Latin

Li latin lingue (lat. lingua latina) es un indo-europan linge, quel originarimen ha esset parlat del Latines, li habitantes de Latium con Rome quam centre. Li max tost attestas veni ex li 5m o 6m secul ante Christ. Desde li 3m secul a. C. existe plu long textus. Su plen form quam classic latin, li lingue ha attin’et in li unesim secul a. C.

Latin ha esset li official lingue del Roman Imperia e evoluet al dominant vehiculari lingue in li west del mediterraneic region. Ex li parlat vernaculari lingue, li vulgari latin, crescet li romanic lingues. Ma li latin del roman autores restat till li modern epocha li guidant lingue in litteratura, scientie, politica e ecclesie. Erudites quam Thomas de Aquin, Petrarca, Erasmus de Rotterdam, Luther, Copernic, Descartes o Isaac Newton scrit ovres in latin. Till li 19m secul li letiones in li tot europa ha esset fat in latin. In Polonia, Hungaria e in li Sacri Roman Imperia latin esset li official lingue. In millenes de pruntat paroles latin es present anc in non-romanic lingues quam german o anglés. Por li formation de nov termines on ancor hodie usa latin.

Pro su enorm significantie por li lingual e cultural evolution de europa, latin es instructet in mult scoles e universitates. Por quelc cursus es postulat un conossentie de latin.