Gwasanaeth Cymraeg - Dechrau o'r dechrau?

Wedi mwy nag wythnos gyfan yng Ngharchar Caerdydd mae Jamie Bevan yn dal i aros am ffurflenni sylfaenol yn y Gymraeg ac mae pryder y bydd y broses yn ailddechrau eto gan fod Jamie yn symud i garchar Prescoed, Sir Fynwy heddiw (dydd Mercher 22ain o Awst).

Meddai Bethan Williams, Cadeirydd Cymdeithas yr Iaith Gymraeg:

"Mae'r carchar wedi trin Jamie fel unigolyn gan ofyn iddo ysgrifennu ei ddewisiadau bwyd a chofrestru manylion ymwelwyr ar dudalen wag yn hytrach na bod rhaid i'r carchar ddarparu ffurflenni Cymraeg. A fydd hyn yn digwydd i bob carcharor sydd eisiau gwasanaeth Gymraeg? Mae'n glir i weld nad oes newid gwirioneddol, ac nad yw'r carchar wedi mynd i'r afael a'r broblem sylfaenol fod diffyg gwasanaeth Cymraeg."

"Mae hi'n debygol na fydd unrhyw wasanaeth Gymraeg ar gael yng ngharchar Prescoed y chwaith, a bydd rhaid i Jamie orfod gofyn am bopeth yn Gymraeg eto o'r newydd a pharhau i ddioddef anghyfiawnder."

Brwydr yr iaith yn parhau tu fewn i'r carchar

Mae Cymdeithas yr Iaith wedi cyhoeddi fod Jamie Bevan, a garcharwyd am 35 niwrnod Ddydd Llun gan Ynadon Merthyr Tudful, wedi parhau ei frwydr dros gyfiawnder i'r Gymraeg tu fewn i'r carchar. Mae wedi colli nifer o'i hawliau fel carcharor gan nad yw wedi bod yn fodlon arwyddo ffurflenni uniaith Saesneg. Mae'n amlwg nad oes gan Garchar Caerdydd fel sefydliad cyhoeddus unrhyw ddarpariaeth Gymraeg, ac mae nifer o swyddogion yn ddilornus o'r iaith.

Mae Cymdeithas yr Iaith wedi herio'r Comisiynydd Iaith, Meri Huws, a'r Gweinidog dros y Gymraeg Leighton Andrews i weithredu'n syth i unioni'r cam a mynnu fod llywodraethwyr Carchar Caerdydd yn parchu'r Gymraeg.

Er i Gomisiynydd y Gymraeg ddweud y byddai yn sicrhau y gallai Jamie Bevan defnyddio'r ffôn, ers iddo ffonio wedi cyrraedd nid yw ei deulu wedi cael galwad ffôn ganddo o hyd. Mae hyn yn destun pryder iddyn nhw fel teulu.

Meddai llefarydd ar ran Cymdeithas yr Iaith Gymraeg:

"Mae carchardai Cymru yn gwasanaethu Cymry Cymraeg, dylai gwasanaethau Cymraeg fod ar gael felly i unrhyw un sydd yn dymuno gwneud defnydd ohonynt. Daw'r gwyn yma ar ran holl garcharorion Cymraeg Cymru. Ddylai neb orfod gofyn am y pethau hyn - ac yn sicr ddylai neb fod yn colli allan ar bethau sylfaenol fel dewis bwyd a defnydd o gyfleusterau. Nid yw'r carchar na'i swyddogion yn dangos unrhyw barch tuag at Jamie, carcharorion Cymraeg eraill, na'r Gymraeg.

"Mae Jamie wedi gwneud safiad ac yn dilyn esiampl nifer o bobl eraill, gan gynnwys Eileen Beasley a fu farw dros y penwythnos. Mae'n dal i wneud safiad oddi fewn i'r carchar ond dim ond hyn a hyn all Jamie wneud o'i gell felly mae'n bryd nawr i sawl sydd a'r grym i allu i wneud safiad dros Jamie a'r holl garcharorion Cymraeg yng Nghymru."

Anfonwch neges o gefnogaeth iddo trwy'r post:

A9459CFBEVAN
Carchar Caerdydd
HMP Caerdydd
1 Ffordd Knox
CAERDYDD
CF24 0UG

Carchar am 35 diwrnod i Jamie Bevan

Cafodd Jamie Bevan ei ddedfrydu i 35 diwrnod yn y carchar gan ynadon Merthyr Tudful y bore yma am wrthod talu dirwy a orchmynnwyd iddo ei dalu mewn gohebiaeth uniaith Saesneg.

Cafodd Jamie Bevan o Ferthyr Tudful ei erlyn am iddo wrthod talu dirwy a osodwyd arno am ei ran yn yr ymgyrch yn erbyn toriadau i S4C. Defnyddiodd yr achos i brotestio yn erbyn yr ohebiaeth uniaith Saesneg oddi wrth y llysoedd.

Daw'r newyddion wedi'r cyhoeddiad am farwolaeth Eileen Beasley, un o'r ymgyrchwyr cyntaf i fynd i'r llysoedd er mwyn cael statws cyfartal i'r Gymraeg.

Anfonwch neges o gefnogaeth iddo trwy'r post:

A9459CFBEVAN
Carchar Caerdydd
HMP Caerdydd
1 Ffordd Knox
CAERDYDD
CF24 0UG

Pwysa yma i ddarllen mwy o newyddion...

Fideo: Tynged yr Iaith 2

Pwysa yma i weld mwy o fideos...