Тропарь. Симеону Новому Богослову, глас 3:.
Симеон  Новый Богослов, игумен
Божественное озарение, Симеоне отче, / восприяв в души твоей, / светило в мире показался еси светлейшее, / разгоняя того мракобесие / и всех уверяя искати, юже погубиша, благодать Духа, / Егоже прилежно моли / даровати нам велию милость.
Тропарь. Симеону Столпнику, глас 1:.
Симеон  Столпник, Антиохийский, архимандрит
Терпения столп был еси, / ревновавый праотцем, преподобне, / Иову во страстех, Иосифу во искушениих, / и безплотных жительству, сый в телеси, / Симеоне отче наш, / моли Христа Бога спастися душам нашим.
Тропарь. Симеону Столпнику Дивногорцу, глас 1:.
Симеон Столпник, Дивногорец, Младший, пресвитер
Пустынный житель, и в телеси Ангел, / и чудотворец явился еси, Богоносе, отче наш Симеоне, / постом, бдением, молитвою Небесная дарования приим, / исцеляеши недужныя и души верою притекающих ти. / Слава Давшему тебе крепость, / слава Венчавшему тя, / слава Действующему тобою всем исцеления.
Тропарь. Стефану, в иночестве Симеону, царю Сербскому, Мироточивому, глас 3:.
Симеон(в миру Стефан Неманя, царь Сербский), Мироточивый, Хилендарский, Афонский
Божественною благодатию просветився, / и по смерти показуеши светлость жития твоего, / источаеши бо миро благоухания / притекающим к раце мощей твоих, / и люди твоя наставил еси к свету Богоразумия, / Симеоне отче наш, / Христа Бога моли / даровати нам велию милость.
Тропарь. Симону Воломскому, глас 4:.
Симон Воломский, Устюжский, сщмч., игумен
От юности твоея вперив ум твой к Богу, блаженне Симоне, / мира же отвергся, вселился еси в пустыню непроходимую, / и тамо, от Господа укрепляемь, / в молитвах и пощениих доблественне пожил еси, / и жизнь твою страдальчески / убиением от сынов противления скончал еси. / Сего ради со преподобными и мученики венчался еси, / с ними же и ныне предстоиши Престолу Пресвятыя Троицы. / Сию моли, молим тя, / оставление подати согрешений наших / и даровати нам велию милость.
Тропарь. Сисою Великому, глас 2:.
Сисой Великий, прп.
Плотския страсти умертвив воздержанием, / миру распялся еси и, в пустыни живый, / всех похотей отсечением / Ангел земный и Небесный человек показался еси, / сего ради тя, яко наставника иноком, / поем, Сисое отче наш, и просим: / моли Христа Бога, да спасет души наша.
Тропарь. Сисою, схимнику Печерскому, в Дальних пещерах, глас 1:.
Сисой Печерский, схимонах
Пустынный житель, и в телеси Ангел, / и чудотворец явился еси, Богоносе отче наш Сисое, / постом, бдением, молитвою Небесная дарования приим, / исцеляеши недужныя и души верою притекающих ти. / Слава Давшему тебе крепость, / слава Венчавшему тя, / слава Действующему тобою всем исцеления.
Тропарь. Софии Суздальской, глас 4:.
София Суздальская, прп.
Вышняго красотою явственно украшаяся, / постническими бо труды подвизася преподобная София, / и бысть наследница Небесному Царствию, / и вниде в Небесный Чертог насладитися Христовы красоты, / Его же моли спастися граду Суждалю / от поганых нахождений и междоусобныя брани / и подаждь душам нашим велию милость.
Тропарь. Софронию, затворнику Печерскому, в Дальних пещерах, глас 1:.
Софроний Печерский, затворник
Пространна пути, ведуща в пагубу, / блаженне Софроние, угонзая, / затворился еси в темне месте пещернем, / идеже день и нощь в молитвах и слезах / и в ручном деле подвизаяся, / обрел еси вечный живот и наслаждение.
Тропарь. Стефану Махрищскому, глас 8:.
Стефан Махрищский, иеросхимонах
Православия ревнителю, / благочестия наставниче и чистоты, / ищущим спасения путеводительный светильниче, / монашествующих Богодухновенное удобрение, / преподобнаго Сергия духовный собеседниче, / Стефане премудре, / ученьми и добродеяньми твоими души просветил еси / и пустыни населил еси, / моли Христа Бога спастися душам нашим.
Тропарь. Стефану, игумену Печерскому, епископу Владимиро-Волынскому, глас 8:.
Стефан Печерский, Владимиро-Волынский, еп.
