Moda cantada a Dusseldorf ( Germania 1970 ) in occasione de gara poetica cun Frantziscu Mura e Mario Masala ( registrada in domo privada in su 1987 ) MODA CANTADA A DUSSELDORF PRO SOS EMIGRADOS SARDOS CUN M. MASALA E F. MURA Che un'umiliad'ambasciadore benzo dai sa patria lontana e narat su messagiu chi mi dana a frimmare tratados de onore. Sa gioventude Sarda, su fiore est part'inoghe perdende salude allu chi s'est fatende s'ora tarda su fior' 'e sa gioventude Sarda est part'inoghe perdende salude su fior' 'e sa sarda gioventude allu chi s'est fatende s'ora tarda su fior' 'e sa gioventude sarda est perdende salude part'inoghe. De sa Sardigna intendide sa 'oghe, a s'apellu corale rispondide fizos de una mama sant'e digna. Intendide sa 'ogh' 'e sa Sardigna, a s'apellu corale rispondide de sa Sardigna sa 'ogh'intendide fizos de una mama sant'e digna intendide sa 'ogh' 'e sa Sardigna fizos de una mama dign'e santa promitide chi tzenset de pianta sa vida emigrada in terr'anzena. Sezis paritzos annos in iscena ingrussende sos capitales mannos, creschende sos anzenos antipitzos. Sezis in iscena annos paritzos ingrussende sos capitales mannos, sezis in iscena paritzos annos sos antipitzos anzenos creschende sas fisicas riservas consumende de chie s'est pro 'ois ispozada. In terr'anzena sa vida emigrada. Sa presentzia 'ostra est invocada fintz'in sa miss'a s'usanzia nostra comente non bos toccat sa cussentzia? Est invocada sa 'ostra presentzia fintz'in sa miss'a s'usanzia nostra est invocada sa presentzia 'ostra comente non bos toccat sa cussentzia? Est invocada sa 'ostra presentzia comente sa cussentzia non bos toccat? Est una mama chi fizos invocat Che ch'in coro at mortale ferida. In terr'anzena s'emigrada vida. Ammentade de vena fiorida e a sa cost'Ismeralda pensade de chentu mizas turistas piena. Ammentade de fiorida vena e a sa Cost'Ismeralda pensade de vena fiorida ammentade de chentu mizas turistas piena ammentade de fiorida vena piena de turistas mizas chentu. Limbara, Corruboe, Gennargentu, Olbia, sa Caletta e Tavolara in su sardu folklore brillant oe. Limbara, Gennargentu,Corruboe Olbia, sa Caletta e Tavolara Corruboe, Gennargentu e Limbara in su sardu folklore brillant oe Limbara, Gennargentu, Corruboe Brillant oe in su sardu folklore. Cantos turistas tenene s'onore de andar in Sardigna e li dan bantos sos giornales nde giughen largas listas. S'onore tenene cantos turistas de visitare su sard'orizonte. Platamona, Pelosa, Porto Conte e totaganta sa marina zona da-i Casteddu finament'a Bosa. Platamona, Porto Conte, Pelosa e totaganta sa marina zona Pelosa, Porto Conte, Platamona dai Casteddu finament'a Bosa, Platamona, Porto Conte, Pelosa visitan sos nuraghes chi bi sunu , finzament'a sas grutas de Nettunu u'est s'etern'incant'ammajadore. Caros frades, su patriu valore pro vanas violeras trascurades, su patriu valore, caros frades trascurades pro violeras vanas, abbas friscas de rios e funtanas montes, baddes, collinas e pendios, abbas friscas de funtanas e rios badde, montes, pendios e collinas in nois sunt de oro sas codinas mentres chi las trascurades bois, sas codinas de oro sunt in nois mentre chi bois las trascurades. Pane mezus de trigu no agatades mancari chi giredas terr' e mare. Como sos c'ant gana 'e tribagliare chimicos impiantos sunt in vena. Est terr' 'e milli gratzias piena cantu sos mezus centros de su mundu. Bastat cunservo de su coro in fundu s'amicitzia nostr'in cant'osservo ma su lassare a bois m'addoloro. Bastat cunservo in fund' 'e su coro s'amicitzia nostr'in cant'osservo bastat in fund' 'e su coro cunservo s'affetu chi bos apo e chi bos rendo unu distach'in petta 'ia intendo da-i carr'a ung'intro s'anima mia, intend'unu distach'in petta 'ia, ma no mi restat che dare un'adiu e bos isetto in su logu nadiu cando torrades prosperos e sanos cojuados, bajanas e bajanos su presidente e-i su cumitadu e don Formia zelante pastore. Andet a bois gloria e onore ch'azis sa bella festa organizadu, gratzi' 'e sa zentile richiesta. c'organizad'azis sa bella festa tenid'in alt' 'e s'isula s'insigna finzamentas a s'ultim'esistentzia a totu, caros fizos de Sardigna de Dusseldorf in custa residentzia bona fortun' 'e bona permanentzia.

• published: 15 May 2010
• views: 3493