NAIA Terminal 2, Pasay City | Speech (Full text) below | Audio | http://www.pcoo.gov.ph/pnoy/Pnoy%20Speech%20Departure%20Indonesia,%20Oct%2009,%202014.mpg.mp3 | Secretary Leila de Lima; Brother Armin Luistro; Secretary Voltaire Gazmin; Secretary Ike Ona; Secretary Dinky Soliman; Secretary Gil delos Reyes; Secretary Mon Paje; Secretary Mar Roxas; Secretary Mario Montejo; Secretary Cesar Garcia; Chairman Francis Tolentino; Secretary Sonny Coloma; Chair Tati Licuanan; Commissioner Joel Rocamora; Secretary Ronaldo Llamas; Commissioner Kim Henares; Secretary Cesar Villanueva: Magandang hapon po sa inyong lahat. Ngayong hapon, lilipad po tayo patungo sa Indonesia upang dumalo sa ikapitong Bali Democracy Forum. Sa imbitasyon po ng kaibigan nating Pangulong Susilo Bambang Yudhoyono, magsisilbi tayong kapwa-tagapangulo ng talakayan hinggil sa kalagayan ng demokrasya sa ating rehiyon. Ikinalulugod ko pong ibalita sa inyo na bahagi rin ng ating pagdalo ang pagtanggap ng parangal na “Bintang Republik Indonesia Adipurna,” ang pinakamataas na medalya ng karangalan sa Indonesia. Malinaw po sa akin na ang karangalang ito ay hindi lamang pagkilala sa mga nagawa ko bilang indibidwal, kundi pati na rin sa kolektibong pakikilahok ng bawat disenteng Pilipino upang isulong ang demokrasya. Sagisag din po ito ng mahaba at matibay nating pakikipag-ugnayan sa Indonesia: Mula pa noong panahon ng kolonyalismo, ang mamamayan ng Pilipinas at Indonesia ay nagpakita na ng pagtutulungan, pagdadamayan at pagkakaisa. At nang makamit ang kalayaan, bilang kapatid na republika, lagi nating kabalikat ang Indonesia sa pagtugon sa sakuna, sa pagpapasigla ng ekonomiya, at sa pagtataguyod ng kapayapaan at stabilidad sa ating rehiyon. Gagamitin rin natin ang pagkakataong ito upang magbigay-pugay at magpasalamat kay Pangulong Yudhoyono. Hindi lamang siya kapwa-pinuno sa ASEAN, isa rin siyang matalik na kaibigan. Buo at walang-maliw ang ibinigay niyang suporta sa atin, lalo na sa ating pakikipagnegosasyon at pakikipagkasunduan sa MNLF at MILF, at sa pagsusulong ng mapayapa at makatuwirang resolusyon sa usapin ng teritoryo. Nitong Mayo 2014 nga po, napirmahan na ang kasunduan hinggil sa maritime boundaries ng Pilipinas at Indonesia, at ng kaakibat nitong mga karapatan sa dagat. Isa po itong modelo ng mahusay na pagsasara ng isang komplikadong negosasyon, na nagawa ng dalawang bansang may pundasyon ng tiwala at respeto sa isa’t isa. Pagdating naman sa usapin ng South China Sea, kasama natin si Pangulong Yudhoyono sa paggigiit na ang pamamayani ng batas ang pinakamapayapa at produktibong batayan ng pagresolba sa ating pagkakaunawaan. Taos-pusong pasasalamat ang ipapaabot natin sa ipinapakita niyang malasakit sa Pilipinas at sa Pilipino. Makakaasa po kayo na kahit nasa labas ng bansa ay patuloy tayong nakatutok sa kalagayan ng ating mga kababayan, lalo na sa mga pamilyang kinailangang ilikas dahil sa nakaambang pagputok ng bulkang Mayon. Nagbigay na po ako ng direktiba kina Secretary Mar Roxas at Dinky Soliman na gawin ang kinakailangang koordinasyon upang matugunan ang pangangailangan ng ating mga kababayan. Ang ulat po sa atin ni Secretary Mar, 54,000 food packs ang target na maipamahagi simula sa Linggo. Handa rin po tayong magpamahagi ng hanggang 540,000 food packs, depende sa pangangailangan. Ayon naman po kay Governor Joey Salceda, batay sa mga nagawang pag-aaral, maaaring umabot ng hanggang anim na buwan ang pag-aalboroto ng bulkan. Siyempre po, hindi naman natin puwedeng pabayaan ang mga kababayan nating posibleng magtagal pa sa evacuation centers. Sa bisa po ng Section 3(J) at 22 ng Philippine Disaster Risk Reduction and Management Act of 2010, naglaan na tayo ng pondong magagamit sa pagtulong sa lokal na pamahalaan ng Albay. Hindi po tayo magtatagal sa Indonesia; bukas ng gabi, muli tayong lalapag sa Pilipinas. Maikli man po ang biyahe, napakalaki po ng balik nito sa pagpapatibay ng ating ugnayan sa mga kapatid natin sa ASEAN at sa iba pang bansa sa rehiyon. Malinaw po ang ating paninindigan: Kasabay ng pag-asikaso sa agaran at pang-araw-araw na pangangailangan ng ating mga Boss, tuloy-tuloy din ang pagtuon natin sa pangmatagalang kapakanan ng bansa. Makakamit po natin ito sa pamamagitan ng mas malakas at mas mapayapang ugnayang panlabas, na nakatuntong sa mga prinsipyo at adhikaing nagbibigkis sa buong sangkatauhan. Magandang hapon po muli. Maraming salamat po sa inyong lahat. ***

• published: 09 Oct 2014
• views: 142