ പുസ്തകം. ഏതാണ്ട് 155ൽ പരം വർഷം ഈ പുസ്തകം സൂക്ഷിച്ചു വെക്കുകയും അതിപ്പോൾ ഡിജിറ്റൈസേഷനായി ലഭ്യമാക്കുകയും ചെയ്ത മാത്യു ജേക്കബ്ബിനും കുടുംബത്തിനും പ്രത്യേക നന്ദി.

ഈ പുസ്തകം ഡിജിറ്റൈസേഷനായി എന്റെ കൈയ്യിലെത്തിയത് പലരുടേയും സഹായത്തിലാണ്. കഴിഞ്ഞ വട്ടം (2016 ഏപ്രിൽ) നാട്ടിൽ പോയപ്പോൾ ഈ പുസ്തകം  മാത്യുജേക്കബിൽ നിന്ന് നേരിട്ടു വാങ്ങാൻ തീരുമാനിച്ചത്. പക്ഷെ പലവിധ കാരണങ്ങളാൽ ഞങ്ങൾക്ക് തമ്മിൽ കാണാൻ കഴിഞ്ഞില്ല. പാലക്കാട്ടുള്ള എനിക്ക് ഈ പുസ്തകം എത്തിക്കുന്നത് ഒരു കടമ്പയായി നിന്നു. പുസ്തകത്തിന്റെ മൂല്യം ആറിയാത്തവരുടെ കൈയിൽ ഏല്പിക്കുകയോ കൊറിയർ ചെയ്യുകയോ ശരിയല്ല താനും. അപ്പോഴാണ് ഞാൻ ചെയ്യുന്ന പൊതുസഞ്ചയ രേഖകളുടെ ഡിജിറ്റൈസേഷനിൽ അതീവ താല്പര്യം താലപര്യം ഉള്ള റൂബിൻ ഡിക്രൂസ് എറണാകുളത്തു നിന്ന് തൃശൂർ വരുന്നു എന്നറിഞ്ഞത്. അങ്ങനെ അദ്ദേഹം വഴി പുസ്തകം തൃശൂരെത്തി. അദ്ദേഹത്തിൽ നിന്ന് അത് വാങ്ങാനായി ഞാൻ പാലക്കാട് നിന്ന് വണ്ടിയെടുത്ത് തൃശൂർ പോയി. പുസ്തകം ഭദ്രമായി ഏറ്റുവാങ്ങി. അദ്ദേഹത്തിനു നന്ദി.

എന്നാൽ ഈ വിധ വിവിധ മാർഗ്ഗങ്ങളിലൂടെ പുസ്തകം പലയിടത്തു നിന്നു പലരുടേയും സഹായത്തൊടെ ഡിജിറ്റൈസ് ചെയ്ത് നിങ്ങളുടെ മുൻപിലെത്തുമ്പോൾ, അതിൽ പുസ്തകം ഡിജിറ്റൈസ് ചെയ്യുന്ന പ്രയത്നം മാത്രമല്ല സാരമായ ധനനഷ്ടവും ഉണ്ടാക്കുന്നുണ്ട്. പുസ്തകങ്ങൾ തിരഞ്ഞും ഏറ്റുവാങ്ങാനും മറ്റും പോകുമ്പോൾ വിചാരിച്ചിരിക്കാതെ ഉണ്ടാകുന്ന ധനനഷ്ടം ചിലപ്പോൾ കൈവിട്ട് പോകുന്നു. ഉദാഹരണത്തിനു ഈ പുസ്തകം വാങ്ങാനായി പൊയി തിരിച്ചു വരുന്ന വഴി വണ്ടി ചെറിയൊരു അപകടത്തിൽ പെട്ടു. അല്പം സാരമായ ധന നഷ്ടം ഇതു മൂലം ഉണ്ടായി. അതുണ്ടാക്കിയ മാനസികക്ലെശം വേറെ.  പല പ്രതിസന്ധികളും തരണം ചെയ്താണ് പുസ്തകം ഡിജിറ്റൈസ് ചെയ്യപ്പെടുന്നത് എന്ന യാഥാർത്ഥ്യം എല്ലാവരും അറിയാനാണ് ഇതിവിടെ രേഖപ്പെടുത്തുന്നത്.

