Ministrja Kodheli priti sekretarin e Përgjithshëm të NATO, Jens Stoltenberg

• published: 11 Dec 2015
• views: 24

Ministrja e Mbrojtjes, znj. Mimi Kodheli, priti në takim në Ministrinë e Mbrojtjes Sekretarin e Përgjithshëm të NATO, z. Jens Stoltenberg, i cili ndodhet për një vizitë zyrtare në vendin tonë. Gjatë këtij takimi ministrja Kodheli dhe z. Stoltenberg diskutuan lidhur me sfidat aktuale të sigurisë me të cilat po përballet sot Aleanca. Znj. Kodheli siguroi Sekretarin e Përgjithshëm të NATO, z. Jens Stoltenberg se, Forcat e Armatosura të Shqipërisë do të vazhdojnë të rrisin gatishmërinë e tyre, në mbështetje të mbrojtjes kolektive, si dhe në detyrat e tjera kryesore të NATO. Në pritje të zhvillimit të Samitit të Varshavës, duhet të synojmë një qasje të re për mbrojtjen e Aleancës, - theksoi Ministrja Kodheli, - ku një nga shtyllat më të rëndësishme mbetet zbatimi i Planit të Gatishmërisë për Veprim. Në këtë drejtim, ministrja Kodheli deklaroi mbështetjen tonë të vazhdueshme, për të cilën z. Stoltenberg shprehu mirënjohjen e tij. Rritja e Buxhetit të Mbrojtjes për vitin 2016 në masën 12%, është një arritje e madhe për Forcat e Armatosura, - nënvizoi znj. Kodheli, - pasi ky është një tregues pozitiv dhe mbështet vendimet e marra në Samitin e Uellsit. Këto para do të përdoren në mënyrë efikase, në veçanti, për rritjen e kapaciteteve dhe modernizimin e Forcave të Armatosura. Në të njëjtën linjë, z. Stoltenberg u shpreh mjaft i kënaqur me këtë trend pozitiv në rritje të buxhetit të mbrojtjes të Shqipërisë. Ai tha se, Shqipëria është një vend i vogël, por me kontribute reale dhe të prekshme në Aleancë. Shqipëria do të vazhdojë angazhimin e saj në Forcën e Reagimit të Shpejtë të NATO (VJTF) për vitet 2016 - 2018, në nivel kompanie. Kontributi i Shqipërisë në operacionet dhe misionet e NATO, si në Afganistan, në Kosovë etj, ka qenë konsistent dhe tregon besueshmërinë tonë si vend aleat, theksoi më tej ministrja e Mbrojtjes Kodheli. Ftesa e bërë Malit të Zi lidhur me bisedimet për pranimin e saj në Aleancë, ishte një tjetër çështje në të cilën u ndalën dy zyrtarët e lartë, të cilët e cilësuan si një hap i fortë dhe pozitiv për rajonin. Shqipëria ka mbështetur plotësisht këtë vendim dhe do të vazhdojë të mbështesë Politikën e “Dyerve të Hapura” të Aleancës. Në lidhje me zhvillimet në Kosovë, ministrja Kodheli dhe kreu i NATO Stoltenberg nënvizuan rëndësinë e vazhdimit të misionit të KFOR në Kosovë, duke ndjekur situatën në terren dhe jo një kalendar të caktuar kohe. Gjithashtu, Shqipëria beson në hapjen e një faqe të re bashkëpunimi NATO - Kosovë. Për sa i përket dialogut me Serbinë, pala jonë theksoi se ky dialog duhet të jetë i sinqertë, i hapur, por në të njëjtën kohë i kujdesshëm, në lidhje me disa kërkesa apo propozime nga pala serbe. Duke u ndalur tek terrorizmi dhe migracioni si çështje mjaft shqetësuese për shoqërinë në të cilën jetojmë, u theksua se vendet aleate duhet të jenë vigjilentë për adresimin e këtyre kërcënimeve. Kryerja e analizave strategjike, ndjekja dhe monitorimi i situatës, shkëmbimi i informacionit dhe bashkëpunimi me Bashkimin Evropian do të ishin mjete të cilat do të na ndihmonin në këtë situatë emergjente, - theksoi ministrja Kodheli. Në fund, ministrja e Mbrojtjes Kodheli i theksoi Sekretarit të Përgjithshëm të NATO, z. Jens Stoltenberg, përpjekjet që po bëhen për krijimin e Qendrës së Ekselencës në Shqipëri, për adresimin e fenomenit të luftëtarëve të huaj. Kjo iniciativë ka marrë mbështetje të konsiderueshme nga shumë aleatë, partnerë dhe autoritete ushtarake (si SACEUR). Nga ana e tij, z. Stoltenberg e mirëpriti këtë propozim dhe theksoi se mbetet i hapur për më shumë informacione dhe për diskutime të mëtejshme.