Degemer

* War gresk ez a ar Wikipedia brezhonek atav. Gant hon holloueziadur e oa bet tizhet 32 000 pennad d'ar 5 a viz Meurzh 2010 ! Emaomp c’hoazh en 52^vet renk e-touez ar raktresoù Wikipedia, evit an niver a bennadoù, a-dreñv ar jorjieg ha dirak an azeri. Evit gouzout hiroc'h : An Deizlevr. Met daoust m’emaomp en ur renk mat evit an niver a bennadoù, emaomp en ur renk izeloc’h evit an danvez anezho (65vet plas [1]). Kalz pennadoù zo re verr (Lenin, Rembrandt, Abraham) ha kalz pennadoù diazez a vank dimp ivez, evel avu, gwad, peoc'h, naon, blues, judo, butun, grip, kelc’h, Dispac'h Rusia... Taolit ur sell ouzh roll ar pennadoù a ra diouer d’ar Wiki-mañ. Pep hini ac’hanoc’h a c’hall klask sevel unan eus ar pennadoù-se !

* Evit kaozeal diwar-benn kement tra a denn d'ar Wikipedia brezhonek, gouzout petra zo nevez, reiñ ho soñj, kit bep an amzer d'ober un dro betek Tavarn ar wikipedourien.

* Taolit ur sell ouzh ar pennadoù nevez boulc'het gant hor c'henlabourerien ha roit skoaz d’o gwellaat ha d’o fonnusaat. E-touez ar pennadoù nevez pe ar re zo bet astennet nevez zo e kaver c’hoazh meur a hini diwar-benn evned evel ar piged-spern ha loened a bep seurt evel an oposomed, anezho bronneged godellek eus Amerika, pe ar gwiñvered, hag o c’hendirvi ar gwiñvered-nij. War dachenn an natur bepred e c’haller lenn pennadoù diwar-benn ar bananez pe al legumaj. A-drugarez hor c’henlabourerien e c’hallomp ober anaoudegezh gant arzourien eus ar bed a-bezh, evel an engraver Ambrosius Holbein pe gant taolennoù al livour Johannes Vermeer : An dantelezherez ha meur a hini all. Ganto ivez e c’haller beajiñ dre ar bed a-bezh, eus Krimea d’ar menez Popocatépetl, eus enez Barbados, da broviñs Chubut en Arc'hantina, en ur dremen dre enez Taiwan. Hag ober anaoudegezh gant tud,a Vreizh pe a lec’h all, evel ar politikour Christian Troadec, ar skrivagner J. D. Salinger, ar ganerez Rihanna pe ar sonerien Breizh Brothers. Pennadoù e-leizh zo c’hoazh diwar-benn an istor : istor Kembre, he rouantelezhioù evel Deheubarth pe Rouantelezh Gwynedd, hec’h uhelidi evel Rhys ap Gruffydd. Pe istor rannoù all eus ar bed : Masimilian Iañ an Impalaeriezh Santel, Khanat Krimea pe an impalaer bizantat Leon VI ar Fur.

Ma reer anoudegezh gant ar bed a-bezh pe dost en hor Wikipedia, e kaver ivez danvez diwar-benn Breizh : ar barzh gallek René-Guy Cadou, ar stêr Erzh pe c’hoazh, siwazh, an nitrat zo kaoz d’al lanvadoù bezhin glas. Hag arabat dimp disoñjal un toullad pennadoù diwar-benn ar sport degaset gant hor c’henlabourerien nevesañ evel basketball pe surf. Echuiñ a c’hallit gant ur sell ouzh pennadoù diwar-benn traoù hor buhez pemdez : stalaf, broust-dent, kig-sall. Danvez a bep seurt evel ma weler, ha peadra da blijout d’an holl emichañs. Lennadennoù mat d’an holl ac’hanoc’h !

Un tamm sell war red an darvoudoù

Doare an 19 a viz Ebrel 2010 ha Keleier ar vro.

• D'an 10 a viz Mae 2010 e krogo Redadeg 2010, hervez a lenner en he lec'hienn nevez. N'eo ket re ziwezhat na re abred da gemer perzh el labour.

---

---

• 12 a viz Ebrel : renerien ar pemdezieg euskarek Egunkaria zo bet lezet da vont didamall gant lez-varn uhel Spagn.
• Ar skiantour breizhveuriat Richard Dawkins hag ar skrivagner amerikan ha saoz Christopher Hitchens a c'houlenn ma vo harzet ar pab Benead XVI abalamour m'en dije graet torfedoù a-enep Mab-den.