Учению повинуяся Богоноснаго Феодосия, / поставлен бысть от него вождь быти святому его стаду, еже добре пасый, / церковь Богородицы, / волею Тоя основанную чудне, / совершил еси благолепно, / приснопамятне Стефане, /в нейже нам, молящимся, испроси от Христа Бога велию милость.
Тропарь. Стефану Савваиту, глас 5:.
Стефан Савваит, прп.
Воздержанием житие украси и страсти умертвив, / посрамил еси вражия прилоги, отче Стефане, / и преложися к Богу, чудотворец показася, / в вечней славе со Ангелы ликуя, / с ними же моли помиловати души наша.
Тропарь. Титу, пресвитеру Печерскому, в Ближних пещерах, глас 1:.
Тит Печерский, пресвитер
Братолюбне тя живуща видев любве ненавистник, / победил тя во гнев, / но, ведый твоя прежния труды любве источник - Господь, / преложи тя паки на братолюбие, / в немже ты прочее пожив Богоугодне, / молися о нас, яко да поживем братолюбне.
Тропарь. Титу Печерскому, бывшему воину, в Дальних пещерах, глас 3:.
Тит Печерский, воин
Воинство тленное оставль, / в нетленном ввоенился еси Христови, / и оружием его крестным победив подземных ефиопов, / победы венец от Христа, Тите, славно приял еси, / Емуже молися даровати нам мир и велию милость.
Тропарь. Тихону Медынскому, Калужскому, глас 4:.
Тихон Медынский, Калужский, прп.
Яко светильник пресветлый, / явился еси в Российстей земли, / преподобне отче наш Тихоне, / в пустыни вселився, / в нейже преходя жестокое жительство, / яко безплотен, пожил еси, / сего ради и чудес дарованием обогати тя Бог. / Тем и мы, притекающе к мощем твоим, умильно глаголем: / отче преподобне, / моли Христа Бога / спастися душам нашим.
Тропарь. Тихону Луховскому, Костромскому чдтв., глас 4:.
Тихон Луховской, Костромской, прп.
Желанием духовным в пустыню вселился еси / и, тамо невозвратно шествовав Божественными стезями, / достигл еси в Небесныя обители, / и ныне со Ангелы предстоиши / у Престола всех Царя Христа Бога, / Емуже прилежно молися / помиловати град сей и люди, / верою празднующия пречестную память твою, / Тихоне преподобне, отче наш.
Тропарь. Трифону, архим. Вятскому, глас 4:.
Трифон Вятский, архимандрит
Яко светозарная звезда, / возсиял еси от востока до запада, / оставль бо свое отечество, / дошел еси Вятския страны и Богоспасаемаго града Хлынова, / в немже обитель во славу Пресвятыя Богородицы создав, / и, тамо на добродетель вперився, / собрал еси иночествующих множество, / и, сих наставляя на путь спасения, / был еси Ангелом собеседник, / и постником сопричастник, Трифоне преподобне, / с ними Христа Бога моли спастися душам нашим.
Тропарь. Трифону Печенгскому, Кольскому, глас 8:.
Трифон Печенгский, Кольский, прп.
Пути, вводящаго в жизнь, наставник и учитель был еси: / первее бо, преподобне отче наш Трифоне, / пришел еси в часть Норвегския земли / и в последних концех северныя страны языки просветил еси, / породив водою и Духом Святым, / и священная твоя чада в безплодней пустыни, / яко древа масличная, насадил еси, / велию обитель Святыя и Живоначальныя, Единосущныя и Нераздельныя Троицы создал еси / и монахов множество собрав. / Тем, яко апостолом и пустынножителем равночестна чтуще тя, / прилежно припадающе, вопием: / моли всех Бога за Русскую землю, за область твою и за вся люди, / почитающия память твою.
Тропарь. Феодору Начертанному, исп., глас 8:.
Феодор Начертанный, Константинопольский, прп., исповедник
Православия наставниче, / благочестия учителю и чистоты, / вселенныя светильниче, / монашествующих Богодухновенное удобрение, / Феодоре премудре, / ученьми твоими вся просветил еси, цевнице духовная; / моли Христа Бога спастися душам нашим.
Тропарь. Феодору Освященному, глас 1:.
Феодор Освященный, игумен
Пустынный житель, и в телеси Ангел, / и чудотворец явился еси, Богоносе отче наш Феодоре: / постом, бдением, молитвою небесная дарования приим, / исцеляеши недужныя и души верою притекающих ти. / Слава Давшему тебе крепость, / слава Венчавшему тя, / слава Действующему тобою всем исцеления.
Тропарь. Феодору Сикеоту, еп. Анастасиупольскому, глас 2:.
