Kuba

Kuban Tazovaldkund
República de Cuba

Flag	Valdkundznam
Pälidn	Havan
Eläjiden lugu (2012)	11 163 934 ristitud
Pind	110 860 km²
Kel'	ispanijan
Valdkundan pämez'	Raul' Kastro
Päministr	hän-žo
Religii	hristanuskond
Valüt	kuban peso (CUP)  konverturuidud kuban peso (CUC)
Internet-domen	.cu
Telefonkod	+53
Aigvö	tal'vel UTC-5, kezal UTC-4

Kuba (isp. Cuba), oficialižikš — Kuban Tazovaldkund (isp. República de Cuba), oficialitomikš vspäi 1959 — Joudjuden Sar', om sar'hine valdkund Kariban meren pohjoižpalas. Sen päine da kaikiš suremb lidn om Havan.

Istorii

Vl 1895 sügüz'kus Kuba tedoti ičeze ripmatomudes Ispanijaspäi. Vl 1898 tal'vkun 10. päiväl Ispanii tundišti sidä da tegihe Kuban dominionaks, no päliči severdan kus ispaniž-amerikaine soda zavodihe, i Kuba putui AÜV:oiden ohjandusen alle. Vl 1902 semendkun 20. päiväl Kuba sai ripmatomut okkupacijan lopindan satuseks da tegihe tazovaldkundaks.

Geografijan andmused

Kuban topografine kart.

Valdkund otab Kuban saren, Huventud-saren da äjiden penembiden sariden territorijoid Suriden Antiliden sariden mülündas. Kuba om jagadud Pohjoižamerikaspäi Atlantižen valdmeren Floridan sal'mel pohjoižes da Jukatanan sal'mel päivlaskmas. Matkad AÜV:oihesai Floridan sal'men kal't om 180 km (kaikiš kaidas sijas), Gaitihesai Tulleipol'žen sal'men kal't — 77 km, Jamaikahasai Kolon-sal'men kal't — 140 km, Meksikhasai Jukatanan sal'men kal't — 210 km. Saren piduz päivlaskmaspäi päivnouzmha om 1250 km. Kariban meren randanpird om 3735 km.

Kubal eile valdkundröunoid madme. Guantanamon sodameribaz om anttud kortomha AÜV:oile Kuban territorii röunanke 28,5 km madme.

Kaikiš korktemb čokkoim om Turkino-mägi, 1972 m meren pindan päl.

Londuseližed pävarad oma kivivoi, londuseline gaz, metallad (raudkivend, vas'k, kobal't, hrom, nikel'), azbest; toižed varad — silikatad, keitandsol, mec, mahuz.

Politine sistem

Kapitolii vl 2012 — Kuban parlamentan ištundoiden sija Havanas.

Kuba om unitarine socialistine parlamentine tazovaldkund.

Rahvahan Tobmuden Nacionaline Suim (isp. Asamblea Nacional del Poder Popular) — se om üks'kodine valdkundan parlament. Deputatoiden lugu om 614 ristitud, heid valitas kerdan 5 vodes. Parlament formiruib ohjastusen da paneb sen pämehen, a mugažo Valdkundan Nevondkundan (31 ühtnijad) pämehen, radnikusele.

Nügüd' ohjastusen pämez' da Valdkundan Nevondkundan pämez' om üks' person, Raul' Kastro. Hänen valdatusiden strok om 5 vot.

Administrativine jagand

   Kacu kirjutuz: Kuban administrativiž-territorialine jagand.

Administrativiž-territorialižikš Kuba alajagase 16 agjaha (provincijha) (isp.: provincia) da specialižhe Huventud-municipijha. Kaik agjad alajagase municipijoihe (isp.: municipio), niid om 169.

Eläjad

Kuban toižed järedad lidnad (enamba 200 tuh. ristitud, surembaspäi penembha): Santjago de Kuba, Kamaguei, Ol'gin, Guantanamo, Santa Klar.

Rahvahanižanduz

Vl 2009 Kuban päeksport oli nikel' (16%), sahar (13%), zelläd da vakcinad (13%), sigarad (10%); toine eksport — vin (5%), merenproduktad (3%), toižed metallad (2%), cement (2%), kivivoi (1%), raud (1%).

Irdkosketused

• Kuban Tazovaldkundan parlamentan oficialine sait. (isp.)
• Kuban Tazovaldkundan ohjastusen oficialine portal. (isp.)
• ONE — Kuban Statistikan nacionaline radnikoičend. (isp.)