WISDOM GRADUATION CEREMONY.

• Report rights infringement
• published: 07 Nov 2012
• views: 348

Jadofils JPK Ce 05/11/2012 ==================== "Ababyeyi barasabwa kurushaho gushyigikira amashuri y'incuke kuko ariyo aha umwana icyerekezo kandi bakajya boherezayo abana babo kugira ngo bazazamuke neza mu myigire". Ubu butumwa bwatangiwe mu ishuri ribanza rya Wisdon nursery&Primary school kuri iki cyumweru, n'umuyobozi w'akarere ka Musanze wungirije ushinzwe imibereho myiza, mu birori byo kwishimira icyiciro cya kane cy'abana 70 barangije umwaka wa 3 mu ishuri ry'incuke. Ubutumwa bwahatangiwe bwagaragaje ko amashuri y'incuke agomba guhabwa ingufu n'ababyeyi. Inkuru irambuye na TUYISHIME Jadofils Ibyo birori byaranzwe n'ubutumwa bwatanzwe n'abana n'ababyeyi bwagaragazaga akamaro ko kurerera umwana mu ishuri ry'incuke kuko bimufungura bigatuma aca akenge hakiri kare agakerebuka akamenya no kubana n'abandi akiri muto. Mu butumwa bwatanzwe n'abarerera muri iri shuri bavuze ko uburere abana b'incuke bahabwa bugaragaza ko umwana apfa mu iterura koko. Bishimiye uburyo abana bato bavuga indimi z'amahanga bakageza ku myaka itanu bashobora kumvikana n'abenerurimi basaba ko amashuri y'incuki yashyirwa mo imbaraga. Umuyobozi w'umuryango Youfh children foundation ariwo wibarutse iri shuri bwana Nduwayesu Elia yatangarije Radio na TVR ko bajya gutangiza icyiciro cy'incuke mu ishuri rya Wisdom Primary school bari bamaze kubona ko abana bagomba gutegurirwa gutangira amashuri abanza binyuze mu mashuri y'incuke. Ubu aremeza ko bageze ku ntego kuko ubumenyi abana bagaragaza kuva mu myaka ine ishize bizihiza ibirori byo guha ikaze abarangije mu ishuri ry'incuke mu mashuri abanza bigaragaza imbuto uburezi bahabwa bwera. Umuyobozi w'akarere ka Musanze wungirije ushinzwe imibereho myiza ahereye ku bumenyi abo bana b'incuke bagaragarije ababyeyi yavuze ko ari ikimenyetso cy'uko nta wagombye gushidikanya cyangwa kuzarira kujyana umwana we mu ishuri ry'incuke . Yasabye ababyeyi guhindura imyumvire ku buryo boherezaga abana babo mu mashuri y'incuke kuko ariho umwana akura ubumenyi bw'ibanze. Mu byo abarerera muri iri shuri ryigenga basabye ubuyobozi bwaryo ni ugushyira imbaraga mu itozamuco nyarwanda rishingiye ku rurimi rw'ikinyarwanda, gutoza abana ingiro n'imvugo byiza no kutirengagiza ururimi rw'igifaransa kuko ngo ururimi rw'icyongereza rwo barwiga neza kandi bikigaragaza. Uretse abana barangije ishuri ry'incuke bizihije ibirori, bamwe mu bana bafite ubumuga bwo kutavuga no kutumva biga muri iri shuri nabo bagaragaje ko politiki yo kwita ku babana n'ubumuga ari ingenzi kuko binyujijwe muri Wisdon nursery&Primary; school bigana n'abumva neza kandi bagatsinda.