“APPUNTAMENTI FL-APPARTAMENTI” biljetti għall-kummiedja u għat-trasport: 79271921 jew 98110142. Il-Ġimgħa, 29 ta’ April 2016 fis-7.30PM Is-Sibt, 30 ta’ April 2016 fis-7.30PM ġewwa t-teatru ta’ ‘Dar ta’ Fra Diegu’, Triq Villambrosa, il-Ħamrun. Id-dħul tad-donazzjonijiet se jmur kollu b’risq ‘Dar Fra Diegu’. titlu oriġinali: “Tailleur pour Dames” kummiedja fi tliet atti fuq kitba tal-awtur Franċiż, Georges Feydeau adattament għat-teatru Malti u traduzzjoni ta’ Ronald Saliba direzzjoni ta’ Carmen Galea It-tabib Oscar (Sandro Vella) u Sarah (Odette Portelli Taliana) ilhom miżżewġin sitt xhur. Oscar huwa ħafna iżgħar minn Sarah fiż-żmien. Lino Piccinino (Ernest Attard) u Sandra Piccinino (Lydia Portelli) huma miżżewġin ukoll u Lino huwa ħafna ikbar minn Sandra fiż-żmien. Sandra tħobbhom kbar imma Oscar mhux bħalha b’hekk jibda jinnamra ma’ Sandra bil-moħbi ta’ kulħadd. Li jiġri huwa li Sarah tibda tinduna li Oscar qiegħed iħawwad xi ħaġa u allura Oscar jiddeċiedi li jikri appartament mingħand Lukard (Michael Stivala) biex jibda jinnamra ma’ Sandra hemmhekk. Dan l-appartament ikun qrib ħafna ta’ fejn joqgħod Oscar biex b’hekk malli Sarah tibda xxomm xi ħaġa, Oscar ma jkollux wisq tul biex imur lura lejn l-appartament propja tiegħu u jkollu skuża tajba bħal li mar xi jagħmel passiġġata biex jirqaq. Dan l-appartament il-ġdid li jikri Oscar ikun ta’ ħajjata li m’għadhiex toqgħod ġewwa fih. Lino Piccinino jidħol għall-għarrieda fl-appartament tal-ħajjata u jsib lil Oscar mgħannaq ma’ Sandra. Oscar jinforma lil Lino li huwa ħajjat u li kien qiegħed ifassal libsa ġdida għal Sandra. Lino, bil-moħbi ta’ Sandra, jinforma lil Oscar li hu għandu maħbuba jisimha Rożina (Louis Gatt) u li ftiehem magħha biex jibda jinnamra magħha bil-moħbi fl-appartament tal-ħajjat. Ma kienx jaf Lino li Oscar u Rożina kienu namrati meta kienu studenti fl-Università. Kunċett (Josephine Mahoney), omm Sarah, tinduna li Oscar qiegħed iħawwad man-nisa u tinsisti ma’ bintha biex hi tibda tgħix u torqod magħhom fl-appartament. Oscar xejn ma jieħu pjaċir b’din id-deċiżjoni imma jkollu xi jgħid ma’ Gejtan (Jean Claude Borg), is-seftur defsa u għażżien tat-tabib Oscar, li xejn ma jaqbel li l-patrun tiegħu joqgħod ikeċċi lill-kunjata mill-appartament. B’sorpriża għal kulħadd Gejtan ikollu grazzja ma’ Kunċett għax it-tnejn jaqblu u jindaħlu fejn ma jesagħhomx. L-inkwiet għal Oscar ikompli jikber meta klijenta ta’ ħajjata, Klotilde (Mary Attard) tippretendi li jnaqqsilha l-flus ta’ libsa li ħititilha. Klotilde, bħal Lino, ukoll taħseb li Oscar huwa ħajjat flok tabib, u li jismu Pierre Cardin, artist Franċiż famuż għall-ħjata tiegħu. Il-problema speċi tissolva għaliex waqt li Oscar joqgħod jagħmilha ta’ ħajjat f’appartament numru tlieta, hemm Lukard u Gejtan li jilbsu l-ġagaga fl-appartament tat-tabib. Dawn huma l-“Appuntamenti fl-Appartamenti” li se taraw il-Ġimgħa, 29 ta’ April 2016 fis-7.30pm u s-Sibt, 30 ta’ April 2016 fis-7.30pm fit-teatru ta’ ‘Dar Fra Diegu’, Triq Villambrosa, il-Ħamrun. “Appuntamenti fl-Appartamenti” hija kummiedja kollha daħk tal-awtur Franċiż, Georges Feydeau bl-isem oriġinali ta’ “Tailleur pour Dames” u adattament u traduzzjoni għat-teatru Malti ta’ Ronald Saliba. Direzzjoni ta’ Carmen Galea taħt il-kumpanija teatrali “Ilħna Ferrieħa”. Qiegħed jiġi organizzat trasport għas-Siġġiewin kollha u tal-madwar b’ħajr lill-Gloria Callus, segretarja ta’ ‘Grupp Solidarjetà is-Siġġiewi’ u trasport għall-Misidjani kollha bl-għajnuna ta’ Bella Zammit. Id-dħul tad-donazzjonijiet se jmur kollu b’risq ‘Dar Fra Diegu’. Biex tirriserva l-post tiegħek fit-teatru ċempel fuq numru ċellulari 79271921 jew 98110142. “Ilħna Ferrieħa” hija kumpanija teatrali li ddur Malta kollha u toffri kollox bla ħlas għall-volontarjat. Il-kumpanija “Ilħna Ferrieħa” ittella’ serati, drammi u kummiedji u d-dħul kollu jmur għan-nies fil-bżonn. Ħajr lill-grupp volontarju “Grupp Solidarjetà is-Siġġiewi” tal-għajnuna u kollaborazzjoni li joffru lill-kumpanija teatrali “Ilħna Ferrieħa”.

• published: 04 Apr 2016
• views: 65