Феодор Сикеот, еп., Анастасиупольский
Познан быв от пелен освящен / и явлься благодатей исполнен, / чудесы мир озарил еси / и демонов множество отгнал еси, / священнодетелю Феодоре, / темже о нас молися Господеви.
Тропарь. Феодору Студиту, исп., глас 8:.
Феодор Студит, прп., исповедник, игумен
Православия наставниче, / благочестия учителю и чистоты, / вселенныя светильниче, / монашествующих Богодухновенное удобрение, / Феодоре премудре, / ученьми твоими вся просветил еси, цевнице духовная, / моли Христа Бога спастися душам нашим.
Тропарь. Феодосию Великому, общих житий начальнику, глас 8:.
Феодосий Великий, Киновиарх, прп.
Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, / сияя чудесы, Феодосие отче наш, / моли Христа Бога спастися душам нашим.
Тропарь. Феодосию, игумену Киево-Печерскому, глас 8:.
Феодосий Печерский
Возвысився на добродетель, / измлада возлюбив монашеское житие, / к желанию доблественне достиг, вселился еси в пещеру, / и украсив житие твое пощением и светлостию, / в молитвах яко безплотен пребывал еси, / в Российстей земли яко светлое светило просияв отче Феодосие: / моли Христа Бога, спастися душам нашим.
Тропарь. Феодосию Тотемскому, глас 1:.
Феодосий Тотемский, Суморин, игумен
От юности, преподобне Феодосие, / желание твое ко Христу Богу вперил еси, / егоже ради град и отечество оставль / и славу суетную, яко прах вменив, / последовал еси преподобному Димитрию / и обители его сожитель был еси, / преселився ко граду Тотьме / и в междоречие вселився, / постом и бдением, и власяным одеянием, / и веригами тело твое удручил еси. / Сего ради Бог, видев твоя труды, / по преставлении твоем чудесы обогати тя: / бесы изгоняеши и слепыя просвещаеши, / от всяких недуг и бед избавляеши приходящия к тебе с верою и вопиющия: / слава Давшему ти крепость, / слава Венчавшему тя, / слава Дающему тобою всем исцеление.
Тропарь. Феоктисту Палестинскому, глас 8:.
Феоктист Палестинский, игумен
Слез твоих теченьми, пустыни без плодное возделал еси, / и иже из глубины воздыханьми, во сто трудов уплодоносил еси, / и был еси светильник вселенней, сияя чудесы; Феоктисте отче наш, / моли Христа Бога, спастися душам нашим.
Тропарь. Феофану исп., Сигрианскому, глас 5:.
Феофан Сигрианский, Летописец, прп., исповедник
Воздержанием житие украсил / и, уды умертвив, / победил еси вражия козни, отче Феофане, / преставился еси к Богу в вечную жизнь, / яко достоин причастник, / моляся непрестанно / помиловати души наша.
Тропарь. Феофану, исп., еп. Никейскому, глас 8:.
Феофан Никейский, Константинопольский, исповедник, еп.
Православия наставниче, / благочестия учителю и чистоты, / вселенныя светильниче, архиереов Богодухновенное удобрение, / Феофане премудре, / ученьми твоими вся просветил еси, / цевнице духовная, / моли Христа Бога спастися душам нашим.
Тропарь. Феофилу, архиеп. Новгородскому, в Дальних пещерах, глас 4:.
Феофил Печерский, Новгородский, архиеп.
Правило веры, и образ кротости, / и воздержания известный учитель Христову стаду воистину был еси, / уча е выну смирению, / не мудрствовати еже высокая, / сего ради стяжал, яже желаше, / отче святителю Феофиле, / моли Христа Бога спастися душам нашим.
Тропарь. Феофилакту исп., еп. Никомидийскому, глас 6:.
Феофилакт Никомидийский, исповедник, еп.
Таяся, пожил еси, прехвальне, / но Христос тя показа, / яко светило на свещнице мысленнем, / и скрижали ти вручи учений духовных, / имиже, святителю Феофилакте, / и нас озари.
Тропарь. Ферапонту Белоезерскому, Можайскому, глас 4:.
Ферапонт Белозерский, Можайский, Лужецкий, архимандрит
Житием чистым просветився, / в молитвах и постех пустыни явился еси доброе прозябение / и, духовному твоему учителю последствуя, / ум свой к Небесным управль, / стаду твоему наставник был еси, / тем тя молим, отче Ферапонте: / моли Христа Бога спастися душам нашим.
Тропарь. Ферапонту Монзенскому, глас 8:.
Ферапонт Монзенский, Галичский, прп.
