Blackouts, natumbang mga puno, dambuhalang mga alon dulot ng Bagyong Yolanda -- Matapos tumama sa kanyang probinsya nitong Biyernes ng umaga si super typhoon Yolanda, agad na binalaan ni Southern Leyte Governor Roger Mercado ang mga probinsyang tinatayang dadaanan ng isa sa pinakamalakas na bagyo sa kasaysayan na huwag i-underestimate ito. "[Ang] sitwasyon dito, malakas ang hangin at ulan. Pwede siguro pakisabi sa lahat ng probinsya at syudad na dadaanan ni Yolanda na do not underestimate (the storm)," sabi niya sa "News To Go." "Please inform everybody not to take lightly this typhoon. Pinakamalakas since my birth," dagdag pa nito. Ayon sa PAGASA, si Yolanda (Haiyan) ay pinakamalakas na bagyo na tumama sa kalupaan. "Ito na ang pinakamalakas na bagyong naranasan ngayong taon sa buong mundo," ayon kay PAGASA weather forecaster Aldczar Aurelio sa panayam ng "News To Go." Unang tumama si Yolanda sa kalupaan ng Guiuan sa Eastern Samar maaga nitong Biyernes ng umaga. Hanggang Biyernes ng hapon, maka-apat na beses na itong tumamasa lupa, at sa pagragasa nito sa Kabisayaan, pinatutumba nito ang mga puno at mga poste ng kuryente na sanhi ng malawakang brownouts sa ilang mga bayan. Ayon sa update ng PAGASA dakong alas-11 ng umaga, humina ng bahagya si Yolanda na maylakas ng hanging 215 kph malapit sa gitna habang tumatawid ito sa Cebu. Ito ay kumikilos pahilaga hilgang-kanluran papuntang Panay, Mindoro, at dadaan sa hilagang bahagi ng Palawan bago ito lalabas sa Philippine area of responsibility sa Sabado ng hapon. "Impassable na lahat ng kalsada sa entire province, marami nang evacuation, marami nang bahay (ang nasira), natumba ang mga puno, wala nang ilaw, total blackout at malakas ang alon sa dagat. Talagang please inform everybody under the path of Yolanda, don't underestimate," ayon kay Governor Mercado. Samantala, sinabi naman ni NDRRMC spokesman Major Rey Balido sa GMA News na sadyang pinutol ang suplay ng kuryente sa ilang mga probinsya sa Eastern Visayas bilang "pre-emptive measure" dahil inaasahang maraming mga puno at mga poste ng kuryente ang itutumba ng bagyo. Iniulat naman ng ilang mga residente na naputol din ang cellular phone signals sa maraming mga lugar sa Visayas, kabilang na ang Bohol, na kamakailan lamang ay tinamaan ng killer quake. Ayon kay Mercado, sinimulang bayuhin ng bagyo ang Southern Leyte dakong 4:30 ng umaga. Mabuti na lamang umano ay nakahanda na sila. "Meron kaming pre-emptive evacuation at preparations na nakamenos sa aming damage. Maganda ang (nangyari) at mabuti naka-prepara tayo," aniya. Nagpadala rin umano ang Department of Social Welfare and Development ng paunang 800 food packs para sa nasa evacuation centers, pero hindi raw sapat ito. Karamihan sa mga inilikas ay mga residente malapit sa mga baybayin, aniya. "Malakas ang alon ng dagat. Buti low tide at na-evacuate na lahat ng informal settlers along the coast line. Nasa evacuation center na sa multi-purpose center sa syudad. Ang provincial disaster manager lagi nag-iinspeksyon." Typhoon alerts Itinaas ang Storm signal No. 4, pinakamataas na warning ng PAGASA, sa mga lugar na makararanas ng bugso ng hanganing mas malakas sa 185 kph sa susunod na 24 oras: LUZON - Southern Occidental Mindoro - Southern Oriental Mindoro - Romblon - Calamian Group of Island - Masbate VISAYAS - Northern Cebu including Cebu City and Bantayan Island - Northern Negros Occidental - Aklan - Capiz - Antique - Iloilo - Guimaras Signal No. 3, itataas sa mga sumusunod na lugar na tatamaan ng hanging mula 101 hanggang 185 kph sa susunod na 18 oras hours: LUZON - Rest of Occidental Mindoro - Rest of Oriental Mindoro - Burias Island - Sorsogon - Marinduque - Ticao Island - Northern Palawan including Puerto Princesa City VISAYAS - Northern Samar - Eastern Samar - Samar - Leyte - Southern Leyte - Bohol - Rest of Cebu - Negros Oriental - Rest of Negros Occidental - Camotes Island - Biliran Province MINDANAO: - Dinagat Province Samantala, ang Metro Manila at ibang bahagi ng bansa ay isinailalim Signal No. 2, at mga sumusunod na lugar na tatamaan ng lakas ng hanging mula 61 hanggang 100 kph at katamtamang ulan sa susunod na 24 oras: LUZON - Bataan - Metro Manila - Cavite - Laguna - Batangas - Southern Quezon - Camarines Sur - Lubang Island - Rest of Palawan - Albay VISAYAS - Siquijor MINDANAO - Surigao del Norte including Siargao - Camiguin Signal No. 1 naman sa mga sumusunod na lugar na makararanas ng 30-60 kph na hanging sa susunod na 36 oras: LUZON - Pampanga - Zambales - Bulacan - Camarines Norte - Rest of Quezon including Polilio Island - Catanduanes MINDANAO - Surigao del Sur - Misams Oriental - Agusan del Norte Source: GMA News - Ulat Filipino » Balitang Pinoy -- Nov. 8, 2013

• published: 09 Nov 2013
• views: 1096