ഡിജിറ്റൈസേഷനായി കൈയ്യിലെത്തിയ പുസ്തകത്തിന്റെ സ്ഥിതി വിചാരിച്ചത്ര (സാധാരണ ഈ കാലഘട്ടത്തിലുള്ളത് കാലപ്പഴക്കം മൂലം തന്നെ പ്രശ്നം സൃഷ്ടിക്കും)  മോശമായിരുന്നില്ല. എങ്കിലും കാലപ്പഴക്കം മൂലം ആദ്യത്തെ ചില താളുകൾ ഭാഗികമായും, അവസാനത്തെ 1-2 താളുകൾ മൊത്തമായും, ഇടയിൽ അല്ലറ ചില്ലറ ചില പ്രശ്നങ്ങളും ഒഴിച്ചു നിർത്തിയാൽ പുസ്തകം ഏകദേശം 99% വും നമുക്ക് ലഭിച്ചു എന്നു പറയാം.

പുസ്തകത്തിന്റെ പഴക്കം മൂലവും അല്പം വലിയ പുസ്തകമായതിനാലും സ്കാനർ ഉപയോഗിക്കാൻ പറ്റുമായിരുന്നില്ല. ഫൊട്ടോ എടുക്കാനായി ക്യാമറ ഘടിപ്പിക്കാനായി കോപ്പി സ്റ്റാൻഡും ഇല്ലായിരുന്നു. അതിനാൽ അതീവ ദുഷ്കരമായാണ് ഈ പുസ്തകം ഡിജിറ്റൈസ് ചെയ്തത്. വിവിധ സംവിധാനങ്ങൾ ഉപയോഗിച്ച് ക്യാമറ താഴേക്ക്  ഫേസ് ചെയ്യിച്ച് അതിനെ ഒരിടത്ത് സ്ഥിരമാക്കിയാണ്  ഈ പുസ്തകത്തിന്റെ ഓരോ പേജും ഫോട്ടോ എടുത്തത്. അതിനു പൂർണ്ണമായും എന്നെ സഹായിച്ചത് എന്റെ 5 വയസ്സുകാരൻ മകൻ സിറിൽ ആണ്. ഈ പുസ്തകം മൊത്തമായി എല്ലാ താളുകളും (466 താളുകൾ) ഫോട്ടോയെടുത്ത് തീരാൻ 2-3 ആഴ്ചയെടുത്തു. അതിന്റെ ഇടയ്ക്ക് വേറെ എന്തെങ്കിലും കാര്യത്തിനു സിറിലിനെ വഴക്കു പറഞ്ഞാൽ “ഞാൻ അപ്പയെ ബുക്ക് സ്കാൻ ചെയ്യാൻ സഹായിക്കില്ല” എന്നു പറഞ്ഞ് ഭീഷണിപ്പെടുത്തിയിരുന്നത് ഓർക്കുന്നു :)

ഇനി പുസ്തകത്തിന്റെ വിശദാംശങ്ങളിലേക്ക്.

പുസ്തകത്തിന്റെ പ്രത്യേകതകൾ, ഉള്ളടക്കം

തലശ്ശേരിയിൽ ബാസൽ മിഷന്റെ കീഴിൽ ഗുണ്ടർട്ട് സ്ഥാപിച്ച കല്ലച്ചിൽ (ലിത്തോഗ്രഫി) നിന്ന് അച്ചടിച്ച മലയാള പുസ്തകമാണ് ഇത്.

നമുക്കു കിട്ടിയിരിക്കുന്ന കോപ്പി, കാലത്തെ അതിജീവിച്ച് ശേഷിച്ചിരിക്കുന്ന ഈ പുസ്തകത്തിന്റെ അപൂർവ്വം പ്രതികളിൽ ഒന്നാണ്. ഈ പുസ്തകം ട്യൂബിങ്ങൻ ശേഖരത്തിലോ എന്റെ അറിവിലൂള്ള മറ്റു ആർക്കൈവ്‌സിലോ ഇല്ല. അതിനാൽ തന്നെ ഇത് ഡിജിറ്റൈസ് ചെയ്യാനായത് ഭാഗ്യമെന്ന് കരുതുന്നു.