Любовию Христовою, Богомудре, просветився и добродетельми, / сожительствовал еси Василию блаженному, / и, всякое наслаждение плотское возненавидев, / в пустыню вселился еси, / в ней же вельми подвизался еси в жизни сей временней, / плоть умершвляя свою в пениих, и во бдениих, и в пощениих. / Темже и Христос даром чудес обогати тя, / но поминай убо нас, чтущих пресветлую память твою, / преподобне отче Ферапонте, / и моли Христа Бога спастися душам нашим.
Тропарь. Филиппу Ирапскому, глас 4:.
Филипп Ирапский, Череповецкий, прп.
Яко кедр, в пустыни давидски растущ, и яко финикс, благоуханен цветущ, / ревнитель учителю твоему был еси, преподобному отцу Корнилию, / стопам бо его последовал еси / и, святое иго взем, / светлым житием просиял еси, яко солнце, / явлься мирови многими чудесы, отче Филиппе! / И ныне на Небесех предстоиши Престолу Пресвятыя Троицы / и, яко великое имея дерзновение, / преподобнии свой руце воздев, / моли от враг сохранитися градом нашим / и спастися душам нашим.
Тропарь. Харитону Исповеднику, глас 8:.
Харитон Исповедник, Иконийский, еп.
Слез твоих теченьми, пустыни безплодное возделал еси, / и иже из глубины воздыханьми, во сто трудов уплодоносил еси, / и был еси светильник вселенныя, / сияя чудесы Харитоне отче наш, / моли Христа Бога, спастися душам нашим.
Тропарь. Анастасии Сербской.
Добродетельми богатая, / кротостию и благочестием украшенная, / возсияла еси чистотою жития твоего, / сего ради благий Бог благослови тя / быти материю светильника рода сербскаго, / темже вопием ти: / радуйся, преподобная мати Анастасие.
Тропарь. Арсению Каппадокийскому.
Житие богоугодное добре скончав / сосуд честен Утешителя явился еси, Богоносне Арсение, / чудес благодать приим, всем подаеши скорое вспоможение, / отче преподобне, / Христу Богу молися / даровати нам велию милость.
Тропарь. Боголепу, отроку, схимонаху Черноярскому, Астраханскому.
От юности освящен бысть Господеви, / преподобне отче Боголепе, / мира сего красоту оставил еси, / желая древнему отечеству наследовати, / сохраняй град сей и люди, / с верою притекающия ко гробу твоему целебному, / просяще помощи и заступления, / да вси воспоим ти: / радуйся, отче Боголепе.
Тропарь. Варлааму Керетскому.
Божественною свыше просветився благодатию, преподобне, / мир оставил еси, / житейскую печаль и всяк мятеж мира сего / любве ради Христовы со дерзновением отвергл еси, / евангельски Христу последовал еси, / и, Того ярем взем, во всем воли Его повинулся еси, / и весь разум и сердце к Нему неуклонно возложил еси, / Христа ради тело свое изнуряя постом и бдением, в молитвах своих не усыпая, / Бога милостива творя и Пречистую Богородицу Молебницу предлагая, / и сего ради от Бога восприем власть и силу на сопротивнаго врага, / не убояся воздушныя и морския тяготы и студени, ниже уклонися, / и морскою пучиною в мале ладиице по водам шествие творя, / против зельнаго обуревания плаваше, / промышлением Божественнаго разума направляемь, / и около Святаго Носа непроходимый путь морский / от ядовитаго червия / благопроходен человеком без вреда сотворил еси молитвами своими, / и многим терпением во временней жизни подвиг совершил еси, / и, равноангельное житие пожив, / темже и по преставлении источаеши чудес благодать / иже верою приходящим к тебе / Варлааме, преблаженне отче наш, / вопием ти: моли Христа Бога, / да спасет души наша.
Тропарь. Варнаве Гефсиманскому.
Измлада Христа Бога чисте возлюбив, / сын утешения был еси, преподобне отче Варнаво. / По имени и житие твое бысть: / коемуждо страждущему, и нищу, и Царю, / пастырь кроток, утешитель и целитель явился еси. / Поминай нас, благодатный отче, / да молитвами теплыми твоими жизнодавец Бог дарует нам утешение и велию милость.
Тропарь. Гавриилу Седмиезерскому.
От юности, богомудре, просветився любовию Христовою, / суетный и многомятежный мир оставил еси. / Житие свое вверя предстательству Пречистыя Богородицы, / слез потоки изливал еси пред честным Ея образом, / и теченьми их седьм езер освятил еси. / И терпения ради украси тя небесными дарами Христос Бог наш, / в чудесех и ученицех славна показа земле Казанской.
.
|
