The Simpsons a zo ur rummad tresadennoù-bev krouet gant ar Stadunanad Matt Groening e 1989.
Skignet e oa bet evit ar wech kentañ e Stadoù Unanet Amerika d'ar 17 a viz Kerzu 1989, war ar rouedad skinwel Fox. Skignet e oa bet evit ar wech kentañ e Frañs e 1990, war Canal + ha, goude se, war Frañs 3, M6 ha W9.
Kontañ a ra buhez ur familh amerikan anvet « Simpson ». Pep tudenn er familh, ha tost pep tudenn er rummad, a zo melen he c’hroc’hen. Setu anvioù an dud er familh : Homer, an tad, Marge, ar vamm, Bart, ar mab, Liza, ar verc'h vras, ha Maggie, ar verc'h vihan. Homer eo an dudenn bennañ e-touez ar “Simpsoned”.
Adalek ar penn-kentañ ez eus bet gounezet kalz prizioù gant ar rummad tresadennoù-bev-se : 24 Primetime Emmy Awards, 26 Annie Awards hag ur Peabody Award. D'an 31 a viz Kerzu 1999 e oa bet disklêriet gant ar gelaouenn Time e oa The Simpsons ar rummad-skinwel gwellañ eus an XXvet kantved.
E kêr Springfield emañ ar familh Simpson o chom, er Stadoù Unanet. N’eo ket The Simpsons un heuliad tresadennoù-bev graet evit plijout d’ar vugale, met unan a ra goap eus doare bevañ an Amerikaned hiziv (bier, boued, skinwel, relijion…). Kavout a ra Matt Groening e awen e-barzh sevenadur ar renkadoù etre er Stadoù Unanet. Sellet e vez ouzh e dresadennoù-bev gant e-leizh a dud, ha betek gant prezidanted Stadoù Unanet Amerika. Abadennoù ispisial a zo bet graet, da-geñver gouelioù evel Nedeleg pe Halloween, da-geñver beajoù ar familh dre ar bed (Japan, Aostralia, Bro-Saoz...) ha traoù all c’hoazh.
(
muioc'h...)