പുസ്തകത്തിന്റെ അച്ചടി നടന്നത് 1860ൽ. ഇത്  ഗുണ്ടർട്ട് കേരളം വിട്ടതിന്റെ തൊട്ടടുത്ത് വർഷമാണ്. ഇതിന്റെ രചന ഗുണ്ടർട്ട് ആണോ? ആയികൂടായ്ക ഇല്ല. ഇതിനു മുൻപുള്ള സമാന രചനങ്ങൾ (ഉദാഹരണം: 1857ലെ  പവിത്രലേഖകൾ) ഗുണ്ടർട്ട് ആണ് എന്നത് കണക്കിലെടുക്കുമ്പോൾ ഈ പുസ്തകരചനയും ഗുണ്ടർട്ട് ആവാനാണ് സാദ്ധ്യത.

പുസ്തകത്തിന്റെ ശീർഷകത്താളിൽ കാണുന്ന പോലെ ഇത് ഒരു ക്രൈസ്തവ മതപ്രചരണ ഗ്രന്ഥമാണ്. പുസ്തകത്തിന്റെ ഉള്ളടക്കം വിവിധ ഖണ്ഡങ്ങളായും, പകുപ്പുകളായും, അദ്ധ്യായങ്ങളായും ഒക്കെ വിഭജിച്ചിരിക്കുന്നു. ബൈബിളിന്റെ ഉള്ളടക്കം ലൊക ചരിത്രമായും ഇസ്രായെലിന്റെ ചരിത്രമായും ഒക്കെ ബന്ധപ്പെടുത്തി താരതമ്യം ചെയ്യുന്ന പുസ്തകമാണിത്. പുസ്തകത്തിന്റെ വിഷയ വിശകലനം ഈ മേഖലയിൽ അറിവുള്ളവർ ചെയ്യുമല്ലോ.

ഞാൻ എനിക്കു താല്പര്യമുള്ള മലയാളലിപിയുമായി ബന്ധപ്പെട്ട് പുസ്തകത്തിലെ കാര്യങ്ങൾ പറയട്ടെ.

സംവൃതോകാരത്തിനായി ചന്ദ്രക്കല ഉപയോഗിച്ചിരിക്കുന്നു. ഇത് നമ്മൾ 1847 തൊട്ടെങ്കിലും ഉള്ള ബാസൽ മിഷൻ പുസ്തകങ്ങളിൽ കാണുന്നതാണല്ലോ. 1847ൽ നിന്ന് 1860 എത്തുമ്പോൾ കാണുന്ന വ്യത്യാസം 1860 ആയപ്പോഴേക്ക് ചന്ദ്രക്കലയുടെ സ്ഥാനം മിക്കവാറുമൊക്കെ ഇന്നത്തെ പൊലെ അക്ഷരത്തിന്റെ അറ്റത്തേക്ക് മാറി എന്നതാണ്. (1847നോടടുപ്പിച്ചുള്ള പല ബാസൽ മിഷൻ അച്ചടിയിലും നമ്മൾ ഇത് അക്ഷരത്തിന്റെ നടുക്കായാണല്ലോ കണ്ടത്).

ഇതിനു പുറമേ പല പേരുകളിലും കേവലവ്യഞ്ജനം സൂചിപ്പിക്കാനായും ചന്ദ്രക്കല ഉപയോഗിച്ചിരിക്കുന്നു. ഉദാഹരണം നെബുകദ്‌നെചർ (പേജ് 235). ഇതോടുകൂടി സംവൃതോകാരത്തിനായും കേവലവ്യഞ്ജനത്തിനായും ചന്ദ്രക്കല ഉപയൊഗിച്ചത് ബാസൽ മിഷൻ തന്നെ ആണെന്ന് കൂടുതൽ വ്യക്തമാവുകയാണ്.

മലയാള അക്കങ്ങൾ സമൃദ്ധമായി ഉപയോഗിച്ചിരിക്കുന്നു.

മ്മ എന്ന കൂട്ടക്ഷരത്തിന്റെ സ്റ്റാക്ക് ചെയ്യുന്ന രൂപമാണ് ഈ പുസ്തകത്തിൽ ഉടനീളം കാണുന്നത്. ഇതിനു മുൻപുള്ള ചില പുസ്തകങ്ങളിലും മ്മയുടെ ഈ രൂപം കണ്ടതിനാൽ ജംഗമ അച്ചടിയിലൂടെ സംഭവിച്ച സ്റ്റാൻഡേർഡൈസേഷൻ മൂലമാണ് മ്മയുടെ ഈ പ്രത്യേക രൂപത്തിന്റെ ചരമത്തിനു ഇടയാക്കിയത് എന്ന് മിക്കവാറുമൊക്കെ പറയാം എന്നു തോന്നുന്നു.

