Milqugħa t-talba ta' Simon Busuttil biex jiġi eżaminat is-Servizz Sigriet

• published: 02 Jul 2013
• views: 26

It-Tlieta se ssir laqgħa urġenti tal-Kumitat tas-Sigurtà. Fuq talba tal-Kap tal-Oppożizzjoni Simon Busuttil, it-Tlieta se ssir laqgħa urġenti tal-Kumitat tas-Sigurtà biex jiġu eżaminati l-amministrazzjoni u l-politika tas-Servizz Sigriet matul il-ġimgħat li għaddew. It-talba, saret minn Simon Busuttil f'ittra li bagħat lill-Prim Ministru fid-dawl tal-ammissjoni tal-Ministru għall-Intern u s-Sigurtà Nazzjonali Manwel Mallia li hu, kif ukoll iċ-Chief of Staff tiegħu Silvio Scerri, kienu preżenti għall-interviews biex jintgħażlu uffiċjali ġodda għas-Servizz Sigriet. Servizz li għandu poteri vasti, fosthom l-irrekordjar ta' telefonati, u li ħafna jsostnu li għandu jkun 'il bogħod minn kull forma ta' politika. Simon Busuttil irrefera għal dan il-każ bħala wieħed ta' natura serja u gravi ħafna fit-tmexxija tas-Servizz Sigriet. Fl-ittra tiegħu il-Kap tal-Oppożizzjoni fakkar li diġa' ddikjara pubblikament li jħoss li huwa inaċċettabbli li dan l-aġir iseħħ f'demokrazija b'saħħitha. Fuq kollox iqis dan l-aġir bħala wieħed perikoluż u li jimmina s-saltna tad-dritt u l-fiduċja li l-pubbliku għandu jkollu fis-Servizz Sigriet. Simon Busuttil talab ukoll li fl-istess laqgħa tal-Kumitat - li hu bħala Kap tal-Oppożizzjoni jagħmel parti minnu - ikun preżenti l-Kap tas-Servizz Sigriet, biex ikun jista` jipprovdi l-informazzjoni li tkun meħtieġa. Fi stqarrija wara li tħabbar li t-talba ġiet milqugħa, Simon Busuttil qal li kien ikun aktar xieraq u opportun kieku l-iskrutinju fuq is-Serizz Sigriet isir fuq inizjattiva tal-Gvern minflok fuq insistenza tal-Oppożizzjoni. Qal ukoll li l-Oppożizzjoni se tkun qed tiżgura li l-entitajiet tal-istat, b'mod partikolari s-servizz sigriet, jaħdem mingħajr indħil politiku. Il-kamra tal-aħbarijiet ta' Media.Link Communications hi nfurmata li t-Tnejn ingħataw tnax-il transfer ieħor fis-Servizz Sigriet, u fl-istess jum iddaħħlu f'din it-taqsima 8 persuni magħżula viċin il-Partit Laburista. Ġejna nfurmati wkoll li l-membri l-ġodda li għall-interview tagħhom kien preżenti Manuel Mallia ddaħħlu f'dan is-servizz ħmistax ilu. Il-kwistjoni tas-servizz sigriet hija waħda biss minn sensiela ta' kontroversji li hu nvolut fihom l-istess ministeru. Fost dawn il-kontroversji hemm dik fejn il-Pulizija tqabbdu jagħmluha ta' koki u waiters waqt ikla organizzata mill-gvern għal delegati barranin, u li saret il-Ħamis fil-Palazz tal-Girgenti. Kien hemm ukoll il-każ, irrappurtat il-Ħadd mit-Times, taċ-Chief of Staff Silvio Scerri waqt il-kunċert Isle of MTV. Meta skont ir-rapport dan talab lill-Pulizija biex jarrestaw lill-persuna nkarigata mis-sigurtà għax m'aċċettax li persuni mingħajr permess jidħlu fis-sezzjoni tal-VIP. U hemm ukoll il-maħfra li ngħatat lill-priġunieri għax il-labour rebaħ l-elezzjoni. Fil-jiem li għaddew Net News xandar provi li juru li mill-inqas erba' Ministri jew Segretarji Parlamentari laburisti wegħdu l-maħfra lill-priġunieri waqt il-kampanja elettorali. U meta l-Ministru nnifsu ħabbar din l-aħbar lill-priġunieri, intlaqa' bl-għajjat ta' "Malta Tagħna Lkoll."