Ar bleizi a zo bronneged kigdebrer eus kerentiad ar c’h-Canidae. Kar int d’ar chas (Canis lupus familiaris). Kavet e vezont dre ar bed a-bezh ; e broioù Europa ez eo spesad ar bleizi gris (Canis lupus) a gaver.
Dre m’int bet chaseet e-pad pell int aet da get e meur a lec’h : n’o c’haver ket mui e Breizh abaoe dibenn an XIXvet kantved. Disheñvel-bras eo ment ha pouez ar bleizi hervez ar broioù ha brasoc'h int e broioù an hanternoz, evel Alaska. Peurliesañ o devez etre 1 metr hag 1,6 metr a hed hag etre 0,6 ha 0,9 metr a uhelder. Etre 33 ha 62 kg eo o fouez. An hini brasañ zo bet kavet, en Alaska, a boueze 80 kg ; lazhet e oa bet e 1939. Ar re vihanañ eo re an isspesad bleizi Arabia : ar parezed du-hont ne bouezont ket ouzhpenn 10 kg.
Liv o blev zo ur c’hemmesk gris, gell, gwenn, ruz ha du. Hervez an hiniennoù ha hervez al lec’h m’emaint o vevañ e c’hall bezañ disheñvel a-walc’h o liv. Bleizi gwenn a gaver er broioù ma vez erc'h er goañv.
Bevañ a ra ar bleizi a-strolladoù. Peurvuiañ ez eo kar an holl vleizi a gaver en ur strollad : ur c’houblad par ha parez hag o diskennidi. Gant ar parezed e vez un torad bep bloaz, etre miz Genver ha miz Ebrel, ennañ 5 pe 6 a re vihan peurliesañ. Kigdebrerien eo ar bleizi hag en em vagañ a reont diwar preizhoù a bep seurt, bras pe vihan : karveged, lern, logod ha krignerien bihan all, amprevanetaerienr. A-wechoù ivez, e lec’hioù zo, e c’hoarvez gant bleizi debriñ pesked, naeron, glazarded pe evned. Ral a wech e tagont loened doñv, evel deñved, givri pe leueoù.
(
muioc'h...)