ഈ കാരത്തിനു ഈ എന്ന രൂപം തന്നെ കാണുന്നു. എന്നാൽ തെക്കൻ കെരളത്തിലെ മിക്ക അച്ചടിയിലും 1930 കൾ വരെയെങ്കിലും ഈ കാരത്തിന്റെ മറ്റേ രൂപം തന്നെ ആയിരുന്നു എന്ന് നമ്മൾ പല പുസ്തകങ്ങളിലൂടെ കണ്ടതാണ്.

റ, യ തുടങ്ങിയവയുടെ ചിഹ്നം ഒക്കെ വലിച്ചു നീട്ടി പ്രത്യേക ശൈലിയിലാണ് എഴുതിയിരിക്കുന്നത്. കൈയ്യെഴുത്തിൽ ഈ ശൈലി നമ്മൾ ഇപ്പോഴും തുടരുന്നുണ്ടല്ലോ.

അക്ഷരത്തിന്റെ അവസാനം മുകളിലേക്ക് നീട്ടി കേവലവ്യഞ്ജനം/ചില്ലുണ്ടാക്കുന്ന രീതി വടക്കൻ കേരളത്തിൽ ഉണ്ടായിരുന്നു എന്ന് ങ്ക തുടങ്ങിയ ചില കൂട്ടരങ്ങളുടെ കേവലവ്യഞ്ജനം/ചില്ല് കാണുന്നതിൽ നിന്ന് വ്യക്തമാകുന്നു. കന്നഡ ലിപി എഴുത്തിന്റെ സ്വാധീനം കൂടെ ആവാം ഇത്.

പുസ്തകത്തിലെ വിഷയത്തിന്റെ വിശകലനം ഈ മേഖലയിൽ അറിവുള്ളവർ ചെയ്യുമല്ലോ. കൂടുതൽ ഉപയോഗത്തിനും വിശകലനത്തിനുമായി പുസ്തകത്തിന്റെ ഡിജിറ്റൽ പതിപ്പ് പങ്കു വെക്കുന്നു.

ഡൗൺലോഡ് വിവരങ്ങൾ

പുസ്തകത്തിന്റെ പ്രാധാന്യം മൂലം പുസ്തകം ഗ്രേ സ്കെയിലിൽ/കളറിൽ കൂടെ ലഭ്യമാക്കിയിട്ടുണ്ട്. അതിനു സൈസ് വളരെ കൂടുതൽ (114 MB) ആണ്. അതിനാൽ അത്യാവശ്യക്കാർ മാത്രം അത് ഡൗൺലോഡ് ചെയ്താൽ മതിയാകും. ബാക്കിയുള്ളവർ ഓൺലൈനായി വായിക്കുകയോ ബ്ലാക്ക് ആന്റ് വൈറ്റ് കോപ്പീ ഉപയോഗിക്കുകയോ ചെയ്യുക.

 

 

Google+ Comments

Posted in കല്ലച്ച്, ബാസൽ മിഷൻ, ബാസൽ മിഷൻ പ്രസ്സ്, ലിത്തോഗ്രഫി, ഹെർമ്മൻ ഗുണ്ടർട്ട് | Leave a comment

1907 – ത്രിപുരാസ്തൊത്രം – വിംശതി

ആമുഖം

വിംശതി എന്ന ത്രിപുരസ്തൊത്രത്തിന്റെ ഡിജിറ്റൽ സ്കാനാണ് ഇന്നു പരിചയപ്പെടുത്തുന്നത്.

ഈ പുസ്തകം നമുക്ക് ശരത്ത് സുന്ദർ  വഴിയാണ് ലഭിക്കുന്നത്. ഡിജിറ്റൈസ് ചെയ്യാനായി ഈ അമൂല്യഗ്രന്ഥങ്ങളുടെ കോപ്പി ലഭ്യമാക്കുന്ന ശരത് സുന്ദറിനു പ്രത്യേക നന്ദി.

