អេស្ប៉ាញ

ប្រទេសអេស្ប៉ាញ ហៅពេញថា រាជាណាចក្រអេស្ប៉ាញ គឺជាប្រទេសមួយស្ថិតនៅអឺរ៉ុបខាងត្បូង និងតាមភូមិសាស្ត្រទូទៅ ស្ថិតនៅភាគខាងលិចអឺរ៉ុប ដែលគ្របដណ្ដប់មួយភាគធំនៃឧបទ្វីបអ៊ីបេរីក។ នៅក្នុងឆ្នាំ២០០៩ ប្រទេសនេះមានប្រជាជនចំនួន ៤៦ លាននាក់ ដែលស្ថិតក្នុងចំណាត់ថ្នាក់ទី២៩ ក្នុងចំណោមប្រទេសដែលមានប្រជាជនច្រើនលើពិភបលោក។ ប្រទេសអឺរ៉ុបមួយនេះធ្លាប់ជាមហាអំណាចមួយខាងអាណានិគម និងជាមហាអំណាចសេដ្ឋកិច្ច និងយោធាដ៏ធំមួយលើពិភពលោកផងដែរ។ ប៉ុន្តែ ឥទ្ធិពលរបស់ប្រទេសនេះបានចាប់ផ្ដើមធ្លាក់ចុះ ចាប់ពីពេលដែលខ្លួនបាត់បង់អាណាខេត្រនិគមរបស់ខ្លួនមក ពោលគឺចាប់ពីសតវត្សរ៍ទី១៩។

ប្រទេសអេស្ប៉ាញ ភាគខាងត្បូង និងខាងកើតមានសមុទ្រម៉េឌីទែរ៉ាណេ លើកលែងដែនដីរបស់អង់គ្លេសឈ្មោះ ហ្ស៊ីប្រាតា និងដៃសមុទ្រដែលមានឈ្មោះដូចគ្នានេះ។ ដៃសមុទ្រនេះជាព្រំដែនពុះចែកទ្វីបអឺរ៉ុប និងអាព្រិច។ នៅភាគខាងជើង ជួរភ្នំពីរ៉េណេគឺជាព្រំដែនធម្មជាតិជាមួយប្រទេសបារាំង អង់ដរ និងឈូងសមុទ្រហ្កាស្កូញ។ ប្រទេសព័រទុយហ្ក័ល និងមហាសមុទ្រអាត្លង់ទិចស្ថិតនៅភាគខាងលិច និងពាយ័ព្យ។ ដែនដីអេស្ប៉ាញបូករួមបញ្ចូលផងដែរទាំងកោះបាឡេអារក្នុងសមុទ្រម៉េឌីទែរ៉ាណេ កោះកាណារីក្នុងមហាសមុទ្រអាត្លង់ទិចនៅក្បែរច្រាំងសមុទ្រខាងទ្វីបអាព្រិច និងក្រុងស្វយ័តនៅទ្វីបអាព្រិចខាងជើង សឺតា និងមឺលីឡា ដែលនៅជាប់នឹងប្រទេសម៉ារ៉ុក។ បន្ទាប់ពីប្រទេសបារាំង ជាមួយនឹងផ្ទៃដីទំហំ ៥០៤ ០៣០ គីឡូម៉ែត្រក្រឡា អេស្ប៉ាញគឺប្រទេសដែលធំទូលាយជាគេនៅអឺរ៉ុបភាគខាងលិច និងនៅសហគមន៍អឺរ៉ុប។

ព្រះរាជាណាចក្រអេស្ប៉ាញ