Qed ikompli jiżdied l-ammont ta' ħaddiema fis-settur privat li qed jiffaċċjaw incertezzi dwar l-impjieg taghhom. Jidher li wara kumpaniji li qed jagħtu jew mistennija jagħtu sensji, issa jidher li mess lill-ħaddiema tal-ST MicroElectronics hekk kif qed jigi rrapurtat li din il-kumpannija, bl-akbar ammont ta' impjiegi fis-settur privat ta' pajjiżna, imponiet leave sfurzat fuq aktar minn mitt ħaddiem tagħha. Dawn il-ħaddiema jaħdmu fis-sezzjoni tal-ST li tipproduċi microchips għall-esportazzjoni. Il-forced leave ġie impost kemm fuq il-managers kif ukoll fuq il-ħaddiema ta' din is-sezzjoni. Il-kumpanija qed issostni li ilha tippjana li din is-sezzjoni tigi rijallokata lejn l-Asja jew l-Afrika ta' Fuq. Madankollu wara negozjati mal-Gvern imexxi mill-amministrazzjoni preċedenti, il-kumpanija kienet ħadet deċiżjoni li ma tiħux dan il-pass. Iżda, issa qed jigi rrapurtat li ħaddiema ta' din il-kumpannija jinsabu inkwetati li l-kumpanija se tagħmel riallokazzjoni ta' partijiet mill-operat tagħha u jekk dan iseħħ ikollha tnaqqas l-ammont ta' impjegati li jaħdmu magħha. It-Taqsima tat-Teknologija u l-Elettronika tal-GWU li tirrappreżenta lil dawn il-ħaddiema għadha ma tkellmitx dwar din is-sitwazzjoni fl-ST MicroElectronics. Din l-aħbar tal-ST MicroElectronics issegwi aħbarijiet oħra dwar ħaddiema li qed jiffaċċjaw inċertezza. Il-ġimgħa li għaddiet, dan l-istazzjon żvela kif numru ta' impjegati tal-Bank Raiffeisen Malta li jinsab f'Tas-Sliema x'aktarx jingħataw is-sensja wara li l-Bank iddeċieda li jnaqqas l-operat tiegħu f'Malta. Il-bank mistenni jittrasferixxi n-negozju tiegħu lejn il-Head Office, fi Vjenna. Fl-istess ġurnata, It-Times of Malta irrappurtat li madwar 40 ħaddiem tal-Lukanda Topaz ingħataw in-notice wara li l-kumpanija li tmexxi l-lukanda f'isem Tumas Group, ma komplietx tmexxi l-lukanda. Aħbar oħra li ħarġet ftit tal-jiem ilu tikkonċerna lill-ħaddiema tal-kumpanija Toly Products, li wkoll mistennija tnaqqas l-impjegati. Sorsi li tkellmu magħna jgħidu li ttieħdet deċiżjoni biex il-kumpanija tnaqqas madwar 30 ħaddiem billi toffrilhom skemi ta' irtirar kmieni. Dan kollu qed iseħħ hekk kif f'pajjiżna kompla jiżdied l-ammont ta' nies jirreġistraw għax-xogħol. Ċifri uffiċjali tal-Uffiċċju Nazzjonali tal-Istatistika juru li l-qgħad f'Mejju kien fil-livell ta' kważi 7,300 persuna.

• published: 23 Oct 2013
• views: 44