 

പുസ്തകത്തിന്റെ വിവരം

  • പേര്: ത്രിപുരാസ്തൊത്രം – വിംശതി 
  • താളുകൾ: 82
  • രചയിതാവ്:  കയ്ക്കുളങ്ങരെ വാരിയത്ത് രാമവാരിയർ 
  • പ്രസ്സ്:ശ്രീ വിദ്യാരത്നപ്രഭാ പ്രസ്സ്, കുന്നംകുളം
  • പ്രസിദ്ധീകരണ വർഷം: 1907
1907-ത്രിപുരാസ്തോത്രം - വിംശതി

1907-ത്രിപുരാസ്തോത്രം – വിംശതി

 

ഉള്ളടക്കം

വിംശതി എന്ന ത്രിപുരാസ്തൊത്രം ആണ് പുസ്തകത്തിന്റെ ഉള്ളടക്കം. ശ്ലോകങ്ങളും (സ്തോത്രങ്ങളും) അതിന്റെ അർത്ഥവും വിശദീകരണവും മറ്റും ടൈപ്പ് സെറ്റ് ചെയ്തിരിക്കുന്നത് പൊരാ എന്നൊരു കുറവ് ഈ പുസ്ത്കത്തിന്റെ ടൈപ്പ് സെറ്റിങ്ങിനെ പറ്റി പറയാനുണ്ട്.

പുസ്തകത്തിലെ വിഷയത്തിന്റെ വിശകലനം ഈ മേഖലയിൽ അറിവുള്ളവർ ചെയ്യുമല്ലോ. കൂടുതൽ ഉപയോഗത്തിനും വിശകലനത്തിനുമായി പുസ്തകത്തിന്റെ ഡിജിറ്റൽ പതിപ്പ് പങ്കു വെക്കുന്നു.

ഡൗൺലോഡ് വിവരങ്ങൾ

 

Google+ Comments

Posted in ശരത് സുന്ദർ ശേഖരം, ശ്രീവിദ്യാരത്നപ്രഭാ അച്ചുകൂടം | Leave a comment

1916 – നമ്മുടെ ചക്രവർത്തി

ആമുഖം

ജോർജ്ജ് അഞ്ചാമൻ രാജാവിനെ പറ്റി എഴുതപ്പെട്ട ഒരു മലയാളം കൃതിയുടെ രണ്ടാം പതിപ്പിന്റെ ഡിജിറ്റൽ സ്കാനാണ് ഇന്നു പരിചയപ്പെടുത്തുന്നത്.

ഈ പുസ്തകം നമുക്ക് ശരത്ത് സുന്ദർ  വഴിയാണ് ലഭിക്കുന്നത്. ഡിജിറ്റൈസ് ചെയ്യാനായി ഈ അമൂല്യഗ്രന്ഥങ്ങളുടെ കോപ്പി ലഭ്യമാക്കുന്ന ശരത് സുന്ദറിനു പ്രത്യേക നന്ദി.

പുസ്തകത്തിന്റെ വിവരം

  • പേര്: നമ്മുടെ  ചക്രവർത്തി
  • താളുകൾ: 50
  • രചയിതാവ്:  എൻ. മാധവൻ നായർ
  • പ്രസ്സ്:വിദ്യാഭിവർദ്ധിനി പ്രസ്സ്, കൊല്ലം
  • പ്രസിദ്ധീകരണ വർഷം: 1916
1916-നമ്മുടെ ചക്രവർത്തി

1916-നമ്മുടെ ചക്രവർത്തി

ഉള്ളടക്കം

ജോർജ്ജ് അഞ്ചാമൻ രാജാവിന്റെ ജീവചരിത്രം ആണ് പുസ്തകത്തിന്റെ ഉള്ളടക്കം.

പുസ്തകത്തിലെ വിഷയത്തിന്റെ വിശകലനം ഈ മേഖലയിൽ അറിവുള്ളവർ ചെയ്യുമല്ലോ. കൂടുതൽ ഉപയോഗത്തിനും വിശകലനത്തിനുമായി പുസ്തകത്തിന്റെ ഡിജിറ്റൽ പതിപ്പ് പങ്കു വെക്കുന്നു.