• 10 a viz Ebrel : marvet eo prezidant Polonia, Lech Kaczyński, ha meur a benn bras all eus ar vro-hont, en ur gwallzarvoud nijerez e-kichen Smolensk e Rusia.
• 3 a viz Ebrel : drouklazhet Eugène Terre'Blanche e Suafrika. Sevel a rae a-du gant an apartheid.
• 29 a viz Meurzh : gant div darzhadenn e metro Moskov ez eus lazhet 39 den ha gloazet meur a zek all.
• 28 a viz Meurzh : aet eo Priz Pritzker 2010 gant SANAA.
• 27 a viz Meurzh : cheñch eur a reer e Breizh evel e meur a vro all e kornôg Europa ha tremen d'an eur hañv e-lec'h an eur c'hoañv.

• 21 a viz Meurzh : en eil tro ar votadegoù evit ar c'huzulioù-rannvro eo trec'h listenn ar sokialour Jean-Yves an Drian e rannvro Breizh ha hini Jacques Auxiette e rannvro Broioù al Liger.
• 20 a viz Meurzh : Franck Cammas a zistro da Vreizh goude c'hoari an dro d'ar bed gant e vag Groupama 3, en ur ober 48 deiz, 7 eur, 44 munut hag 52 eilenn.
• 17 a viz Meurzh : marvet eo ar soner amerikan Alex Chilton.
• 14 a viz Meurzh : kentañ tro ar votadegoù evit ar c'huzulioù-rannvro e Bro-C'hall.

Pennad ar miz : Olimpos
Ar menez Olimpos, pe Olimp, eo menez uhelañ Gres, 2917 metr uhelder dezhañ, hag unan eus menezioù uhelañ Europa. Emañ war-hed 100 km eus Thessaloniki, eil kêr vrasañ Gres.
Eno e oa, hervez ar mojennoù gresianek kozh, annez doueed pennañ Henc'hres, Zeus en o fenn.
Diwar-benn orin an anv “Olimpos” n’eus nemet martezeadennoù. Hervez unan anezho e teufe ar ger gregach Ὄλυμπος / Olympos eus div wrizienn a dalveze kement hag un dra bennak « a droc'he lemm» pe « a droc'he an hent ». Ne c'halled ket treuziñ ar menez, ha gwelet e veze evel un harz krenn etre Tesalia ha Makedonia, pe ledenez Gres hag Europa.

En em astenn a ra ar Menez Olimpos en hanternoz Gres, tost da aod Vor Egea, tost da Desalia ha Makedonia. Ur pezh tolzenn a venez zo anezhañ, sonn-mat e meur a lec'h, hag islonkoù ledan. Koadek eo an traoñ anezhañ, hag erc'hek e gern. Kentañ ma voe krapet ar menez, diouzh a ouzer, a voe e 1913 gant D. Baud-Bovy, F. Boissonas et K. Kakalos.

Kuzhet eo lein ar menez ouzh an dud gant ar c'houmoul. Neuze e c'halle Daouzek doue pennañ Henc'hres ober o annez eno ha bezañ sioul o frikota hag o sellout ouzh an dud a bell. Hervez Homeros ne oa na glav nag erc'h ha gwenn e oa ar bed d'an doueed eno, war-lerc'h dezho en em zizober eus an Ditaned, Ofion ha Tifon.

Hiziv eo brudet ar menez ivez abalamour ma kaver ennañ e-leizh a spesadoù plant ha loened. E-touez ar spesadoù bronneged a bep seurt a gaver stank emañ ar chamoez, ar yourc'h, an hoc'h-gouez, ar c’hazh gouez, ar gaerell-vras, al louarn, ar gwiñver, h. a. Ha betek 108 spesad evned.

Evit kenderc'hel da lenn : Olimpos

Ur raktres eus diazezadur Wikimedia eo Wikipedia. Meur a raktres Wiki all, liesyezhek, digoust ha frank a wirioù zo ivez :

				Wikipedia en holl yezhoù
	Wikeriadur geriadur hollvedel		Wikilevrioù oberennoù pedagogel digoust		Wikiarroud dastumad arroudennoù		Wikimammenn levraoueg hollvedel
	Wikispesad meneger ar bev		Wikikeloù mammenn geleier dizalc'h		Wikimedia commons bank roadennoù liesvedia		Meta-Wiki kenurzhiañ raktresoù Wikimedia