Barrita: Sunog sa Fire Prevention Month

NIABOT na og 12 ka sunog sa unang semana pa lang sa buwan sa Marso nga gisaulog isip Fire Prevention Month dinhi sa lalawigan sa Sugbo.

Nagkalain-lain lang ang hinungdan sa sunog gikan sa faulty electrical wiring, gipa­sagdang electrical appliances, kandila ug uban pa.

Pero wa pay motel nga nasunog. Bitaw no, daghan man unta kaayong nagduwa og kalayo didto.

***

Nakasinati na kog sunog. Maayo lang kon makabantay ka kay makahiklin ka pa sa imong mga butang. Kon wa ka diha, abo na lang ang imong maabtan. Suwerte ka kon duna pay uling.

Ang kahibulongan nga atol sa sunog, ang di maalsa sa upat ka mga tawo, madaog lang sa duha. Matod pa sa mga batid, ang adrenaline maoy naghatag og kusog sa lawas.

Pero kon delikado na gani sa imong kinabuhi, pasagdi na lang ang mga butang kay makit-an ra gihapon kana.

***

Nganong gisaulog man ang buwan sa Marso nga Fire Prevention Month? Sumala sa mga opisyal sa Bureau of Fire Protection (BFP), ang Marso mao ang labing init nga buwan sa tibuok tuig.

Tungod kay maoy labing init, uga kaayo ang palibot, lakip na sa mga tanom ug mga sagbot. Dali kaa­yong mosiga ug mosilaob kon matagakan og aligato o upos sa sigarilyo ug bisan unsa nga makadangilag ug mahimong sinugdan sa kayo.

Mao kana nga angayang mag-amping ang tanan kay kon daghan ang nag-amping unya dunay usa nga danghag, sunog lang ta gihapon.

***

Hinumdumi nga dinhi lang sa siyudad sa Sugbo, niabot og 48 ka mga sunog ang niulbo sa miaging tuig.

Ang nakalisod dinhi sa siyudad nga nagsikit-sikit ang kabalayan ug wa pa gyuy karsada nga kaagian sa mga trak sa bombero mao nga daghan gyud ang maamong kon moulbo ang sunog sa usa lang ka panimalay.

Maayo na lang kay gipatuman ni Cebu City Mayor Mike Rama ang reblocking sa ubang mga lugar aron kaagian sa mga trak sa bombero.

***

Dako ang economic cost sa sunog. Tiaw moy mahimong abo ang imong gitigom ug gipaningkamotan.

Ang Department of Social Welfare and Services (DSWS) sa dakbayan sa Sugbo niingon nga nigasto silag P31.7 milyunes alang sa mga biktima sa sunog sa miaging tuig.

Mas maayo pang mag-amping na lang gyud ta.