ഡൗൺലോഡ് വിവരങ്ങൾ

 

 

Google+ Comments

Posted in വിദ്യാഭിവർദ്ധിനി പ്രസ്സ്, ശരത് സുന്ദർ ശേഖരം | Leave a comment

1912 – ഇൻഡ്യൻ സാഹിബ് അഥവാ നല്ല കുട്ടികൾ

ആമുഖം

Sahibs Birthday എന്ന ഇംഗ്ലീഷ് കൃതി MRR എന്ന ഒരാൾ മലയാളത്തിലേക്ക് പരിഭാഷപ്പെടുത്തി പ്രസിദ്ധം ചെയ്തതിന്റെ  ഡിജിറ്റൽ സ്കാനാണ് ഇന്നു പരിചയപ്പെടുത്തുന്നത്.

ഈ പുസ്തകവും നമുക്ക് ശരത്ത് സുന്ദർ  വഴിയാണ് ലഭിക്കുന്നത്. ഡിജിറ്റൈസ് ചെയ്യാനായി ഈ അമൂല്യഗ്രന്ഥങ്ങളുടെ കോപ്പി ലഭ്യമാക്കുന്ന ശരത് സുന്ദറിനു പ്രത്യേക നന്ദി.

പുസ്തകത്തിന്റെ വിവരം

  • പേര്: ഇൻഡ്യൻ സാഹിബ് അഥവാ നല്ല കുട്ടികൾ
  • താളുകൾ: 62
  • രചയിതാവ്:  മൂല രചയിതാവ് ആര് എന്നത് അജ്ഞാതം, പരിഭാഷ: MRR
  • പ്രസ്സ്:കേരളകല്പദ്രുമം പ്രസ്സ്, തൃശ്ശിവപേരൂർ
  • പ്രസിദ്ധീകരണ വർഷം: 1912
1912 - ഇൻഡ്യൻ സാഹിബ് അഥവാ നല്ല കുട്ടികൾ

1912 – ഇൻഡ്യൻ സാഹിബ് അഥവാ നല്ല കുട്ടികൾ

ഉള്ളടക്കം

ഇംഗ്ലീഷിലുള്ള Sahibs Birthday എന്ന കഥ MRR എന്ന ഒരാൾ മലയാളത്തിലേക്ക് പരിഭാഷ ചെയ്തത് ആണിത്. MRR ആരാണ് എന്നത് വ്യക്തമല്ല.

ഗ്രന്ഥപാരായണതല്പരസംഘത്തിന്റെ ശ്രമഫലമായാണ് ഈ കൃതി പ്രസിദ്ധം ചെയ്തിരിക്കുന്നത്. അതിന്റെ അക്കാലത്തെ സെക്രട്ടറി ചെങ്ങന്നൂർ വി.ജി. തോമസ്സ് ആണെന്ന് പുസ്തത്തിലെ വിവിധ കുറിപ്പുകളിൽ നിന്ന് വ്യക്തമാകുന്നുണ്ട്.

ഈ പുസ്തകത്തിന്റെ പ്രസിദ്ധീകരണ വർഷം പുസ്തകത്തിൽ നിന്നു വ്യക്തമല്ല. കേരളവർമ്മയുടെ ഒരു എഴുത്ത് ഈ പുസ്തകത്തിൽ എടുത്ത് ചേർത്തിട്ടുള്ളതിലെ തീയതി ഏകദേശം 1911 ആണ്.

ഗ്രന്ഥപാരായണതല്പരസംഘത്തിന്റെ വകയായി ആദ്യത്തെ പുസ്തകം അനസ്തയ എന്ന പുസ്തകം 1912 ആദ്യം പ്രസിദ്ധം ചെയ്തു എന്ന് മുഖക്കുറിപ്പിൽ നിന്നു വ്യക്തമാകുന്നുണ്ട്. അതിനു ശേഷം പുസ്തകങ്ങൾ പ്രസിദ്ധം ചെയ്വാൻ താമസം വന്നു എന്നും ഇപ്പോൾ 2,3,4 പുസ്തകങ്ങൾ ഒരുമിച്ചു പ്രസിദ്ധീകരിക്കുന്നു എന്നും കാണാം. ഇൻഡ്യൻ സാഹിബ് അഥവാ നല്ല കുട്ടികൾ എന്ന ഈ പുസ്തകം രണ്ടാമത്തെ പുസ്തകം ആണ് എന്നു കാണാം.

