කැලණි ගඟට සහ බොල්ගොඩ ගඟට කැළිකසළ දැමූ විසිතුන් දෙනකු පොලිසිය කළ සෝදිසි මෙහෙයුමකදී හසුවූ බව මාධ්‍ය වාර්තා කර තිබිණි. අත්අඩංගුවට ගනු ලැබූ මේ පිරිසෙන් 13 දෙනෙක් කාන්තාවෝ වූහ. මින් එක් කොටසක් මොරටුව මොරටුමුල්ල ප්‍රදේශයෙන් බොල්ගොඩ ගඟට කැළිකසළ දැමූවන් වන අතර අනෙක් කොටස වත්තල පල්ලිවත්ත ප්‍රදේශයෙන් කැලණි ගඟට කැළි කසළ දැමූවෝ වෙති.

කැලණි, බොල්ගොඩ ගංගා පමණක් නොව දිවයිනේ මධ්‍යම කඳුකරයෙන් ඇරැඹී සිවුදිගින් මුහුදට ගලා බසින ගංගා සහ ඔයවල් සංඛ්‍යාව සියයකට අධිකය. පරිසරවේදීන් පෙන්වා දී ඇත්තේ කැළිකසළ හා අපද්‍රව්‍ය දැමීම, වැලි ගොඩ දැමීම වැනි මිනිස් ක්‍රියාකාරකම් නිසා මේ සියලු ජල මූලාශ්‍ර විනාශ මුඛයට ඇදී යමින් පවතින බවය. ජල ධාරිතාව අඩු වී ඇති අතර ජල පෝෂක ප්‍රදේශවලට දැඩි බලපෑමක් එල්ල වී ඇත.

ජලාශ්‍ර ග්‍රහයා ලෙස සැලැකෙන පෘථිවියේ මිනිස් පරිභෝජනයට සුදුසු ජල ප්‍රමාණය ශීඝ්‍රයෙන් අඩු වෙමින් පවතී. ඊට හේතුව මිනිස් ක්‍රියාකාරකම් මිස අනෙකක් නොවේ. මීකොං, නයිල්, ගංගා නම් නදිය, මරේ ඩාලිං වැනි ලෝකයේ විශාලතම ගංගාද බරපතළ ලෙස දූෂණයට ගොදුරු වෙමින් පවතී. එහෙත් ලෝකයේම ජල සම්පත දූෂණය වී ඇතැයි කියා හිත හදාගෙන සිටීමට නොහැකිය. අපේ ජල සම්පත රැකගත යුතුය.
සොබා සෞන්දර්යයෙන් වර්ණවත් වූ, ජෛව විවිධත්වයෙන් අනූන වූ, මේ දිවයිනේ මුළු භූමි ප්‍රමාණයෙන් ...