ഇതൊക്കെ കൊണ്ട് ഈ പുസ്തകം പ്രസിദ്ധം ചെയ്തത് 1912 അവസാനമോ അതിനു ശെഷമോ ആണ് എന്ന് ഏകദേശം പറയാം എന്നു മാത്രം.

പുസ്തകത്തിന്റെ പരിഭാഷ MRR എന്നു കൊടുത്തിട്ടുണ്ടെങ്കിലും അത് ആര് എന്നതു വ്യക്തമല്ല. അതേ പോലെ മൂലരചയിതാവ് ആര് എന്നതും വ്യക്തമല്ല.

പുസ്തകത്തിലെ വിഷയത്തിന്റെ വിശകലനം ഈ മേഖലയിൽ അറിവുള്ളവർ ചെയ്യുമല്ലോ. കൂടുതൽ ഉപയോഗത്തിനും വിശകലനത്തിനുമായി പുസ്തകത്തിന്റെ ഡിജിറ്റൽ പതിപ്പ് പങ്കു വെക്കുന്നു.

ഡൗൺലോഡ് വിവരങ്ങൾ

Google+ Comments

Posted in കേരളകല്പദ്രുമം പ്രസ്സ്, ശരത് സുന്ദർ ശേഖരം | Leave a comment

1920 ബ്രഹ്മരഹസ്യം

ആമുഖം

ബ്രഹ്മരഹസ്യം എന്ന പേരിൽ വൈദ്യശാസ്ത്രവുമായി ബന്ധപ്പെട്ട്, അലശക്കോടത്തു ശങ്കരപ്പിള്ള തമിഴിൽ നിന്നു മലയാളത്തിലേക്ക് പരിഭാഷപ്പെടുത്തിയ ഗ്രന്ഥത്തിന്റെ ഡിജിറ്റൽ സ്കാനാണ് ഇന്നു പരിചയപ്പെടുത്തുന്നത്.

ഈ പുസ്തകത്തിന്റെ സ്കാൻ നമുക്ക് ശരത്ത് സുന്ദർ  വഴിയാണ് ലഭിക്കുന്നത്. ഡിജിറ്റൈസ് ചെയ്യാനായി ഈ അമൂല്യഗ്രന്ഥങ്ങളുടെ കോപ്പി ലഭ്യമാക്കുന്ന ശരത് സുന്ദറിനു പ്രത്യേക നന്ദി.

ഈ പുസ്തകം സ്കാൻ ചെയ്ത റെസലൂഷൻ കുറവായിരുന്നതിനാൽ ഇതിന്റെ ഔട്ട്പുട്ട് അത്ര നന്നായിട്ടില്ല. എങ്കിലും ഉള്ളടക്കം വായിക്കാവുന്നത്. ടൈറ്റിൽ പേജ് അടക്കം ചില താളുകൾ നഷ്ടപ്പെട്ടിരുന്നതിനാൽ പ്രസിദ്ധീകരണത്തീയതിയും മറ്റും ഊഹിച്ചെടുക്കാനേ സാധിക്കുന്നുള്ളൂ.

പുസ്തകത്തിന്റെ വിവരം

  • പേര്: ബ്രഹ്മരഹസ്യം 
  • താളുകൾ: 60
  • രചയിതാവ്: അലശക്കോടത്തു ശങ്കരപ്പിള്ള
  • പ്രസ്സ്:ശ്രീരാമവിലാസം പ്രസ്സ്, വലിയകട, കൊല്ലം
  • പ്രസിദ്ധീകരണ വർഷം: 1920
1920 ബ്രഹ്മരഹസ്യം

1920 ബ്രഹ്മരഹസ്യം

ഉള്ളടക്കം

വൈദ്യശാസ്ത്ര സംബന്ധിയായ പുസ്തകമാണിത്. പുസ്തകം മൂന്നുഭാഗങ്ങളായി തിരിച്ചിരിക്കുന്നു.  ഇതിലെ വിഷയം പഠിച്ച് പൊസ്റ്റെഴുതാൻ എനിക്കു അറിവില്ല. അത് ഈ വിഷയത്തിൽ താല്പര്യമുള്ളവർ ചെയ്യുമല്ലോ.

പുസ്തകം ഇറങ്ങിയത് 1920 ആണ് എന്നത് പുസ്തകത്തിന്റെ ആദ്യത്തെ താളുകളിൽ കാണുന്ന നാരായണൻപരമെശ്വരൻ മൂസ്സിന്റെ കുറിപ്പിലെ തീയതിയിൽ നിന്നും ഊഹിച്ചെടുത്തതാണ്. മാത്രമല്ല സംവൃതോകാരത്തിനുപയോഗിച്ചിരിക്കുന്ന ചിഹ്നവും (ഉകാരചന്ദ്രക്കല) പ്രസിദ്ധീകരണ വർഷം ഏകദേശം 1920 ആണെന്ന സൂചന നൽകുന്നു.

കൂടുതൽ ഉപയോഗത്തിനും വിശകലനത്തിനുമായി പുസ്തകത്തിന്റെ ഡിജിറ്റൽ പതിപ്പ് പങ്കു വെക്കുന്നു.

ഡൗൺലോഡ് വിവരങ്ങൾ

Google+ Comments

Posted in ശ്രീരാമവിലാസം പ്രസ്സ് | Leave a comment

1893 – തൃശൂർ ഭാഗത്തെ ചില ക്രൈസ്തവപള്ളികളെ സംബന്ധിച്ചുണ്ടായ 2 വിധിന്യായങ്ങൾ

തൃശൂർഭാഗത്തെ ചില ക്രൈസ്തവപള്ളികളെ സംബന്ധിച്ച് ഏകദേശം 1893ൽ ഉണ്ടായ 2 വിധിന്യായങ്ങളുടെ ഡിജിറ്റൽ സ്കാനാണ് ഇന്നു പങ്കു വെക്കുന്നത്. ഈ രണ്ട് വിധി ന്യായങ്ങളും ആ സമയത്ത് കേരള സുറിയാനി സഭകളിൽ അക്കാലത്തുണ്ടായ പിളർപ്പുമായി ബന്ധപ്പെട്ട് ഉണ്ടായതാണ്. ഒരു വിധി ന്യായം ഇംഗ്ലീഷിലും മറ്റൊന്ന് മലയാളത്തിലും ആണ്. ഇത്തരം വിധിന്യായങ്ങൾ ഒക്കെ കേരളക്രൈസ്തവസഭകളുടെ ചരിത്രത്തിന്റെ ഭാഗമായതിനാൽ ഇത് ആർക്കൈവ് ചെയ്യപ്പെടേണ്ടതാകുന്നു എന്ന് ഞാൻ കരുതുന്നു. അതിനാൽ ഇത് സ്കാൻ ചെയ്ത് പങ്കു വെക്കുന്നു.

തൃശൂർ ഭാഗത്തെ ചില ക്രൈസ്തവപള്ളികളെ സംബന്ധിച്ചുണ്ടായ 2 വിധിന്യായങ്ങൾ

തൃശൂർ ഭാഗത്തെ ചില ക്രൈസ്തവപള്ളികളെ സംബന്ധിച്ചുണ്ടായ 2 വിധിന്യായങ്ങൾ

സ്കാൻ ചെയ്യാനായി കൈയ്യിൽ കിട്ടിയ രേഖ കാലപ്പഴക്കം മൂലം പൊടിഞ്ഞു തുടങ്ങിയതിനാൽ പരമാവധി വിവരങ്ങൾ ആർക്കൈവ് ചെയ്യത്തക്ക വിധം അതേ പോലെ സ്കാൻ ചെയ്ത് എടുക്കുകയാണ് ചെയ്തത്. അതിനാൽ തന്നെ കൂടുതൽ പ്രോസസ് ചെയ്യുന്നതിൽ കാര്യമില്ലല്ലോ.

ഈ രേഖകൾ ഡിജിറ്റൈസേഷനായി ലഭ്യമാക്കിയ ശ്രീവിദ്യാരത്നപ്രഭാ അച്ചുകൂടത്തിന്റെ പിന്മുറക്കാരനായ ശ്രീ. ജയിംസ് പാറമേലിനു നന്ദി.

ഇതിലെ വിഷയം പഠിച്ച് പൊസ്റ്റെഴുതാൻ എനിക്കു അറിവില്ല. അത് ഈ വിഷയങ്ങളിൽ താല്പര്യമുള്ളവർ ചെയ്യുമല്ലോ.

 

Google+ Comments

Posted in ശ്രീവിദ്യാരത്നപ്രഭാ അച്ചുകൂടം | Leave a comment